✮കൽക്കി࿐ (ഭാഗം – 20 ) വിച്ചു [ചെകുത്താനെ സ്നേഹിച്ച മാലാഖ ] 894

” ടാ നീ എന്ത് ചിന്തിച്ച് സ്വപ്നം കണ്ട് നിക്കുവാ … നല്ല തിരക്കാ , പുറം ദേശത്ത് നിന്ന് ഒത്തിരി പേർ വന്നിട്ടുണ്ടെന്ന് തോന്നുന്നു , കാഴ്ചക്കാർ ഇരിക്കുന്നിടത്ത് കയറാൻ പറ്റുമോ എന്ന് പോലും സംശയമാ … ”

ആര്യനത് ചോദിച്ചപ്പോഴാണ് നരസിംഹൻ ചിന്തയിൽ നിന്നുണർന്നത് … ഒരു പാട് സമയത്തെ പ്രയത്നത്തിന് ശേഷം തിരക്കിനിടയിലൂടെ അവർ മുന്നിലേയ്ക്ക് പോയെങ്കിലും മത്സരക്കളത്തിന് മുകളിലേക്കുളള പ്രവേശനം അടച്ചിരുന്നു താഴെയായി പടയാളികളും നിൽപ്പുണ്ട് , മുകളിലേക്ക് പോകാൻ അവർ സമ്മതിക്കുകയുമില്ല . താഴെ നിന്നാൽ മത്സരം കാണാം പക്ഷെ അതല്ല പ്രധാനം അവളെ എങ്ങനെയും ഒരു നോക്ക് കാണണം , പക്ഷെ താഴെ നിന്നാൽ മുകളിൽ പ്രത്യേകം നിർമ്മിച്ചിരിക്കുന്ന സ്ഥലത്തിരിക്കുന്ന അവളെ കാണാനും പറ്റില്ല . ഒന്നുകിൽ പടയാളികള മറികടന്ന് മുകളിൽ കയറണം ഇല്ലെങ്കിൽ കളിക്കളത്തിന് നടുവിലേയ്ക്ക് ഇതിലൊന്ന് മാത്രമാണ് മാർഗം .

” ടാ നീ ഇവിടെ നിൽക്ക് ഞാനിപ്പൊ വരാം … ”

ആര്യനോടതും പറഞ്ഞ് അവനെ അവിടെ നിർത്തിയ ശേഷം നരസിംഹൻ തിരക്കിൽ നിന്ന് പുറത്തേയ്ക്ക് കടന്നു , ഇതിനോടകം മത്സരങ്ങൾ തുടങ്ങിക്കഴിഞ്ഞിരുന്നു ..

പുറത്തിറങ്ങിയ അവൻ ചുറ്റിലും നോക്കി പക്ഷെ ഒരു വഴിയുമില്ല …..

” മ് …. ഹാ……. ”

അപ്പോഴേക്കും കർണൻ ശബ്ദം മുഴക്കിക്കൊണ്ട് അവന്റെ അടുത്തേയ്ക്ക് ഓടിയടുത്തു …. അത് കണ്ടതും അവന്റെ മുഖത്ത് ഒരു പുഞ്ചിരി വിടർന്നു ….