✮കൽക്കി࿐ (ഭാഗം – 23) വിച്ചു [ചെകുത്താനെ സ്നേഹിച്ച മാലാഖ ] 1066

തന്റെ കയ്യിൽ ചെറു ചൂടേറിയ വെള്ളത്തുള്ളികൾ വീഴുന്നത് പോലെ അനുഭവപ്പെട്ടതും അവൻ തിരിഞ്ഞ് അവളെ ഒന്ന് നോക്കി , അപ്പോഴാണ് തന്റെ തോളിൽ തല ചായ്ച്ചിരിക്കുന്ന അവൾ നിശബ്ദമായി കരയുകയാണെന്ന് അവന് മനസ്സിലായത് ….

” എന്താടോ …. എന്തിനാ താൻ കരയുന്നേ ? ”

ചെറിയ ആശങ്കയോടെ അവൻ കാര്യം തിരക്കി …

” മ് …. ഒന്നൂല്ല ”

അവളൊന്ന് സങ്കടഭാവത്തോടെ മൂളുക മാത്രം ചെയ്തു , ഉടനെ തന്നെ അവൻ നാടിയിൽ പിടിച്ച് അവളുടെ മുഖം തന്റെ നേരെ ഉയർത്തി …

” അല്ല എന്തോ ഉണ്ട് . എന്താടോ ? എന്തിനാ കരയുന്നേ , കാര്യം പറ … ? ”

അവൻ വീണ്ടും ചോദ്യമാവർത്തിച്ചു .

” എന്തോ ഒരു പേടി പോലെ , ഈ സ്നേഹവും സന്തോഷവുമൊക്കെ എനിക്ക് അധിക നാൾ അനുഭവിക്കാൻ കഴിയില്ല എന്നൊരു തോന്നൽ , എന്റെ പുറകേ ആരോ ഉണ്ട് എന്തിനോ വേണ്ടി …. ഇനി ചിലപ്പൊ ഞാൻ പെട്ടെന്ന് ഈ ഭൂമി വിട്ട് പോയാൽ ….. ”

പറഞ്ഞ് മുഴുവിപ്പിക്കുന്നതിന് മുൻപ് അവൻ അവളുടെ വായ പൊത്തിപ്പിടിച്ചു ….

” താനിതെന്തൊക്കെയാ ഈ പറയുന്നേ … എന്തിനാ താനിങ്ങനെ പേടിക്കുന്നേ …. ? ”

” മ് ഹ് ….. എനിക്ക് വിഷബാധയേറ്റത് ആരോ കരുതിക്കൂട്ടി ചെയ്തതാണെന്ന് ഒരു തോന്നൽ , വെറും തോന്നലല്ല അതാണ് ശരി ആ ഇന്ദ്രജാലക്കല്ലിന് വേണ്ടി …. അവർ ഇനിയും വരും പക്ഷെ ഇനി അവർ വരുന്നത് എന്റെ ജീവന് വേണ്ടിയാകും …. ”

നിറഞ്ഞ കണ്ണുകളോടെ അവൾ പറഞ്ഞതും അവനവളെ ചേർത്ത് പിടിച്ചു …