💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

യദു സ്വരം കടുപ്പിച്ച് അത്രയും പറഞ്ഞ ശേഷം അവിടുന്ന് എണീറ്റ് റൂമിലേയ്ക്ക് നടന്നു . എല്ലാം കേട്ട് ശേഷം നിറകണ്ണുകളോടെ ഇരുന്ന അജുവിന്റെ മുഖത്ത് വന്നത് ഒരു നേർത്ത പുഞ്ചിരിയായിരുന്നു , എല്ലാം നഷ്ടമായവന്റെ പുഞ്ചിരി , ഒരു പരാജിതന്റെ പുഞ്ചിരി .

അജു എണീറ്റ് നേരെ ടെറസ്സിലേയ്ക്കുള്ള പടികൾ കയറി …. മഴ കൊണ്ട് നനവാർന്ന നിലത്തിരുന്ന് അവൻ ആകാശത്തേയ്ക്ക് നോക്കി , ഒന്ന് പൊട്ടിക്കരയാൻ പോലും സാധിക്കാതെ ….

                      ********************

ആ ക്ലാസ്സ് റൂമിലെ ലാസ്റ്റ് ബെഞ്ചിലിരുന്ന് അജു തന്റെ പഴയ കാലം മനസ്സിൽ ഓർത്തു ….. വീണ്ടും അറിയാതെ അവന്റെ നോട്ടം പോയത് തൊട്ടപ്പുത്തെ ആ ബെഞ്ചിലേക്കായിരുന്നു . അറിയാതെ കണ്ണുകളിൽ നിറഞ്ഞ കണ്ണുനീർ അവൻ വിരലുകൾ കൊണ്ട് തുടയ്ച്ച മാറ്റി …. അപ്പോഴേയ്ക്കും യദു പുറത്ത് നിന്ന് ക്ലാസ്സിനകത്തേയ്ക്ക് കയറി വന്നു ശേഷം
അവന്റെ അടുത്തായി വന്നിരുന്നു ….

” അന്ന് മനസ്സിൽ തോന്നിയ സങ്കടവും ദേഷ്യവും കാരണം ഞാൻ എന്തൊക്കെയോ നിന്നോട് പറഞ്ഞു , വീട്ടിൽ നിന്ന് ഇറങ്ങി പോകാൻ പോലും ….. പിറ്റേന്ന് രാവിലെ ഉറക്കമെണീറ്റ ശേഷം ഞാൻ നിന്നെ അവിടെ മുഴുവൻ തിരഞ്ഞു , പക്ഷെ കണ്ടില്ല . തുണിയോ ഫോണോ പേഴ്സോ വണ്ടിയോ ഒന്നും എടുക്കാതെ എല്ലാം അവിടെ തന്നെ ഉപേക്ഷിച്ച് ആ രാത്രി നീ എവിടെയോ പോയി മറഞ്ഞു … എനിക്ക് എന്ത് ചെയ്യാൻ കഴിയും , പറ്റുന്ന പോലെയൊക്കെ അന്വേഷിച്ചു . പിന്നീടങ്ങോട്ട് ഭയമായിരുന്നു നീ അരുതാത്തത് വല്ലതും ചെയ്ത് കാണുമോ എന്ന് …. നാളുകൾ കഴിഞ്ഞപ്പൊ മനസ്സിൽ ഒരാശ്വാസം തോന്നി . ”

യദു ദൂരേയ്ക്ക് നോക്കിയിരുന്നു കൊണ്ട് പറഞ്ഞു , അജു മറുപടിയൊന്നും പറയാതെ ഒരു പുഞ്ചിരിയോടെ അവനെ നോക്കി ….

” നീ എവിടെയായിരുന്നു ഇത്രയും നാൾ , അതും ഏഴെട്ട് വർഷം ”

യദു അവനോട് ചോദിച്ചു ….