💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

അജു അഹാനയ്ക്കരികിലേയ്ക്ക് നടന്നു ….

” എന്താ ? നിങ്ങൾക്കൊക്കെ എന്താ പറ്റിയത് …. ? ”

അവനതും പറഞ്ഞ് അഹാനയുടെ കയ്യിൽ പതിയെ പിടിച്ചു …

” വിടെടാ … വിടെടാ എന്റെ കയ്യീന്ന് … ”

ദേഷ്യഭാവത്തിൽ ശബ്ദമുയർത്തി അവളവനോട് പറഞ്ഞു … ആ സ്വരവും അവളുടെ ഭാവമാറ്റവും കണ്ട് അവനറിയാതെ അവളുടെ കയ്യിലെ പിടി വിട്ട് ഒന്ന് പുറകിലേയ്ക്ക് നീങ്ങി …..

” അഹാനെ തനിക്ക് എന്താ പറ്റിയെ ….. ?എന്താ എല്ലാരും മറച്ച് വയ്ക്കുന്നേ …. എന്നോടൊന്ന് പറ …. ”

അജു നിറകണ്ണുകളോടെ പറഞ്ഞു …

” ഇനിയും നിന്നോട് ഞങ്ങൾ വിശദീകരിക്കണം അല്ലേടാ …. ”

യദു അതും പറഞ്ഞ് അവനെ ഷർട്ടിന്റെ കോളറിൽ പിടിച്ച് പുറകോട്ട് തള്ളി ചുവരിൽ കൊണ്ട് ചേർത്ത് നിർത്തി , എന്നിട്ട് കയ്യിലിരുന്ന ഫോൺ ഓണാക്കി ആ വീഡിയോ അവന് കാണിച്ചു കൊടുത്തു … ഒരു ഞെട്ടലോടെയാണ് അവനത് കണ്ടത് , നിന്ന സ്ഥലത്ത് തന്നെ ഒരു ശിലയായി മാറിയ പോലെ ….

” ഇത് പോരേ ടാ നിന്നെ മനസ്സിലാക്കാൻ……. നീ വല്ലാണ്ട് മാറിപ്പോയി … നന്നായി അഭിനിയിക്കാനും പഠിച്ചു …. കൂടെ നിന്ന എന്നെയും നീ പറ്റിച്ചു …. ഈ പാവം പിടിച്ച പെണ്ണിനെ ചതിക്കാൻ നിനക്കെങ്ങനെ മനസ്സ് വന്നെടാ …. ഒരു പെണ്ണിന്റെ മാനവും ജീവിതവും വച്ചിട്ട് പ്രതികാരം ചെയ്യാൻ മാത്രം നിന്റെ ഹൃദയം അത്രയ്ക്ക് കല്ലായിപ്പോയെന്ന് ഞാനറിഞ്ഞില്ല … ”

യദു സങ്കടവും ദേഷ്യവും കലർന്ന സ്വരത്തിൽ പറഞ്ഞു ….