💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

അപ്പോഴേയ്ക്കും മഹേന്ദ്രനാഥിന്റെ കാറ് പുറത്ത് വന്നു നിന്നു …. അയാൾ കാറിൽ നിന്നിറങ്ങി വീടിനകത്തേയ്ക്ക് കയറി ….

” ആ അജു ….. ”

അയാൾ സന്തോഷത്തോടെ വിളിച്ചു …. അവർ രണ്ട് പേരും ഒരേ നിറത്തിലെ ഡ്രെസ്സൊക്കെ ധരിച്ച് നിൽക്കുന്നത് കണ്ടതും അയാളും ഒരു നിമിഷം അവരെ രണ്ട് പേരെയും നോക്കി നിന്നു .

” അങ്കിളെ …. ഞങ്ങളൊന്ന് പുറത്ത് പോയിട്ട് വരാം …. ”

അജു മഹേന്ദ്രനാഥിനോട് അനുവാദം ചോദിച്ചു …

” മ് … ശരി …. അധികം വൈകരുത് … ”

” ഇല്ല അങ്കിളെ …. ഉച്ചയ്ക്ക് മുൻപ് മടങ്ങി എത്തിക്കോളാം …. ”

മഹേന്ദ്രനാഥിനോട് പറഞ്ഞ ശേഷം അഹാനയെയും കൂട്ടി അജു പുറത്തേയ്ക്കിറങ്ങി .
അവൻ ബുള്ളറ്റ് സ്റ്റാർട്ട് ചെയ്തതും അവൾ പുറകിൽ കയറി അവന്റെ തോളിൽ കൈ പിടിച്ചിരുന്നു , അപ്പോഴേയ്ക്കും അവൻ വണ്ടി മുന്നോട്ടെടുത്തു …..

” ഇന്നലെ വിളിച്ചപ്പൊ പോലും പറഞ്ഞില്ലല്ലോ ഇങ്ങനെ ഒരു യാത്രയുടെ കാര്യം …. എവിടേയ്ക്കാ നമ്മളിപ്പോൾ പോകുന്നേ …..? ”

ആകാംഷയോടെ അവൾ വീണ്ടും ചോദിച്ചു …..

” അത് അവിടെ എത്തുമ്പോൾ തനിക്ക് മനസ്സിലാകും …. നാളെത്തൊട്ട് താൻ വീണ്ടും കോളേജിൽ പോയി തുടങ്ങുവല്ലേ , അപ്പൊ അതിന് മുൻപ് എനിക്ക് ഒരു കാര്യം ചെയ്ത് തീർക്കാനുണ്ട് , ഒരു ചെറിയ കടം …. ”

ഒരു പുഞ്ചിരിയോടെ അവനവളോട് പറഞ്ഞു …. അവൾക്ക് ഒന്നും മനസ്സിലായില്ല … അവൾ അവന്റെ വയറിലൂടെ കൈ ചുറ്റിപ്പിടിച്ച് ചേർന്നിരുന്നു ….