💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

അവൻ വേഗം ബുള്ളറ്റിനടുത്തേയ്ക്ക് നടന്നു , ഇടയ്ക്ക് അവൻ വേച്ച് വീഴാൻ പോയി … ശരീരമാസകലം ഒരു തരം മരവിപ്പാണ് അവനനുഭവപ്പെട്ടത് , വലിഞ്ഞ് മുറുകുന്ന വേദനയും …. ഗേറ്റ് കടന്ന് അവൻ പുറത്തിറങ്ങി ഷർട്ടിന്റെ പോക്കറ്റിൽ നിന്ന് താക്കോൽ എടുത്ത് അവൻ വണ്ടി സ്റ്റാർട്ട് ചെയ്ത് മുന്നോട്ടെടുത്തു ….

                           …………………………

മഹേന്ദ്രനാഥിന്റെ വീട്ടിൽ ….

അഹാന കരഞ്ഞ് തളർന്ന് ദേവുവിന്റെ തോളിൽ ചാരി ഇരിക്കുകയാണ് …. ദേവു എന്തൊക്കെയോ പറഞ്ഞ് അവളെ ആശ്വസിപ്പിക്കാൻ ശ്രമിക്കുന്നു , പക്ഷെ അവൾ ഒരു തരം മരവിച്ച അവസ്ഥയിലായിരുന്നു , ആരോടും ഒന്നും സംസാരിക്കാതെ കണ്ണ് തുറന്നിരുന്ന് ഉറങ്ങുന്ന പോലെ ….. ഇതെല്ലാം നോക്കി സങ്കടത്തോടെ ചുവരിൽ ചാരി നിൽക്കുകയാണ് യദു ….

അജുവിന്റെ ബുള്ളറ്റ് വേഗത്തിൽ മഹേന്ദ്രനാഥിന്റെ വീടിന് മുന്നിൽ വന്ന് നിന്നു …. ശരീരം മുഴുവൻ തളർന്നിരിക്കുകയാണെങ്കിലും അവൻ വേഗം ബുള്ളറ്റിൽ നിന്നിറങ്ങി വീടിനകത്തേയ്ക്ക് ഓടി … അവൻ നേരെ ഓടി കയറിയത് അഹാനയുടെ റൂമിലേയ്ക്കാണ് ….

അവൻ നോക്കുമ്പോൾ അഹാന കരഞ്ഞ് തളർന്ന് ദേവുവിന്റെ തോളിൽ ചാരി ഇരിക്കുന്നു , തൊട്ടടുത്തായി യദുവും നിൽപ്പുണ്ട് .

” എന്താ ….. ? ”

അവൻ ഭയത്തോടെ ചോദിച്ചു …. ആ ശബ്ദം കേട്ടപ്പോഴാണ് അവർ മുഖമുയർത്തി നോക്കിയത് …. റൂമിന്റെ ഡോറിനടുത്തായി അജു നിൽക്കുന്നു .

അവനെ കണ്ടതും യദു മുന്നിലേയ്ക്ക് വന്ന് കൈ വീശി അവന്റെ കരണം നോക്കി ഒന്ന് പൊട്ടിച്ചു … അജു അറിയാതെ തന്റെ കൈ കവളിൽ വച്ച് പോയി ….

” എന്താടാ ….. നീ എന്തിനാ എന്നെ തല്ലിയേ …. ?”

ഒന്നും മനസ്സിലാവാത്ത ഭാവത്തിൽ അജു ചോദിച്ചു , പക്ഷെ യദു മറുപടിയൊന്നും പറയാതെ അവനെ ദേഷ്യത്തിൽ നോക്കി നിൽക്കുകയാണ് ചെയ്തത് .