? ഋതുഭേദങ്ങൾ ?️ 09 [ഖല്‍ബിന്‍റെ പോരാളി ?] 798

അന്ന് മൃഗശാലയില്‍ നിന്ന് ഇറങ്ങുന്നത് വരെ മാളുട്ടി അനഘയുടെ കൈയും പിടിച്ചായിരുന്നു നടന്നത്. ഓരോ മൃഗങ്ങളെയും കാണുമ്പോ അവളുടെ മുഖത്ത് വരുന്ന പേടിയും കൗതുകവും എല്ലാം അനഘ അടുത്തു നിന്നു കണ്ടു. അവളുടെ കുഞ്ഞു കുഞ്ഞു സംശയങ്ങള്‍ക്ക് ക്ഷമയോടെ അനഘ മറുപടികള്‍ നല്‍കി.

ദേവാണേങ്കില്‍ അവരുടെ ഒപ്പം അവരുടെ സംസാരവും ഭാവങ്ങളും നോക്കി നടക്കുകയായിരുന്നു. ഒരു നിമിഷം അവന് അനുവിനെ ഓര്‍മ്മ വന്നു പോയി. ഒരുപക്ഷേ അവളുണ്ടായിരുന്നെങ്കില്‍ അവളുടെ കൈയില്‍ തുങ്ങി അവളോട് ശാസനയും സ്നേഹവും കൊണ്ട് വളരേണ്ടിരുന്ന മാളുട്ടിയെയാണ് അവന്‍ അവിടെ കണ്ടത്. താന്‍ എത്രമാത്രം സ്നേഹിച്ചാലും പരിചരിച്ചാലും അമ്മ എന്ന അത്ഭുതത്തിന് പകരമാവില്ല ഒന്നും….

അനഘയാണേല്‍ മാളുട്ടിയിലേക്ക് മാത്രമായി അടുത്തുപോവുകയായിരുന്നു. ദേവ് എന്ന ഒരാള്‍ തന്‍റെ കുടെയുള്ള കാര്യം പോലും അവള്‍ മറന്നിരുന്നു. മാളുട്ടിയുടെ കുടെ അവിടെ ഓരോ ഇടത്തേക്കും പോകുന്നതും അവളുടെ ഓരോ സംശയങ്ങള്‍ക്ക് ഉത്തരം കൊടുക്കുന്നതും ആയിരുന്നു അപ്പോഴെത്തേ സന്തോഷം. അതിനാല്‍ വേറെ ഒരു കാര്യവും മനസിലേക്ക് വന്നത് പോലുമില്ല.

അങ്ങനെ ആ മൃഗശാല മുഴുവന്‍ അലഞ്ഞ്തിരിഞ്ഞ് അറിയാവുന്നതും അറിയാത്തതുമായ ഒരുപാട് മൃഗങ്ങളെയും പക്ഷികളെയും കണ്ടു. മാളുട്ടിയ്ക്ക് വന്യമൃഗങ്ങളോടാണ് താല്‍പര്യം. സിംഹത്തേയും പുലിയേയും കടുവയേയുമെല്ലാം കക്ഷി അത്ഭുതത്തോടെയാണ് നോക്കി കണ്ടത്. അവരുടെ ഒക്കെ മുന്നില്‍ ഒരുപാട് സമയം ചിലവഴിക്കുകയും ചെയ്തിരുന്നു.

മൃഗശാല മൊത്തം കറങ്ങി തിരിഞ്ഞ് പുറത്തിറങ്ങിയപ്പോള്‍ നേരം ഉച്ചയായിരുന്നു. അവിടെ നിന്നിറങ്ങി നേരെ ഹോട്ടലില്‍ കയറി ഉച്ചഭക്ഷണം കഴിച്ചു. ദേവും മാളുട്ടിയും ഊണാണ് കഴിച്ചത്. അവര്‍ക്ക് ബിരിയാണി വലിയ സംഭവമൊന്നുമായിരുന്നില്ല. എന്നാല്‍ അനഘ ബിരിയാണി കഴിച്ചു. വല്ലപ്പോഴും കിട്ടുന്ന സംഭവമായത് കൊണ്ടു അനഘ അത് ആസ്വദിച്ചു കഴിച്ചു. മാളുട്ടിയും ദേവും ഒരു ഇലയില്‍ നിന്നായിരുന്നു കഴിച്ചിരുന്നത്. കാരണം ഒരു ഊണ് മുഴുവന്‍ അവള്‍ കഴിക്കില്ലെന്ന് ദേവിന് ഉറപ്പായിരുന്നു. കിട്ടിയ വിഭവങ്ങളെല്ലാം ഭാഗിച്ച് അവര്‍ ഇരുവരും കഴിച്ചു. എന്നാല്‍ പപ്പടത്തിലും പായസത്തിലും ഒരു കോപ്രമൈസിന് മാളുട്ടി സമ്മതിച്ചില്ല. അത് അവള്‍ ഒറ്റയ്ക്ക് അകത്താക്കി.

ഹോട്ടലില്‍ നിന്നിറങ്ങിയാതിന് ശേഷം നേരെ പോയത് ഒരു കിഡ്സ് ഷോറുമിലേക്കാണ്. അവിടെ നിന്ന് മാളുട്ടിയ്ക്ക് പുതിയ ഒന്ന് രണ്ട് ജോഡി ഉടുപ്പും അവളുടെ ഇഷ്ടത്തിന് രണ്ടുമൂന്ന് ടോയും വാങ്ങി. മാളുട്ടിയ്ക്കുള്ള ഡ്രെസ്സെടുക്കുന്നത് കണ്ടപ്പോഴെ ഈ കാര്യത്തില്‍ ദേവ് ഒരു എക്സ്പെര്‍ട്ടാണെന്ന് അനഘയ്ക്ക് മനസിലായി. നീണ്ട നേരത്തെ സെലക്ഷനിംഗിന് ശേഷം നല്ല രണ്ടു ജോടി ഉടുപ്പ് അവന്‍ തിരഞ്ഞെടുത്തു. രണ്ടും നന്നായി മാളുട്ടിയ്ക്ക് ചേരുന്നുണ്ടായിരുന്നു.