💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

ഹോസ്പിറ്റലിലെ ചെക്കപ്പിൽ നിന്ന് അഹാന ഇപ്പോൾ പൂർണമായും ഓക്കെയാണെന്ന വാർത്ത എല്ലാവർക്കും സന്തോഷം നൽകി …. തലയിലെ സ്റ്റിച്ച് ഒക്കെ മാറ്റിയിരുന്നു .. അവൾ പൂർണ്ണമായും പഴയ അഹാനയായിക്കഴിഞ്ഞിരുന്നു .

ആ കഴിഞ്ഞുപോയ അഞ്ചാറു മാസങ്ങൾ അഞ്ചാറു യുഗം പോലെ എണ്ണി തീർത്ത മറ്റൊരാൾ കൂടി ഉണ്ടായിരുന്നു , നിവേദ് …. ഉള്ളിലെ പകയും ദേഷ്യവും കെടാത്ത കനൽ പോലെ അവൻ സൂക്ഷിച്ചു . അവന് കൂട്ടായി അവന്റെ അച്ഛൻ അനിരുദ്ധനും . ഈ കഴിഞ്ഞ മാസങ്ങൾ കൊണ്ട് തന്നെ നിവേദും പഴയ സ്ഥിതിയിലേയ്ക്ക് മടങ്ങി വന്നിരുന്നു . അവന്റെ ശരീരത്തിൽ പറ്റിയിരുന്ന എല്ലാ പരിക്കുകളും ഭേദമായി കഴിഞ്ഞിരുന്നു , പണ്ടത്തേതിനെക്കാൾ ശക്തനായത് പോലെ …..

                           …………………………

ഒരു ദിവസം രാവിലെ ……

കോളിങ് ബെല്ലിന്റെ മുഴക്കം കേട്ട് അഹാന വീടിന്റെ മുന്നിലെ ഡോറ് തുറന്നു …..

” ആഹാ ….. ഇതാര് ? ഇന്നെന്താ ഇതുവരെ ഇല്ലാതെ ഒരു പുതിയ വേഷത്തിൽ , എന്തായാലും ഇപ്പൊ കുറച്ച് കൂടി സുന്ദരനായിട്ടുണ്ട് ….. ”

പുതിയ കസവ് മുണ്ടും ചുവന്ന കളർ പ്ലെയിൻ ഷർട്ടുമൊക്കെ ധരിച്ച് തന്റെ മുന്നിൽ നിൽക്കുന്ന അജുവിനെ കണ്ടതും ഒരൽഭുതത്തോടെ അവൾ പറഞ്ഞു …..

” എങ്ങനെയുണ്ട് ? ”

ഒരു പുഞ്ചിരിയോടെ അവൻ ചോദിച്ചു ….

” കൊള്ളാം പക്ഷെ ഇത്രേം ഒരുങ്ങി നടക്കണ്ട … ”

ഒരു കുസൃതിയോടെ അവൾ പറഞ്ഞു ….