✮കൽക്കി࿐ (ഭാഗം – 20 ) വിച്ചു [ചെകുത്താനെ സ്നേഹിച്ച മാലാഖ ] 894

ആത്രേയൻ അത്രയും പറഞ്ഞ ശേഷം ചക്രപാണിയുടെ കഴുത്തിലെ പിടിവിട്ടു , ഉടനെ തന്നെ അയാൾ നിലത്തേയ്ക്ക് വീണ് ചുമയ്ക്കാൻ തുടങ്ങി . ചക്രപാണിയുടെ കണ്ണുകൾ ഭയം കൊണ്ട് വിടർന്നിരുന്നു , ആ കണ്ണുകളിലൂടെ സങ്കടം അണപൊട്ടി ഒഴുകി . ചെകുത്താനും കടലിനും ഇടയിൽ പെട്ട അവസ്ഥ , ഒടുവിൽ തന്റെ ദൗർബല്യത്തിന് മുന്നിൽ അയാൾക്ക് മുട്ട് മടക്കേണ്ടി വന്നു , തന്റെ സ്വന്തം മകളുടെ ജീവന് വേണ്ടി അയാൾ ആ കടും കൈ ചെയ്യാൻ തീരുമാനിച്ചു ….

ശരീരത്തിൽ വലിച്ച് കയറ്റി വച്ച വലിയ ഒരു ഭാരം പോലെ അയാൾ ആ വിഷ മരുന്നും വാങ്ങി അവിടെ നിന്ന് യാത്ര തിരിച്ചു , മനസ്സ് നുറുങ്ങുന്ന വേദനയോടെ …

                    ……………………..

ബാബയുടെ വീട് …..

” ടാ …. നീ ഞങ്ങളെ കുറിച്ച് ചിന്തിച്ചിട്ടാണോ ഇങ്ങനെ ഓരോ പ്രശ്നത്തിലേക്കെടുത്ത് ചാടുന്നേ …. ആ കാട്ട് പോത്ത് നിന്നെ എന്തെങ്കിലും ചെയ്തിരുന്നെങ്കിൽ എനിക്ക് പിന്നെ ആരാ… ? ”

ജാനകി അതും പറഞ്ഞ് സ്വയം നെഞ്ചിൽ കൈവച്ചു ….

” അമ്മയെപ്പോലത്തെ മറ്റൊരു അമ്മയുടെ നിലവിളിയും കണ്ണുനീരും കണ്ടപ്പോ എടുത്ത് ചാടിപ്പോയതാ ….. അല്ലാതെ എന്റെ അമ്മയെ വിട്ട് ഞാനെവിടെപ്പോകാനാ , ആ കാട്ടുപോത്ത് ഒരു പാവമാ , ആരൊക്കെയോ ചേർന്ന് അതിനെ കാട്ടിൽ നിന്ന് പിടിച്ചോണ്ട് വന്നതിന്റെ ദേഷ്യം എന്നോട് കാട്ടിയെന്നല്ലാതെ …. ”

നരസിംഹൻ തന്റെ അമ്മയുടെ മടിയിൽ തല വെച്ച് കിടന്നുകൊണ്ട് ഒരു പുഞ്ചിരിയോടെ പറഞ്ഞു , അവരവന്റെ നെറ്റിയിലൂടെ തലമുടി തഴുകിക്കോണ്ടിരുന്നു .
അപ്പോഴേക്കും ആര്യൻ അവിടേയ്ക്ക് കയറി വന്നു ….