കൃഷ്ണവേണി – അവസാന ഭാഗം [രാഗേന്ദു] 2309

“പിന്നെ മോനെ ഞങ്ങൾ വന്നത് വേണിയുടെ ചില സാധങ്ങൾ ഇവിടെ ഉണ്ട് എന്ന് അവൾ വിളിച്ചപ്പോൾ പറഞ്ഞു.. അവളുടെ ഡ്രെസ്സും മറ്റും.. അത് കൊണ്ടുപോവാൻ വന്നതാണ്.. ”

അവളുടെ അച്ഛൻ എന്നോട് പറഞ്ഞപ്പോൾ ഞാൻ ഒരു നിമിഷം ഒന്നും മിണ്ടാതെ നിന്നു.. അറിയില്ല എന്തുകൊണ്ടാണ് എന്ന്..ഞാൻ ഒന്ന് ചിരിച്ചു..

“അതിനെന്താ അങ്കിൾ പറഞ്ഞിരുന്നുവെങ്കിൽ ഞാൻ കൊണ്ട് തരുമായിരുന്നു.. വയ്യാത്ത അവസ്ഥയിൽ വരണമായിരുന്നോ..??”

“അത് മോനെ അവൾ പറഞ്ഞു ഇനി മോനെ ബുദ്ധിമുട്ടിപ്പിക്കേണ്ട എന്ന്. ഒരുപാട് സഹായങ്ങൾ മോൻ ചെയ്തു തന്നു അതിനൊക്കെ എങ്ങനെയ ഞങ്ങൾ.. അവളെ നോക്കി, പഠിപ്പിച്ചു, അവൾ ഇന്ന് ഈ നിലയിൽ ആയെങ്കിൽ അത് മോൻ കാരണം ആണ്. എല്ലാത്തിനും നന്ദി.”

അദ്ദേഹം കരഞ്ഞു കൊണ്ട് കൈ കുപ്പിയപ്പോൾ ഞാൻ അടുത്തു ചെന്ന് കയ്യിൽ പിടിച്ചു..

“എന്താ ഇത്.. ഡോണ്ട് ടു ദിസ്.. അവളുടെ ഹാർഡ് വർക്ക് കൊണ്ട് മാത്രം ആണ് അവൾ ഇന്ന് ഈ നിലയിൽ ആയത്.. ഞാൻ ഒന്ന് സഹായിച്ചു എന്നെ ഉള്ളു. ഞാൻ ഇല്ലെങ്കിലും അവൾ അത് നേടി എടുക്കുമായിരുന്നു..”

അവളുടെ അമ്മയും കണ്ണ് തുടക്കുന്നത് ഞാൻ കണ്ടു..

“ആ മുറിയിൽ ആണ് അവളുടെ ഡ്രെസ് ഒക്കെ.. എടുത്തോളൂ..”

ഞാൻ പറഞ്ഞപ്പോൾ അവളുടെ അമ്മ അകത്തേക്ക് പോയി.. കുറച്ചു സമയത്തിന് ശേഷം അവർ ഒരു ബാഗുമായി പുറത്തേക്ക് ഇറങ്ങി..

“എല്ലാം എടുത്തില്ലെ?”

“മ്മ്മ്..”

“അവൾക്ക് അവിടെ കോഴപ്പങ്ങൾ ഒന്നും ഇല്ലല്ലോ..? ”

“ഇല്ല മോനെ.. ട്രെയിനിങ് ഒക്കെ നല്ല രീതിയിൽ പോകുന്നുണ്ട്.. എന്നാൽ ശരി ഞങ്ങൾ ഇറങ്ങട്ടെ.. അറിയില്ല ഇതിനൊക്കെ എങ്ങനെ നന്ദി പറയണം എന്ന്..”