? ഋതുഭേദങ്ങൾ ?️ 09 [ഖല്‍ബിന്‍റെ പോരാളി ?] 798

അന്ന് ഇങ്ങോട്ട് പോരുമ്പോ എന്‍റെ മോള് ഒരു ചോദ്യചിഹ്നമായി മനസില്‍ ഉണ്ടായിരുന്നു. ഇനി അവളെ കൊണ്ട് എങ്ങോട്ട് പോവും… വീട്ടുകാരോട് എന്തുപറയും. അങ്ങിനെ ഒരുപാട് ചോദ്യങ്ങള്‍. കുടെ അനുവിനെ കൊന്ന് വന്നവള്‍ എന്ന ചിന്തയും. ആ സമയം അവളെ കൊല്ലാന്‍ വരെ തോന്നി. പക്ഷേ അതിന് മനസ് വന്നില്ല. രാത്രി ഈ നഗരത്തിലെത്തിയ ഞാന്‍ നടന്നു വരുന്ന വഴിയ്ക്കാണ് ആ ചര്‍ച്ച് കണ്ടത്. അവളുടെ ഭാവി ദൈവം തിരുമാനിക്കട്ടെ എന്നു വെച്ചു അവളെ ചര്‍ച്ചിന് മുന്നില്‍ കിടത്തി ഞാന്‍ ഇങ്ങോട്ട് പോന്നു. ഒന്നു തിരിഞ്ഞുനോക്കാന്‍ പോലും അന്നെനിക്ക് തോന്നിയില്ല. കാരണം അവളെ മനസില്‍ നിന്നു പോലും പൂര്‍ണമായും പറിച്ചെറിയുകയായിരുന്നു എന്‍റെ ലക്ഷ്യം….

ഇവിടെ വന്ന് പിറ്റേന്നാണ് ടോമും മാലുവും അമേരിക്കയില്‍ നിന്നു വന്നത്…. കാര്യങ്ങള്‍ ചോദിച്ചപ്പോ അനുവും കുഞ്ഞും ദൈവത്തിനടുത്തേക്ക് പോയിയെന്ന് ഞാന്‍ കള്ളം പറഞ്ഞു. പതിയെ രണ്ടുദിവസം മാത്രം പരിചയമുള്ള ആ ചോരകുഞ്ഞിനെ മറക്കാന്‍ ഞാന്‍ ശ്രമിച്ചു.

എന്നാല്‍ മൂന്ന് നാല് ദിവസത്തിനുള്ളില്‍ രാത്രി ഞാനൊരു സ്വപ്നം കണ്ടു. എന്നെ വിട്ടുപോയ ശേഷം അന്ന് ആദ്യമായി എന്‍റെ അനു എന്‍റെയടുത്തു വന്നു. എന്നോട് സംസാരിച്ചു. ഒരുപക്ഷേ സ്വപ്നത്തിലെങ്കിലും അവളെ വീണ്ടും കണ്ടപ്പോ മനസിന് ലഭിച്ച ഒരു ആശ്വാസം വളരെ വലുതായിരുന്നു. പക്ഷേ അവള്‍ എന്നോട് പിണക്കത്തിലായിരുന്നു. അവള്‍ ചോദിച്ചത് അവളുടെ കുഞ്ഞിനെയായിരുന്നു. ഞങ്ങളുടെ ജീവിതം മാറ്റുമെന്ന് അവള്‍ പറഞ്ഞ, അവള്‍ സ്വന്തം ജീവന്‍ കളഞ്ഞു രക്ഷിച്ച അവളുടെ കുഞ്ഞിനെ പറ്റി അവള്‍ ചോദിച്ചു. ഞാനപ്പോള്‍ മറുപടി പറയാന്‍ കഴിയാതെ നില്‍ക്കുക മാത്രമേ ഉണ്ടായുള്ളു. അന്ന് അവള്‍ ആദ്യമായി എന്നോട് ദേഷ്യപ്പെട്ടു. എന്നെ ഇഷ്ടമല്ലെന്ന് പറഞ്ഞു. എന്‍റെ ഭാര്യയായിരുന്നു എന്നതില്‍ ലജ്ജിക്കുന്നു എന്നുവരെ പറഞ്ഞു. അവളുടെ വാക്കുകളിലുടെ എന്നിലെ അച്ഛനെ അവള്‍ ഉണര്‍ത്തുകയായിരുന്നു.

നേരം പുലര്‍ന്നപ്പോഴേക്കും ഞാന്‍ പോലും അറിയാതെ എന്നില്‍ മാളുട്ടിയോടുള്ള ദേഷ്യം അലിഞ്ഞുപോയി. അവളെ ഉപേക്ഷിക്കാന്‍ തോന്നിയ നിമിഷത്തെ കുറിച്ചൊര്‍ത്തു സ്വയം അമര്‍ഷം തോന്നി. ഒരച്ഛന്‍റെ കടമ മറന്ന ഞാന്‍ ഒരു പരാജയമാണെന്ന് മനസിലാക്കി തുടങ്ങി. അന്ന് ആ ചര്‍ച്ചിലേക്ക് വീണ്ടും പോകുമ്പോ എങ്ങനെയെങ്കിലും എന്‍റെ കുഞ്ഞിനെ തിരിച്ചുകൊണ്ടുവരണമെന്ന ചിന്തയായിരുന്നു.

എന്നാല്‍ വലിച്ചെറിഞ്ഞ അത്ര എളുപ്പമായിരുന്നില്ല തിരിച്ചെടുക്കുന്നത്. അവിടെയുള്ളവര്‍ അവളെ അവിടെ സംരക്ഷിക്കുകയായിരുന്നു. അന്ന് ചിറ്റശ്ശിയുടെ പേരും പറഞ്ഞു അവിടെ പോയത് മാളുട്ടിയെ കാണാന്‍ ആയിരുന്നു. അന്ന് അവിടെ ഉള്ളില്‍ നിന്നു മാളുട്ടിയുടെ കരച്ചില് കേട്ടപ്പോ അങ്ങോട്ട് ഓടി ചെന്നതു എന്നിലെ അച്ഛന്‍ മനസ്സായിരുന്നു. ഞാന്‍ അവളെ കോരിയെടുക്കുമ്പോ ആദ്യമായി എനിക്ക് സന്തോഷം തോന്നി. എന്‍റെ കൊഞ്ചിക്കലില്‍ അവള്‍ ചിരിച്ചപ്പോ എന്‍റെ മനസും പുഞ്ചിരിച്ചു.