Wonder 7 [Nikila] 2416

“എടോ, വീനസിന്റെ മോനേ. താൻ വിട്ട അമ്പ് വെയ്സ്റ്റായിട്ടില്ല. എനിക്കാ സമയത്ത് പ്രേമമൊക്കെ വന്നിരുന്നു”

 

“ഇല്ല, ഞാൻ വിശ്വസിക്കില്ല. അന്നൊന്നും നീയൊരു പെണ്ണിനെയും വേറൊരു രീതിയിൽ നോക്കിയിട്ടില്ല. എനിക്കു ഉറപ്പാണ്”

 

“തന്റെ കണ്ണില് കൂട്ടക്കുരു വന്നതിന് ഞാനെന്ത് പിഴച്ചു. എടോ, താൻ അമ്പ് വിട്ടത് ഏതു സമയത്താണെന്നെങ്കിലും ഓർമ്മയുണ്ടോ ? എന്നാൽ ആ കാര്യത്തിൽ എനിക്കൊരു ധാരണയുണ്ട്. മിക്കവാറും ഞാൻ ബോറടിച്ചിരിക്കുന്ന നേരത്ത് ടീവിയിൽ സിനിമ കണ്ടുക്കൊണ്ടിരുന്ന സമയത്തായിരിക്കും താൻ അമ്പ് വിട്ടത്.

 

ഒരു കഥ സൊല്ലട്ടുമാ, എന്തായാലും തന്റെയാ അമ്പു പരിപാടി ഏറ്റു. ഒന്നേമുക്കാൽ വർഷം മുൻപ് ഞാനൊരു അനിമേഷൻ സിനിമ കണ്ടിരുന്നു. അപ്പോഴാവണം തന്റെ അമ്പ് എന്റെ നെഞ്ചത്തോട്ട് കേറി വന്നത്. പിന്നെ ഞാനെപ്പോഴും ആലോചിച്ചത് ആ സിനിമയെക്കുറിച്ചായിരുന്നു. ഊണിലും ഉറക്കത്തിലും എന്തിനു പറയുന്നു കക്കൂസിലിരിക്കുമ്പോൾ പോലും എന്റെ മനസ്സിൽ ആ സിനിമയെക്കുറിച്ചുള്ള ചിന്തകളായിരുന്നു ഉണ്ടായത്. ആ സിനിമയിലെ കഥാപാത്രങ്ങളുടെ കൂടെ ജീവിക്കാൻ പറ്റിയിരുന്നെങ്കിലെന്ന് ഞാനാഗ്രഹിച്ചു പോയി. അതിനു ശേഷം ഞാൻ അനിമേഷൻ സിനിമകള് തേടിക്കാണാൻ തുടങ്ങി. അങ്ങനെ അനിമേഷൻ സിനിമകള് എപ്പോഴും കണ്ട് ഇംഗ്ലീഷ് ലാംഗ്വേജ് പതിയെ മനസ്സിലായി തുടങ്ങിയപ്പോൾ മറ്റു ഹോളിവുഡ് സിനിമകളും കാണാൻ തുടങ്ങി. പിന്നെ അന്യഭാഷാ സിനിമകൾക്കൊക്കെ ഇംഗ്ലീഷ് സബ്ടൈറ്റിൽ ഉണ്ടെന്നറിഞ്ഞപ്പോ വേറെയും അന്യഭാഷാസിനിമകള് തേടിപ്പിടിച്ചു കണ്ടു. ആ പോക്കില് ഹിന്ദി, കന്നഡ, സ്പാനിഷ്, ചൈനീസ്, മാൻഡ്രിയൻ, അറബിക്ക്, കൊറിയൻ, ജപ്പാനീസ് അങ്ങനെ പല ഭാഷയിലെയും സിനിമകള് കണ്ടു. അങ്ങനെ ഞാനൊരു സിനിമാ ഭ്രാന്തനായി.

 

അങ്ങനെ എനിക്കു കണ്ട് ഇഷ്ടപ്പെട്ട സിനിമകൾ ഞാൻ പലർക്കും സജെസ്റ്റ് ചെയ്തു. പക്ഷെ പലരും ഭാഷയുടെ ബുദ്ധിമുട്ടും പറഞ്ഞു ഒഴിഞ്ഞു മാറി. അപ്പോഴാണ് എനിക്കൊരു ബുദ്ധി തോന്നിയത്. ഞാൻ വേറെ ഭാഷയിലുള്ള സിനിമകളൊക്കെ കണ്ടു തുടങ്ങിയത് ഇംഗ്ലീഷ് സബ്ടൈറ്റിൽ വച്ചാണ്. അതൊന്ന് മലയാളത്തിലേക്ക് മാറ്റിയാൽ പിന്നെ കാര്യങ്ങള് എളുപ്പമാവുല്ലോ. അങ്ങനെ ഞാൻ ഫേസ്ബുക്കിലുള്ള ഫ്രണ്ട്സുമായി ഈ കാര്യത്തെക്കുറിച്ച് ഒന്ന് ഡിസ്‌കസ്സ് ചെയ്തു. അവർക്കും ഈ കാര്യത്തിൽ പൂർണ്ണസമ്മതം. അങ്ങനെ ഞങ്ങൾ അന്യഭാഷാ സിനിമകൾക്ക് മലയാളം സബ്ടൈറ്റിൽ ഉണ്ടാക്കി കൊടുക്കുന്ന പരിപാടി ഏറ്റെടുത്തു”

 

ഇതെല്ലാം പറഞ്ഞുക്കൊണ്ടിരുന്ന നേരത്ത് ഞാൻ ക്യൂപ്പിടിനെയൊന്ന് നോക്കി. അതു വരെ അന്തരീക്ഷത്തിൽ പറന്നു നിന്ന പുള്ളിയിപ്പോൾ നിലത്താണ് നിൽക്കുന്നത്. തലയും ചൊറിഞ്ഞുക്കൊണ്ട് വേറെങ്ങോട്ടോ നോക്കി അലക്ഷ്യമായാണ് ആളുടെ നിൽപ്പ്.

 

“അതേയ്, ഞാൻ പറയുന്നത് വല്ലതും ശ്രദ്ധിക്കുന്നുണ്ടോ ?” ഞാൻ

 

ആള് എന്നെ നിസ്സഹായതയോടെ നോക്കി

 

“കഴിഞ്ഞോ നിന്റെ വായ്ത്താളം ?” ക്യൂപ്പിട്.

 

“എന്ത്യേ, ബോറടിക്കുന്നുണ്ടോ ?”

 

“ഉം”

 

“എന്റെ നെഞ്ചത്തോട്ട് അമ്പ് വിടുമ്പോ ആലോചിക്കണമായിരുന്നു ഇങ്ങനെയൊരു ഗതികേട് തിരിച്ചു വരുമെന്ന്?”

 

പുള്ളി ഒന്നും മിണ്ടിയില്ല.

 

“ശരി, വേഗം പറഞ്ഞു തീർക്കാൻ ശ്രമിക്കാം. അങ്ങനെ ഞങ്ങൾ അന്യഭാഷാ സിനിമകൾക്ക് മലയാളം സബ്ടൈറ്റിൽ തുടങ്ങുന്ന പുതിയ സംരംഭം ആരംഭിച്ചു, Malayalam Subtitle for Every One. ഞങ്ങള് കുറച്ചു പേര് ചേർന്ന് പല സിനിമകൾക്കും മലയാളം സബ്ടൈറ്റിൽ ഉണ്ടാക്കി പുതിയൊരു വെബ് സൈറ്റ് ക്രീയേറ്റ് ചെയ്ത് അതിൽ അപ്‌ലോഡ് ചെയ്തു. ആദ്യമൊക്കെ ഞങ്ങളെ കുറേ അന്താരാഷ്ട്ര ബുദ്ധിജീവികള് ഇക്കാര്യം കളിയാക്കി. അവർക്കൊക്കെ മലയാളത്തിൽ അന്യഭാഷാ സിനിമകൾ ആസ്വദിച്ചു കാണുന്നവരോട് പുച്ഛമായിരുന്നു. എന്നിട്ടും ഞങ്ങൾ ഈ പരിപാടിയുമായി മുന്നോട്ട് നീങ്ങി. വൈകാതെ ഞങ്ങളുടെ സബ്ടൈറ്റിൽ വച്ചു ആളുകള് സിനിമകള് കാണാൻ തുടങ്ങി. ഉദ്ദേശം നല്ലതായതുക്കൊണ്ട് അന്യഭാഷാ സിനിമകള് കാണാൻ വന്ന ആളുകളുടെ എണ്ണം കൂടിക്കൂടി വന്നു. അങ്ങനെ ഞങ്ങളുടെ ഈ ചെറിയ സംരംഭം വിജയിച്ചു. ഈയൊരു യാത്രയിൽ ഞങ്ങള് ഒറ്റയ്ക്കായിരുന്നില്ല. എന്നെപ്പോലെ സിനിമാ പ്രേമികളായ ഒരുപാട് പേര് അന്യഭാഷാ സിനിമകൾക്ക് മലയാളം സബ്ടൈറ്റിൽ ചെയ്യാൻ ഈ രംഗത്തേക്ക് വന്നു. അങ്ങനെ ഞങ്ങളുടെ ഈ ചെറിയ സംരംഭം കൂടുതൽ വിപുലപ്പെട്ടു. ഇന്ന് കേരളത്തിൽ ഒരുപാട് പേര് മലയാളസിനിമയ്ക്കപ്പുറം അന്യഭാഷാ സിനിമകൾ കാണുന്നവരുണ്ട്. 2015ൽ ടർക്കിഷ് ഭാഷയിൽ പുറത്തിറങ്ങിയ miracle എന്ന സിനിമ കേരളത്തിലുള്ളവർ ഏറ്റെടുക്കാനും ഒരു പരിധിവരെ ഞങ്ങളാണ് കാരണക്കാരായത്. മലയാളികളുടെ സിനിമാ കമ്പം ഇന്ത്യൻ ലെവലിൽ നിന്ന് പാൻ ഇന്ത്യൻ ലെവലിലേക്ക് മാറി. അങ്ങനെ സിനിമാപ്രേമികൾക്കിടയിൽ ഞാനൊരു സംഭവമായി. 

 

ഇതിനെല്ലാം കാരണം നിങ്ങളാണ്, നിങ്ങള് മാത്രം. നാല് ചുമരുകൾക്കുള്ളിൽ കഴിഞ്ഞ ഞാനിപ്പോൾ സോഷ്യൽ മീഡിയയിലെ ഒരു താരമാണ്. പക്ഷെ ഫേക്ക് ഐഡിയാണ് ഈ കളിയൊക്കെയെന്നു മാത്രം. അതു മാത്രം ഇത്തിരി വിഷമം പിടിച്ച കാര്യമാ?”

 

എല്ലാം പറഞ്ഞു കഴിഞ്ഞ ശേഷം ഞാൻ പുള്ളിയെ വീണ്ടും നോക്കി. ഇതിനിടയ്ക്ക് ആൾക്ക് താടിയൊക്കെ വന്നോന്നൊരു സംശയം. അമ്മാതിരി വലിച്ചു നീട്ടൽ സംസാരമല്ലേ ഞാൻ നടത്തിയേ?.