💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

അവൾ ഏങ്ങലോടെ പറഞ്ഞു കൊണ്ട് അവനെ പിടിച്ച് പുറകിലേയ്ക്ക് ആഞ്ഞ് തള്ളി ….. അവൻ പുറകിലേയ്ക്ക് മറിഞ്ഞ് നിലത്ത് വന്ന് വീണു . അവളുടെ ഓരോ വാക്കും അവന്റെ ഹൃദയത്തെ കീറി മുറിച്ചു …. സത്യാവസ്ഥ പറയാനുള്ള അവസരം പോലുമില്ല , ഇനി താൻ എന്ത് പറഞ്ഞാലും അവർ തന്നെ വിശ്വസിക്കില്ല എന്നവന് ഉറപ്പായി ….

അപ്പോഴേയ്ക്കും മഹേന്ദ്രനാഥ് അവിടേയ്ക്ക് വന്നു .. അയാളവന്റെ ഷർട്ടിൽ കുത്തിപ്പിടിച്ചു .

” നീ എന്റെ മോളെ ചതിക്കാൻ നോക്കും അല്ലേടാ …. നീ എങ്ങനെയാടാ ദേവന്റെ മകനായി പിറന്നത് …. കള്ള തെണ്ടിക്കൂട്ടങ്ങളുടെ കൂടെ അനാഥാലയത്തിലല്ലേ വളർന്നത് അതിന്റെ പിറപ്പ് കേട് കാണിക്കാതിരിക്കില്ലല്ലോ …. നിന്നെ കൊന്ന് തള്ളാൻ അറിയാൻ പാടില്ലാത്തോണ്ടല്ല , വളർത്തിയ കൈ കൊണ്ട് തന്നെ ജീവനെടുക്കരുതല്ലോ എന്ന് ചിന്തിച്ചിട്ടാ വെറുതെ വിടുന്നേ …. ഇനി നീ എന്റെ മോളുടെ കൺവെട്ടത്ത് വന്ന് പോകരുത് …. ഇറങ്ങിപ്പോടാ …. ”

അയാളതും പറഞ്ഞ് അവനെ അഞ്ഞ് തള്ളി …. വീഴാൻ പോയ അവൻ സ്റ്റെപ്പിനരികെ തൂണിലിടിച്ച് നിന്നു .. തന്റെ നിരപരാധിത്വം തെളിയിക്കാനാകാതെ അപമാന ഭാരവും പേറി ഒരു ചതിയനെപ്പോലെ അവൻ വീടിന് പുറത്തേയ്ക്ക് നടന്നു ….

” തെളിവുകൾ എല്ലാം എനിക്കെതിരാണ് , നിരപരാധിത്വം തെളിയിക്കാൻ ഒരു വഴി പോലും അവർ ബാക്കി വച്ചിട്ടില്ല . അത്രയ്ക്ക് പ്ലാൻ ചെയ്തുള്ള നീക്കം ….. ആരാണ് എന്നെ ചതിച്ചത് …. എന്തായാലും പ്രണവതിൽ ഉൾപ്പെട്ടിട്ടുണ്ട് , അവന്റെ പുറകിൽ മറ്റാരെങ്കിലും … ”