Wonder 7 [Nikila] 2416

ഞാനും അൽപ്പം കലിപ്പ് മോഡിലോട്ട് മാറി. മറ്റുള്ളവരുടെ മേൽ അധികാരം കാണിക്കുന്ന ദൈവങ്ങളോടുള്ള വെറുപ്പ് ഈ സാഹചര്യത്തിലാണ് എന്റെയുള്ളിൽ നിന്നും പുറത്തു വന്നത്. എന്റെ ചോദ്യത്തിന് മുന്നിൽ പുള്ളിക്കാരന് ഉത്തരം മുട്ടി.

 

“എങ്ങനെ ? എങ്ങനെ നിനക്ക് ഈ രീതിയിലൊക്കെ ചിന്തിക്കാൻ പറ്റുന്നു ? ?” ക്യൂപ്പിട്.

 

“ബിക്കോസ് അയാം എ ഡെപ്ലോമാറ്റിക് പേഴ്സൺ. ഞാൻ എല്ലാ കാര്യത്തിലെയും ലോജിക്കൽ സൈഡും മാജിക്കൽ സൈഡും നോക്കും. അതിലെനിക്ക് ലോജിക്കാണ് ശരിയായി തോന്നുന്നതെങ്കിൽ അതു ഞാൻ തിരഞ്ഞെടുക്കും. ഇനി അതല്ല, മാജിക്കാണ് ചേരുന്നതായി തോന്നുന്നതെങ്കിൽ അതായിരിക്കും എന്റെ തീരുമാനം ?”

 

സത്യത്തിൽ എനിക്കീ രീതിയിലൊക്കെ ചിന്തിക്കാൻ പറ്റുന്നത് ഞാനിപ്പോൾ നിൽക്കുന്നത് സ്വപ്നത്തിലായതുക്കൊണ്ടാണ്. സ്വപ്നത്തിൽ എപ്പോഴും മനുഷ്യർക്ക് സാധാരണയേക്കാൾ രണ്ടു മടങ്ങോളം തലച്ചോറ് പ്രവർത്തിക്കും.

 

“ഇല്ല, നിനക്കൊരിക്കലും മറ്റുള്ളവരുടെ മുന്നിൽ പ്രണയത്തെ തള്ളിപറയാനാവില്ല. അങ്ങനെ പറഞ്ഞാൽ ആ നിമിഷം പ്രണയമില്ലാത്ത നിന്നെ രാക്ഷസനെന്ന് സമൂഹം മുദ്ര കുത്തും” ക്യൂപ്പിട്.

 

പിന്നേയ്, കോപ്പാണ്. “ബ്യൂട്ടി ആൻഡ് ദി ബീസ്റ്റ്” സിനിമ കണ്ട ആളുകളാണ് ഇനി എന്നെ രാക്ഷനാക്കാൻ വരുന്നേ. എനിക്കിതൊരു തമാശയായിട്ടാണ് തോന്നിയത് ?.

 

“എന്താടാ ചിരിക്കുന്നേ ?. എന്നെ വിശ്വസിക്കുന്ന ഒരുപാട് പേര് ഈ ഭൂമിയിലുണ്ട്. അവരുടെ കയ്യിൽ നിന്നെ കിട്ടിയാൽ നിന്റെ അവസാനമാടാ” ക്യൂപ്പിട്.

 

അപ്പോഴാണ് എന്റെ തലയിലൊരു സ്പാർക്ക് വന്നത്. “വിശ്വസിക്കുന്നവർ”. മിഖി കാറിലിരുന്ന നേരത്ത് എന്നോട് പറഞ്ഞത് ഞാൻ ഒന്നുക്കൂടി ഓർത്തു നോക്കി.

 

നമ്മളിന്ന് കാണുകയും ആരാധിക്കുകയും ചെയ്യുന്ന ദൈവങ്ങളൊക്കെ പണ്ട് നമ്മുടെ പൂർവികന്മാരെല്ലാം ചേർന്നുണ്ടാക്കിയതാ. ആ ദൈവങ്ങളൊക്കെ ഇപ്പോഴും നിലനിൽക്കാൻ കാരണം നമ്മളവരെക്കുറിച്ച് ഓർക്കുന്നതുക്കൊണ്ടും ചിന്തിക്കുന്നതുക്കൊണ്ടും  മാത്രമാ. നമ്മുടെ വിശ്വാസമാണ് അവരുടെ ശക്തി. എന്നാണോ നമ്മളീ ദൈവങ്ങളെയൊക്കെ മറക്കുന്നത് അന്ന് ഇവരെല്ലാം ഇല്ലാണ്ടാവും

 

കാര്യം അവനത് ഒരു സിനിമയിലെ ത്രെഡ് എടുത്തു പറഞ്ഞതാണെങ്കിലും അതിലൊരു കാര്യമുണ്ട്. ഈ ദൈവങ്ങളുടെ നിലനിൽപ്പ് നമ്മുടെ ഓർമ്മയിലാണ്. നമ്മുടെ വിശ്വാസത്തില്ലാണ് ഇവരുടെ ശക്തി. വിശ്വാസത്തിന്റെ ബലം കൊണ്ടു മാത്രമാണ് വിശുദ്ധ സ്ഥലങ്ങളിലുള്ള വസ്തുക്കളിൽ തൊടുമ്പോൾ അത്ഭുതം നടക്കുന്നതായി തോന്നുന്നത്. ഞാനിപ്പോൾ കാണുന്ന സ്വപ്നത്തിൽ ഈ ക്യൂപ്പിട് കേറി വരാൻ കാരണം ഞാനുറങ്ങുന്നതിനു മുൻപ് ഇതിനെക്കുറിച്ച് ചിന്തിച്ചതുക്കൊണ്ടാണ്.

 

ഈ സ്വപ്നം എന്നു പറയുന്നത് ഈ സാഹചര്യത്തിൽ എനിക്കിപ്പോൾ ഒരു സിമുലേഷൻ പോലെയാണ് പ്രവർത്തിച്ചിരിക്കുന്നത്. ഏറെക്കുറെ ലൂസിഡ് ഡ്രീം തന്നെയാണ് ഞാനിപ്പോൾ എക്സ്പീരിയൻസ് ചെയ്യുന്നത്. ഇവിടെ എനിക്കിഷ്ടമുള്ളതെന്തും സൃഷ്ടിക്കാം. മുന്നോട്ടു നടക്കണമെന്ന് വിചാരിച്ചതുക്കൊണ്ടായിരുന്നു നേരത്തെ എന്റെ മുൻപിലൊരു റോഡ് തെളിഞ്ഞു വന്നത്. ഇപ്പോൾ ക്യൂപ്പിട് എന്റെ മുന്നിൽ വന്നു നിൽക്കുന്നത് ഞാൻ മനസ്സിൽ സങ്കൽപ്പിച്ച അതേ രൂപത്തിലാണ്. ഈ ഡ്രീം സിമുലേഷനിൽ എന്റെ മനസ്സിലെ ഭാവനയ്ക്കനുസരിച്ച് എന്തു വേണമെങ്കിലും മാറ്റിമറിക്കാൻ പറ്റും. വേണമെങ്കിൽ ഇവന്റെ ചരിത്രം വരെ എനിക്കു മാറ്റാനാകും?‍♂️.

 

“എന്താടാ, നിനക്കൊരു പേടിയും തോന്നുന്നില്ലേ ?”

 

ആഹാ, ഇതിന് കിട്ടിയതൊന്നും പോരാന്ന് തോന്നുന്നുണ്ട്. എന്നാപ്പിന്നെ മർമ്മത്തിനിട്ട് തന്നെ കൊടുത്തേക്കാം.

 

“താൻ കുറേ നേരായല്ലോ എന്നെ എടാ പോടാന്നൊക്കെ വിളിക്കുന്നു. ഇങ്ങനെയൊക്കെ എന്നെ വിളിക്കാനേ ഞാനേ, തന്റെ കുഞ്ഞമ്മേടെ മോനൊന്നുമല്ല. മര്യാദക്ക് താൻ നേരത്തത്തേ പോലെ അച്ചടി ഭാഷേല് തന്നെ മിണ്ടിയാ മതിയായിരുന്നു. വെറുതെ ഞാൻ ചോദിച്ചു മേടിച്ചു?. അല്ലെങ്കിലും തന്നെ മാത്രം പറഞ്ഞിട്ട് കാര്യമില്ല. തന്നെയൊക്കെ ഉണ്ടാക്കിയ അപ്പനെയും അമ്മയെയും പറഞ്ഞാൽ മതി”

 

“എന്താടാ നീ പറഞ്ഞേ ? എന്റെ അമ്മേനെ ആക്ഷേപിക്കാൻ മാത്രം ആയോടാ നീ ?”

 

വാടാ, വാ. അങ്ങനെ തന്നെ ദേഷ്യപ്പെട്. എനിക്കും അതു തന്നെയാ വേണ്ടേ?.

 

“നിന്റെ അമ്മേനെ പറ്റി ആളുകള് പറഞ്ഞു നടക്കുന്നത് ഞാൻ കേട്ടിട്ടുണ്ട്. വീനസ്, സ്നേഹം പരത്തുന്നവൾ, സൗന്ദര്യത്തിന്റെ ദേവത.  ശരിക്കും അതാണോ സത്യം ? തന്റെ അമ്മയ്ക്കാണോ ഏറ്റവും കൂടുതൽ സൗന്ദ്യര്യം ? അതിലും സുന്ദരിയായ വേറൊരു പെണ്ണിനെയും താൻ കണ്ടിട്ടില്ലേ ?”

 

ആ ചോദ്യം കേട്ടതോടെ അതുവരെ എന്നോട് കത്തിക്കേറിക്കൊണ്ടിരുന്ന ക്യൂപ്പിടിന്റെ മുഖഭാവം തന്നെ മാറി. നിരാശയും കുറ്റബോധവും പുള്ളിക്കാരന്റെ മുഖത്തു പ്രതിഫലിച്ചു കണ്ടു.