✮കൽക്കി࿐ (ഭാഗം – 23) വിച്ചു [ചെകുത്താനെ സ്നേഹിച്ച മാലാഖ ] 1065

അവരിൽ പ്രധാനിയായ രണദേവ് തന്റെ വാളിന്റെ മൂർച്ച ഒന്ന് നോക്കിയ ശേഷം അതിന്റെ തിളക്കത്തിൽ മതിമറന്ന് നിന്നു …. ദുർഗയാകട്ടെ തന്റെ കയ്യിലെ കെട്ട് അഴിക്കാൻ ശ്രമിക്കുകയാണ് പക്ഷെ കഴിയുന്നില്ല ….

” എന്താ ? എന്തിനാടീ നീ ഇങ്ങനെ കിടന്ന് പിടയ്ക്കുന്നേ …. ? നീ ഇവിടുന്ന് രക്ഷപ്പെടാനും പോകുന്നില്ല നിന്നെ രക്ഷിക്കാനായിട്ട് ആരുമിങ്ങോട്ട് വരാനും പോകുന്നില്ല … ആരെങ്കിലും ഈ വനത്തിലോട്ട് കാലെടുത്ത് വെച്ചാൽ അവന്റെ മരണം ഉറപ്പാ …. മ് …. സമയം കുറച്ചായി , നിന്റെ മറ്റവനെ ഞങ്ങളുടെ ആൾക്കാർ ഇതിനോടകം തീർത്തിട്ടുണ്ടാകും … ”

രണദേവ് പറഞ്ഞതും കൂടെയുള്ളവർ അട്ടഹസിച്ച് ചിരിച്ചു , അത് കേട്ടതും ദുർഗയുടെ മുഖത്തും കണ്ണുകളിലും ഭീതിയും സംശയവും ഒരുപോലെ മിന്നിമറഞ്ഞു …

അത് കണ്ടതും രണദേവ് അവളുടെ അടുത്തായി മുന്നിൽ മുട്ടുകൾ മടക്കി ഇരുന്ന ശേഷം അവളെ ഒന്ന് രൂക്ഷമായി നോക്കി .

” എന്താ …. ഞങ്ങൾ എല്ലാം എങ്ങനെ അറിഞ്ഞു എന്നാണോ ? നിന്റെ ഒരു തോഴിയെ കാണാതായിട്ട് രണ്ടു മൂന്ന് നാൾ കഴിഞ്ഞില്ലേ ….? അവളെ തീർത്തത് ഞാനാ …. ”

അവൻ പറഞ്ഞ വാക്കുകൾ കേട്ട ദുർഗയുടെ കണ്ണുകൾ നിശബ്ദമായി നിറഞ്ഞൊഴുകി ഒരു തരം ഭയത്തോടെ ….

” എന്ത് ചെയ്യാനാ അറിയേണ്ടതൊക്കെ അറിഞ്ഞ് കഴിഞ്ഞപ്പൊ , പിന്നെ അവളെ പുറത്തേയ്ക്ക് വിട്ടാൽ ഞങ്ങൾക്ക് അപകടമല്ലേ അതുകൊണ്ടാ ….. ആദ്യമൊന്നും പറഞ്ഞില്ല , ഉണ്ട ചോറിന്റെ നന്ദി . പിന്നെ ഒരു പാട് തല്ല് കിട്ടിയപ്പൊ ചാവും എന്ന് ഉറപ്പായപ്പൊ എല്ലാം പറഞ്ഞു . എന്നിട്ടും വെറുതേ വിട്ടോ … ഹ …. ഇല്ല .