കൃഷ്ണവേണി – അവസാന ഭാഗം [രാഗേന്ദു] 2309

അടുത്ത ദിവസം കൃഷ്ണ എവിടേയോ പോയി വരുന്ന വഴിയാണ് ഒരു കാർ അവളുടെ മുൻപിലൂടെ കടന്നു പോയത്.. അതിൽ മിഷേലിനെയും അഷ്‌ലിയെയും കണ്ടപ്പോൾ അവർ തിരിച്ചു പോവുകയാണോ എന്ന് അവൾക്ക് സംശയം തോന്നി..

പക്ഷെ ആരോട് ചോദിക്കും എന്ന് അവൾ ചിന്തിച്ചു..

അപ്പോഴാണ് വിജയേട്ടനെ അവൾ കണ്ടത്.. അയാൾ തറവാട്ടിലെ കാര്യങ്ങൾ നോക്കുന്ന ആളുകൂടി ആണ്.. അപ്പൊ അയാൾക്ക് എന്തെങ്കിലും അറിയുമായിരിക്കും എന്നവൾ ഊഹിച്ചു..

അവൾ വഴിയിൽ നിൽക്കുന്നത് കണ്ട് വിജയൻ അവളുടെ അടുത്തേക്ക് വന്നു..

“എന്താ മോളെ ഇവിടെ നിൽക്കുന്നത്..”

അയാൾ ചോദിച്ചപ്പോൾ അവൾ ഒന്ന് അയാളെ നോക്കി ചിരിച്ചു..

“അത് ആഷ്‌ലി സർ കാറിൽ പോകുന്നത് കണ്ടു..
അവർ എങ്ങോട്ട് പോയതാണെന്ന് ആലോചിച്ചു നിന്നതാ.”

“അഹ് അത് അവർ തിരിച്ചു പോകുന്നതാവും അമേരിക്കയിലേക്ക്.. ഇന്നലെ എന്തോ സംസാരം കേട്ടു.. വലിയ തിരക്കുളള ആളുകൾ ആല്ലേ..”

അയാൾ അത് പറഞ്ഞു നടന്നുപോയപ്പോൾ അവളുടെ ഉള്ള് നീറി.. മനസ് വല്ലാതെ തകർന്നു പോയത് പോലെ.. എല്ലാം തുറന്നു പറഞ്ഞിട്ടും.. ഒരു പ്രതീക്ഷ ഉണ്ടായിരുന്നു അവൾക്ക് അവൻ സ്വീകരിക്കും എന്ന്.. അവൻ പോയി എന്ന് കേട്ടപ്പോൾ അവൾക്ക് നിയന്ത്രിക്കാൻ ആയില്ല.. അവൾ ഓടി ചെന്ന് നിന്നത് തറവാട്ടിലെ കുളകടവിൽ ആണ്..

അവൾക്ക് കരച്ചിൽ നിയന്ത്രിക്കാൻ ആയില്ല.. എല്ലാം കൈവിട്ടു പോയത് പോലെ അവൾക്ക് തോന്നി.. അവൾ ഇങ്ങോട്ട് വന്ന് അവനെ കണ്ടുമുട്ടേണ്ടിരുന്നില്ല എന്നവൾക്ക് തോന്നി..

“മിഷേൽ.. മിഷേൽ മാം പറഞ്ഞത് കൊണ്ട് മാത്രം ആണ് ഞാൻ വന്നത് .. ”

അവൾ അത് സ്വയം പറഞ്ഞു കരയാൻ തുടങ്ങി..