Wonder 7 [Nikila] 2416

എന്റെയും മിഖിയുടെയും ഒച്ചയെ കടത്തിവെട്ടിക്കൊണ്ട് റോയിയുടെ ശബ്ദം അലർച്ചയായി മുഴങ്ങി. കൂട്ടത്തിൽ അവൻ കൈ ശക്തിയായി ടേബിളിലിടിക്കുകയും ചെയ്തു. ഇത്രേം ശബ്ദം ഞങ്ങളിരിക്കുന്ന ടേബിളിൽ നിന്ന് കേട്ടപ്പോൾ അവിടെയുണ്ടായവരൊക്കെ കണ്ണും മിഴിച്ചു ഞങ്ങളെ നോക്കി. അഞ്ചു മിനിറ്റ് മുൻപ് കളിയും ചിരിയുമായി ഇരുന്നവര് പെട്ടന്ന് ഒച്ചപ്പാടും ബഹളവുമുണ്ടാക്കിയാൽ ആരായാലും സംശയിച്ചു പോകും. ആളുകളൊക്കെ ഞങ്ങളെ തന്നെ നോക്കിയപ്പോൾ ഇനി വെറുതെയൊരു സീൻ ക്രീയേറ്റ് ചെയ്യേണ്ടാന്ന് കരുതി ഞങ്ങൾ മൂന്നു പേരും ഒന്നും ഉരിയാടാതെ അതാത് കസേരകളിൽ അടങ്ങിയിരുന്നു?. അപ്പോഴേക്കും നേരത്തെയുണ്ടായ ബഹളമൊക്കെ കേട്ട് ഒരു ലേഡി സ്റ്റാഫ്‌ ഞങ്ങളുടെ അടുത്തേക്ക് വന്നു

 

“Sir, Anything is a problem ?”

 

“Everything is a problem. Please leave us alone” റോയ്.

 

അങ്ങനെ ആ പെണ്ണ് വന്നതുപോലെ തിരിച്ചു പോയി.

 

“എടാ നിനക്കൊന്നും ഈ നാട്ടില് തർക്കിക്കാൻ വേറൊരു വിഷയവും കിട്ടിയില്ലേ?. അത്രക്ക് ആശയദാരിദ്രം പിടിച്ചവരണോടാ നീയൊക്കെ” റോയ് 

 

ഞങ്ങള് രണ്ടു പേരും ഒന്നും മിണ്ടിയില്ല. അവൻ പറഞ്ഞതിലും ന്യായമുണ്ട്.

 

“ജോ, നീയിങ്ങോട്ട് വന്നത് നിനക്കെന്തോ ടെൻഷൻ വന്നിട്ട് ഒന്ന് റീലാക്സാവാൻ വേണ്ടിയാ. എന്നിട്ട് നീയിവിടെ വന്നിട്ട് എനിക്കു ടെൻഷൻ ഉണ്ടാക്കണല്ലോ. ഒരു മര്യാദയൊക്കെ വേണ്ടഡേയ്?”

 

പിന്നെ എനിക്കു കൂടുതൽ മിണ്ടാനൊന്നും തോന്നിയില്ല. നമ്മുടെ നൻപന് ഫീലായാ പിന്നെ കൂടുതൽ പ്രശനങ്ങള് ഉണ്ടാക്കാതിരിക്കുന്നതാ നല്ലത്?. റോയ് അതേ കലിപ്പോടെ തന്നെ അവന്റെ അടുത്തുണ്ടായ കോഫി കപ്പെടുത്തു വായിലോട്ടു കമിഴ്ത്തി. പക്ഷെ അതിലുണ്ടായ കോഫി ഞാൻ ആദ്യമേ കുടിച്ചതുക്കൊണ്ട് ആ പരിപാടിയും പാളി.

 

“ആരാടാ എന്റെ കോഫി കുടിച്ചേ ?”

 

“വല്ല ഈച്ചയെങ്ങാനായിരിക്കും” മിഖി.

 

“ഇത്തിരി പോന്ന ഈച്ചോയൊക്കെ ഇത്രേം കോഫി കുടിക്കോ” എന്നും ചോദിച്ചു കാലിക്കപ്പ് ഞങ്ങളെയവൻ കാണിച്ചു.

 

“ചിലപ്പോൾ ഫാമിലിയായി വന്നതാവും”

 

റോയ് എന്നെ ചൂഴ്ന്നു നോക്കി. എന്റെ പരുങ്ങല് കണ്ടപ്പോഴേ കാര്യം മനസിലായിക്കാണും.

 

“ജോ….. ?” റോയ്.

 

“എന്നെയെന്തിനാ നോക്കണേ ? നേരത്തെ നീ വിട്ട ഒച്ച കാരണം വന്ന റെഡിയേഷനിൽ അത് നീരാവിയായതാവും?” ഞാൻ.

 

എന്റെ മറുപടി കേട്ട് മിഖി പൊട്ടിച്ചിരിച്ചു. കൂടെ ഞാനും ചിരിച്ചു. സിറ്റുവേഷൻ കോമഡിയായതുക്കൊണ്ട് അതു വരെ കലിപ്പ് ഭാവമിട്ട് നിന്ന റോയിയും ചിരിച്ചു. അപ്പോഴും മറ്റുള്ള ആളുകള് ഞങ്ങളെ കണ്ണും മിഴിച്ചു നോക്കി. നേരെത്തെ ഒച്ചയും ബഹളവുമുണ്ടാക്കിയ ഞങ്ങളാണല്ലോ ഇപ്പോ പൊട്ടിച്ചിരിക്കുന്നേ ?. ഇതെന്തു മലര് എന്ന് കാണുന്നവർക്കൊക്കെ തോന്നിയിട്ടുണ്ടാവും. എന്നാൽ ആ ചിരിക്ക് അധികം സമയമുണ്ടായില്ല.

 

“ജോ….”

 

“എന്താടാ റോയ് ?”

 

“ഈ സോസ് ബോട്ടിലൊന്ന് തുറന്നു തന്നേ”

 

എന്നും പറഞ്ഞു അവൻ ടൊമാറ്റോ സോസിന്റെ ബോട്ടിൽ എനിക്കു നേരെ നീട്ടി. ബുദ്ധിമാൻ, ഇപ്പോഴത്തെ ടോപ്പിക്ക് മാറ്റാനൊരു വലയെറിഞ്ഞു നോക്കാണ് ഇവൻ. ആയിക്കോട്ടെ ?.

 

ഞാൻ അവന്റെ കയ്യീന്ന് ആ സോസ് ബോട്ടിൽ വാങ്ങി ഇതൊക്കെ നിസാരം എന്ന മട്ടില് അവനെ നോക്കി അതിന്റെ മൂടി തുറക്കാൻ നോക്കി. തുറക്കാൻ പറ്റിയില്ല. പിന്നെയും നോക്കി, അപ്പോഴും വല്ലാത്തൊരു ടൈറ്റ്. അങ്ങനെ ആ സത്യം ഞാൻ തിരിച്ചറിഞ്ഞു. ഞാൻ സോമനായി?. റോയിയെ നോക്കിയപ്പോൾ അവനെന്നെ നോക്കി ഇളിക്കുന്നു. ഒരു ജാഡയ്ക്ക് വാങ്ങിയതുക്കൊണ്ട് ഇനിയത് തിരിച്ചു കൊടുത്താൽ നാണം കെടും. ഞാൻ സകലമാന ബലവുമെടുത്ത് കുപ്പി തുറക്കാൻ നോക്കി പറ്റുന്നില്ല.

 

“എന്തു പറ്റി ജോ? ?” റോയ്

 

“ഒന്നൂല്ല. ഒന്നൂല്ല്യാന്നേ. ഇപ്പോ ശരിയാക്കിത്തരാം”