✮കൽക്കി࿐ (ഭാഗം – 20 ) വിച്ചു [ചെകുത്താനെ സ്നേഹിച്ച മാലാഖ ] 893

” മ് ….. ഹ് …. ഹ് …… ”

ഒരു ചിന്നം വിളിയോടെ മുൻ കാലുകളുയർത്തി ഉയർന്ന് പൊങ്ങിയ ശേഷം കർണൻ വേഗത്തിൽ തിരിഞ്ഞു ആ കാട്ടുപോത്തിന് നേരെ ….

കാണികളുടെ ആരവവും ആർപ്പ് വിളിയും ഒന്ന് കൂടി ശക്തമായി . ആ കാട്ടുപോത്തും കർണ്ണനും നേർക്ക് നേർ ഓടിയടുത്തു അതും വളരെ വേഗത്തിൽ , തൊട്ട് മുന്നിലെത്തിയതും കർണന്റെ കടിഞ്ഞാണിൽ പിടിച്ച് നരസിംഹൻ അവന്റെ ദിശ മാറ്റിയ ശേഷം അവന്റെ പുറത്ത് നിന്ന് ആ കാട്ടുപോത്തിന്റെ പുറത്തേയ്ക്ക് ചാടി .

ആ കാട്ടുപോത്തിന്റെ മുതുകിലേക്ക് വീണ നരസിംഹൻ നിയന്ത്രണം തെറ്റി നിലത്തേയ്ക്ക് വീഴാൻ പോയെങ്കിലും അതിന്റെ ഒരു കൊമ്പിൽ പിടിത്തമിട്ട് അവൻ തൂങ്ങി നിന്നു …. അത് അവനെയും വലിച്ചിഴച്ച് മുന്നോട്ട് നീങ്ങിക്കൊണ്ടിരിക്കുകയാണ് , അവൻ തന്റെ വലത് കൈ ഉയർത്തി നീട്ടിയതും മറ്റെക്കൊമ്പിൽ കൂടി പിടിത്തം കിട്ടിയതും ഒരുമിച്ചായിരുന്നു . ആ നിമിഷം തന്നെ അവൻ വേഗത്തിൽ അതിന്റെ മുകളിലേക്ക് ചാടിക്കയറി കഴുത്തിലൂടെ കയ്യിട്ട് ലോക്ക് ചെയ്ത് അതിന്റെ ശരീരത്തോട് പറ്റിച്ചേർന്ന് കിടന്നു , നിയന്ത്രണം നഷ്ടമാവാതിരിക്കാൻ ….

തന്റെ പുറത്ത് കയറിയ ശത്രുവിനെ നിലത്തേയ്ക്ക് വലിച്ചെറിയുവാനായി ആ കാട്ടുപോത്ത് പല വഴികളും നോക്കി …. ഉയർന്ന് ചാടാനും തന്റെ ശരീരമിളക്കി വേഗത്തിലോടാനും തല ചരിച്ച് കൊമ്പിൽ കോർക്കാനും അങ്ങനെ പല തരത്തിൽ , പക്ഷെ നരസിംഹൻ അതിന്റെ കഴുത്തിലെ പിടിത്തം വിടാതെ അത് ഒന്നുകൂടി ശക്തമായി മുറുകെ പിടിച്ചു .