✮കൽക്കി࿐ (ഭാഗം – 23) വിച്ചു [ചെകുത്താനെ സ്നേഹിച്ച മാലാഖ ] 1066

അടി കൊണ്ട അവൾ തന്റെ കൈ കരണത്ത് വച്ചു പോയി , അവളുടെ കണ്ണുകൾ നിറഞ്ഞൊഴുകി , മറുപടി ഒന്നും പറയാതെ അവൾ അവനെ നോക്കി ഭയത്തോടെ മൗനമായി നിന്നു …

” താൻ ….. താൻ കളിക്കുകയാണോ ? ഈ കുറച്ച് സമയം കൊണ്ട് ഞാനെന്ത് മാത്രം ഭയന്നെന്ന് തനിക്കറിയോ , എന്തൊക്കെ ചിന്തിച്ച് കൂട്ടിയെന്ന് അറിയോ …. ശരീരം ഇപ്പോഴും വിറയ്ക്കുവാ പേടിച്ചിട്ട് …. തനിക്കെന്തെങ്കിലും പറ്റിയാൽ പിന്നെ ഞാൻ ജീവനോടിരിക്കുമോ …. ”

അവനതും പറഞ്ഞ് അവളുടെ മുഖം കൈകളിൽ കോരിയെടുത്ത ശേഷം നിറഞ്ഞൊഴുകുന്ന കണ്ണുനീർ തുള്ളികൾ തുടയ്ച്ച് മാറ്റി .

” എന്തിനാടോ എന്നെ ഇങ്ങനെ പേടിപ്പിക്കുന്നേ …. തനിക്കന്ന് വിഷബാധയേറ്റന്നിറിഞ്ഞ സമയം ഞാനെന്ത് മാത്രം ഭയന്നെന്നറിയോ … ? പിന്നെയും ഇങ്ങനെ കേട്ടാൽ ഞാൻ ….”

അവൻ പറഞ്ഞ് തീരുന്നതിന് മുൻപ് തന്നെ അവൾ അവന്റെ നെഞ്ചിലേയ്ക്ക് വീണ് അവന്റെ ശരീരത്തെ മുറുക്കെ ചുറ്റിപ്പിടിച്ചു കൊണ്ട് അവൾ പൊട്ടിക്കരയാൻ തുടങ്ങി …..

” ഒത്തിരി ഇഷ്ടമായിരുന്നിട്ടും വർഷങ്ങൾ കാത്തിരുന്നിട്ടും ഞാൻ മുന്നിൽ വന്നപ്പൊ ഓരോരോ കാരണങ്ങൾ പറഞ്ഞ് എന്നെ ഒഴിവാക്കാൻ നോക്കിയില്ലേ , എല്ലാം മറക്കണമെന്ന് പറഞ്ഞില്ലേ … പറ്റില്ല , എനിക്ക് മറക്കാൻ കഴിയില്ല …. എന്റെ ജീവൻ രക്ഷിക്കാൻ സ്വന്തം ജീവൻ പോലും നോക്കാതെ പലതും ചെയ്തിട്ട് എന്നെ അത്രമാത്രം സ്നേഹിച്ചിട്ട് ആ സമയം അങ്ങനെയൊക്കെ പറഞ്ഞപ്പൊ എനിക്ക് എന്ത് മാത്രം സങ്കടം മനസ്സിൽ തോന്നിയെന്ന് അറിയോ ….