” പ്രണയത്തിന്റെ നിറക്കൂട്ടില്‍ ചാലിച്ച സുന്ദര സ്വപ്നങ്ങള്‍ക്കു സാക്ഷാത്കാരം ലഭിക്കുമ്പോള്‍ , തന്‍റെ പ്രാണന്‍റെ പാതിയില്‍ നിന്നും നെറുകയില്‍ പതിയുന്ന കൈയ്യൊപ്പ് … “

♥ ♥ ♥ ♥ ♥ ♥ ♥ ♥ ♥ ♥ ♥ ♥

കണ്ണുകൾ തുറക്കാൻ വിസമ്മതം പ്രകടമാക്കിയിരുന്നു . കുറച്ചു നേരം കൂടെ അങ്ങനെ കിടക്കാൻ തോന്നിയിരുന്നു . എങ്കിലും വളരെ പ്രയാസപ്പെട്ട് കണ്ണ് തുറന്നു നോക്കുമ്പോൾ , ഗാഡമായ ഉറക്കത്തിലും നിന്നെ ഞാൻ ആർക്കും വിട്ടുകൊടുക്കില്ല എന്ന ഉപബോധ മനസ്സിലെ ചിന്തകളെ സത്യമാക്കുന്ന തരത്തിൽ കൈ കൊണ്ട് ആ നെഞ്ചോട് ചേർത്ത് പിടിച്ചു മുറുക്കി കിടക്കുന്നത് ആയിരുന്നു കണ്ടത്.

അതിൽ നിന്നും വിട്ടുമാറാൻ എന്റെ മനസ്സും അനുവദിച്ചിരുന്നില്ല . മാത്രമല്ല , ഒത്തിരി സന്തോഷം ആണ് മനസ്സിൽ തോന്നിയതും . അത് മറ്റൊന്നും കൊണ്ടായിരുന്നില്ല , ഉണർന്നു ഇരിക്കുമ്പോൾ മാത്രം അല്ല ഏത് ഉറക്കത്തിലും ഏതു അവസ്ഥയിലും  ഞാൻ ആ കരങ്ങളിലെന്നും സുരക്ഷിത ആയിരിക്കും എന്ന് ആ മനസ്സ് എന്നോട്  പറയാതെ പറഞ്ഞത് കൊണ്ട് ആയിരുന്നു .

വർഷങ്ങൾ ആയി അറിയുന്നുണ്ട് ഈ കരുതലും സ്നേഹവും , അപ്പോളൊക്കെ ഞങ്ങൾക്കിടയിൽ ശരീരങ്ങൾ തമ്മിലുള്ള അകലം എന്നും ഒരു വില്ലൻ ആയി തുടർന്നിരുന്നു . പക്ഷേ അതിനെ ഞങ്ങൾ മനസ്സുകൾ ഒന്നാക്കി കീഴടക്കിയിരുന്നു.