അപരാജിതൻ 25[Harshan] 10182

“എങ്ങനെ ,,എങ്ങനെ ഇതൊക്കെ ,,,അതും ഈ ഡമരുവിൽ നിന്നുമുള്ള ശബ്ദം കൊണ്ട് മാത്രം ,,” ആദി ചോദിച്ചു

“ശങ്കരാ ,, ശബ്ദം അത് പ്രണവമാണ് ,, ആദിയിൽ പ്രണവമാണ് ഉണ്ടായത് , ആ പ്രണവം ഈശ്വരനുമായിരുന്നു, അതുകൊണ്ടാണ്  ഓംകാരേശ്വരൻ എന്ന് വിളിക്കുന്നത് , അതവന്‍റെ  സൃഷ്‌ടിയുടെ മൂലാവസ്ഥയാണ് , പ്രണവമാണ് എല്ലാത്തിനും തുടക്കവും .ശബ്ദമാണ് പ്രണവം , ശബ്ദം താണ്ഡവത്തിനു൦ അതിലൂടെ സംഹാരത്തിനും കാരണമാകും ,, നാദ൦ തരംഗമായി പ്രകൃതിയെ സ്വാധീനിക്കും ,, അമൃതവര്‍ഷിണി  പാടി മഴയെ പെയ്യിക്കുന്ന പോലെ…….”

ആദി ചുടലയെ നോക്കി കൈകൾ കൂപ്പി

“നീയാരാ ,,,നീയാരാ ചുടലേ ,,,എവിടെ നിന്നാ നീ ഈ അറിവുകൾ നേടുന്നത്,,, ജ്ഞാനമാണ് നിന്‍റെ  അലങ്കാരം ജ്ഞാനത്തിനു ചണ്ഡാലരൂപമാണോ ?” ആദി അത്ഭുതത്തോടെ ചോദിച്ചു

ചുടല ഒരു ഭ്രാന്തനെ പോലെ ചിരിച്ചു

“ഞാൻ ആരാ ,,,,,,,?

ഞാൻ കൈ അല്ല ,,കാൽ അല്ല , അവയവങ്ങളേതുമില്ല. ഞാൻ ശരീരമല്ല , ഞാൻ ബോധമല്ല , ഞാൻ മനസല്ല

ഞാൻ ആത്മാവുമല്ല പക്ഷെ ഞാൻ എന്ന പ്രതിഭാസത്തിന്‍റെ  ഉടമസ്തതയിൽ ഉള്ളത് മാത്രമാണ് ആത്മാവും മനസും വിചാരവും ബോധവും ബുദ്ധിയും ദേഹവും ,, അങ്ങനെയുള്ള അവസ്ഥയിൽ ഞാൻ ആരാ എന്ന ചോദ്യത്തിന് ഉത്തരം ഒന്നേ ഉള്ളു ,,,ശിവോഹം …”

എന്‍റെ  അറിവുകൾ അതെനിക്ക് പ്രകൃതിയാണ് തരുന്നത് ,, എന്‍റെ  അലങ്കാരം ,,, ഹ ഹ ഹ ഹ,,,,അത് ശിവമാണ് …. ശിവമെന്ന അവസ്ഥയ്ക്ക് രൂപങ്ങളില്ല ,,ഏതു രൂപത്തിലും സങ്കല്പിക്കാ൦ ,,എങ്കിലും ചണ്ഡാലരൂപമാണ് പ്രകൃതിയോട് ചേർന്ന് നിൽക്കുന്നത് ,, ”

ഇത്രയും പറഞ്ഞു  കൊണ്ട് ചുടല ഒരുവട്ടം കൂടെ ആ ഡമരു ഒന്ന് മുഴക്കി “ഡൂ൦,,,,,,,,,” എന്ന ശബ്ദം മുഴങ്ങി.

ആദി അതെല്ലാം കണ്ണടച്ചിരുന്നു കേൾക്കുകയായിരുന്നു.

ഒരു പുഞ്ചിരിയോടെ അവൻ  കണ്ണുകൾ തുറന്നു

എല്ലാരോടുമായി പറഞ്ഞു

“ഇന്നെന്‍റെ  പാവം മുത്തശ്ശിയുടെ പിറന്നാളാണ് , കൊച്ചുമകനായ ഞാൻ ഇന്ന് മുത്തശിയുടെ ജന്മദേശത്ത് അതാഘോഷിക്കുകയാണ് ,,, എല്ലാവര്‍ക്കും ഭക്ഷണം ,, രാജകീയമായ ഭക്ഷണം ,, ഞാൻ നിങ്ങളെ എല്ലാവരെയും ക്ഷണിക്കുവാനാണ് വന്നത് ,, എന്‍റെ  അചല മുത്തശ്ശിയുടെ പിറന്നാളുണ്ണാ൯ നിങ്ങളെല്ലാവരും വരണം ,,,,,,,എന്‍റെ  ക്ഷണം അല്ല അപേക്ഷയാണ് ,,,,,,,,”

അതുകേട്ടു ചുടല ഒന്ന് ചിരിച്ചു

“നീ ,,,പോ ശങ്കരാ ,,,,,,,,നീ വിളിച്ചില്ലെങ്കിൽ കൂടിയും ഞങ്ങൾ ഇന്നവിടെ വരും ,, അചഞ്ചലശിവഭക്തയായ അചലമ്മയുടെ പിറന്നാൾ രാജകീയഭക്ഷണമില്ലെങ്കിൽ കൂടിയും അവർ നട്ട കൂവള വൃക്ഷത്തിൽ ഞങ്ങൾക്കായി  കൂവളഫലം പഴുത്തു കിടക്കുന്നുണ്ടാകും ,,,”

ആദി എല്ലാവരേയും തൊഴുതു കൊണ്ട് അവിടെ നിന്നും ഇറങ്ങി

നേരെ ശിവശൈലത്തേക്ക് പുറപ്പെട്ടു

<<<O>>>>