പതിനൊന്നാം ? തീയാട്ട് [Sajith] 1367

ബാഗും പിടിച്ച് മുറ്റത്ത് നിക്കണ കുഞ്ഞൂട്ടനോടായി അവൻ ചോദിച്ചു. 

“”ഒരു ട്രിപ്പുണ്ട്…””,

അതും പറഞ്ഞ് കുഞ്ഞൂട്ടൻ നടന്നു. കവലയിലേക്ക് ഡയറക്ട് ബസില്ല. ഇടവൂർക്കര വന്ന് മാറി കയറേണ്ടി വന്നു. ചുങ്കത്തറ കവലയിൽ എത്തിയപ്പൊ സമയം ഏകദേശം പന്ത്രണ്ടര മണിയായിരുന്നു. വരുന്ന കാര്യം ഇന്ദിരാമ്മയോട് പറഞ്ഞിട്ടില്ല. ഒരു സർപ്രൈസ് ആയിക്കോട്ടേന്ന് കരുതി.

ആൽമരത്തിന് ചുറ്റി ബസ് കവലയിൽ നിറുത്തി. ഓരോരുത്തരായി ഇറങ്ങി കൂടെ കുഞ്ഞൂട്ടനും. 

നല്ല പ്ലസൻ്റ്  ഡേ.. ഇളം വെയിലും ചെറിയ കാറ്റും. കാറ്റിൽ വേപ്പിൻ ഇലയുടെ മണവും.., മൊത്തം ഒരു സമാധാനം ഫീൽ ചെയ്തു. കുഞ്ഞൂട്ടൻ ബാഗും തൂക്കി നേരെ ചായക്കടയിലേക്ക് നടന്നു. 

ഇന്നും കലിങ്കിൻ മേൽ കുറച്ച് അമ്മാർവന്മാര് ഇരിക്കുന്നുണ്ട്. സ്ഥിരം കലാപരിപാടി തന്നെ നാട്ടു വിശേഷങ്ങളും ഗോസിപ്പുകളും മറ്റും ചർച്ചചെയ്യുന്നു. കുഞ്ഞൂട്ടൻ നടന്നു വരുന്ന കണ്ട് കൊണ്ട് അവരൊന്ന് നോക്കി. ആദ്യം വന്നിറങ്ങിയ പോലെ ആയിരുന്നില്ല. ഇന്ന് കണ്ടപ്പൊ കുഞ്ഞൂട്ടനെ നോക്കി ചിലരൊക്കെ പരിചയം ഉണ്ടെന്ന പോലെ ചിരിച്ചു.., കുഞ്ഞൂട്ടൻ തിരികെയും. 

“”ഏട്ടാ ഒരു സ്ട്രോങ്ങ് ചായ..””,

കൈയ്യിലെ ബാഗ് ചായക്കടയിലെ ഡെസ്കിൽ വച്ച് കുഞ്ഞുട്ടൻ ഒരു ചായ പറഞ്ഞു.

“”ആ മോനോ..””,””കൊറച്ചായല്ലോ കണ്ടിട്ട്…””,””വരുന്ന വഴിയാണോ..””,

ചായ അടിച്ച് പതപ്പിക്കുന്നതിനിടയ്ക്ക് കടക്കാരൻ കുഞ്ഞൂട്ടനോട് ചോദിചു.

“”ആഹ്.. ഏട്ടാ..””,””വരണ വഴിയാ..””,

ചായ കുടിച്ചപ്പൊ ഒരു ഉഷാറു വന്നു. പൈസ കൊടുത്ത് കുഞ്ഞൂട്ടൻ പുറത്തേക്കിറങ്ങി. ക്ലബ്ബിൽ ക്യാരംസ് കളിച്ച് കുറച്ചു പേര് ഇരിക്കുന്നുണ്ട്. കുഞ്ഞൂട്ടനെ കണ്ടപ്പൊ ഒന്ന് കൈപൊക്കി കാണിച്ചു. ഒരു റൗണ്ട് കളിച്ചിട്ട് പോവാനായി ക്ഷണിച്ചു. കുഞ്ഞൂട്ടൻ അവരോട് വൈകിട്ട് ഇറങ്ങാമെന്നും പറഞ്ഞ് ആൽമരവും കടന്ന് പാടത്തെ വരമ്പിലൂടെ ചെമ്പ്ര ലക്ഷ്യമാക്കി നടന്നു.

കണ്ടത്തിലെ തടവെട്ടി പൊളിച്ച് വെള്ളമെല്ലാം തോട്ടിലേക്ക് തിരിച്ചിരിക്കുന്നു. അൽപം ചരിഞ്ഞ് തട്ടുതട്ടായി ഒരുക്കിയതോണ്ട് വെള്ളം വല്ലാണ്ട് കെട്ടി നിൽക്കില്ല അവശ്യത്തിൽ കൂടുതൽ ഉള്ളത് ഒഴുകി പൊയ്ക്കോളും.. ചെറിയ ഞണ്ടുകളും പരലുകളുമെല്ലാം നെൽചെടിക്ക് ഇടയിലൂടെ ശബ്ദമുണ്ടാക്കി പോവുന്നു. 

കുഞ്ഞൂട്ടൻ വരമ്പിലൂടെ വീട്ടിലേക്ക് നടന്നു. ചെമ്പ്രയുടെ പടിപ്പുര അടഞ്ഞ് കിടക്കാണ്. അവൻ പതുക്കെ തുറന്ന് അകത്ത് കടന്നു. 

പിന്നാപുറത്തെ പറമ്പിൽ വെണ്ടയ്ക്കും പയറിനുമെല്ലാം ഒരോ താങ്ങ് കൊടുക്കുന്ന തിരക്കിലായിരുന്നു ഇന്ദിരാമ്മ.  പടിപ്പുര തുറന്ന ശബ്ദമൊന്നും കേട്ടില്ല.