✮കൽക്കി࿐ (ഭാഗം – 20 ) വിച്ചു [ചെകുത്താനെ സ്നേഹിച്ച മാലാഖ ] 894

                    ……………………..

അന്ന് ആ മനയിൽ നിന്നിറങ്ങിയ ശേഷം ചക്രപാണിയുടെ മനസ്സിൽ ഒരു തരം യുദ്ധമായിരുന്നു , നന്മയും തിന്മയും തമ്മിലുള്ള യുദ്ധം …. ഒടുവിൽ ആ യുദ്ധത്തിൽ തിന്മ തന്നെ ജയിച്ചു . ആ പച്ചില മരുന്ന് കുമാരിയുടെ ഭക്ഷണത്തിൽ ചേർക്കാൻ അയാൾ സ്വയം മനസ്സുകൊണ്ട് ഒരുങ്ങി . ആരും അറിയാതെ അയാൾ അത് സ്വന്തം കൈ കൊണ്ട് ചെയ്യുകയും ചെയ്തു ….

                    ……………………..

അടുത്ത ദിവസം .

വൈകുണ്ഡ പുരിയിലെ വിഷ്ണു നാരായണ ക്ഷേത്രത്തിലെ ഉത്സവത്തിന്റെ അവസാന ദിവസം , മത്സരത്തിന്റെ മൂന്നാമത്തതും അവസാനത്തേതുമായ ദിവസം ….

നരസിംഹനും ആര്യനും നേരത്തെ തന്നെ ആ കളിക്കളത്തിനടുത്തെത്തിയെങ്കിലും അതിന് മുന്നേ അവിടെ മുഴുവൻ ജനസമുദ്രമായിക്കഴിഞ്ഞിരുന്നു ….

തിക്കിയും തിരക്കിയും കളിക്കളത്തിനടുത്തേയ്ക്ക് നടക്കുന്ന സമയത്താണ് പെട്ടെന്ന് പ്രധാന വീഥിയിൽ പടയാളികൾ നിരന്നത് … അതു കണ്ട നരസിംഹൻ വേഗം മുന്നിലേയ്ക്ക് നോക്കി …. കുതിരപ്പടയുടെ അകമ്പടിയോടെ വരുന്ന രണ്ട് കുതിര വണ്ടികൾ , അതിനുചുറ്റും അംഗരക്ഷകർ ….

അവന്റെ ഹൃദയം വല്ലാതെ മിടിക്കുകയാണ് , ഉള്ളിലാണെങ്കിൽ എങ്ങനെയും അവളെ കാണണമെന്ന ആഗ്രഹം മാത്രം …. വർഷങ്ങളുടെ കാത്തിരിപ്പാണ് , അന്ന് കണ്ട മുഖമായിരിക്കില്ല മാറിയിട്ടുണ്ടാകും പക്ഷെ ഉള്ളിൽ ഇപ്പോഴും ആ പഴയ മുഖമാണ് …

മനസ്സിൽ ഓരോന്ന് ചിന്തിച്ച് കൂട്ടി അവനങ്ങനെ നിശ്ചലനായി നിന്നു പോയി അതേ സമയം തന്നെ ആ കുതിര വണ്ടികൾ അവരെയും താണ്ടി മത്സരക്കളത്തിനടുത്തേയ്ക്ക് പോയിക്കഴിഞ്ഞിരുന്നു ….