ഹൃദയരാഗം 20 [Achu Siva] 702

വാസുകി പതിയെ നെറ്റിയിൽ ഒക്കെ തടവി കൊണ്ടു വയ്യാത്തത് പോലെ അവിടെ നിന്നും എഴുന്നേറ്റു …

“ഹേയ് അത്രക്കൊന്നും കുഴപ്പമില്ല മിസ്സ് ..ചെറിയ ഒരു തലവേദ….പറഞ്ഞു തീരും മുൻപേ അവൾ തല കറങ്ങി വീഴാൻ പോകുന്നത് പോലെ നന്നായി ആക്ട് ചെയ്തു …അടുത്തിരുന്ന അഞ്ജന അവളെ താങ്ങി പിടിച്ചു …അഞ്ജനയുടെ തോളിൽ കിടന്നു കൊണ്ടു വാസുകി ഗീതുവിനെ ഒറ്റ കണ്ണ് തുറന്നു നോക്കി …പെട്ടന്നു കണ്ണടച്ചു ..

“കല്യാണം കഴിഞ്ഞതിന്റെ തലകറക്കം ആയിരിക്കും” …ബോയ്‌സിന്റെ ഭാഗത്തു നിന്നും ഏതോ ഒരുത്തൻ വിളിച്ചു പറഞ്ഞു ..

അത് കേട്ട് അവിടെ ഒരു കൂട്ട ചിരി ഉയർന്നു ..

“സൈലെൻസ് പ്ലീസ് “…മിസ്സ് ഡെസ്കിൽ തട്ടി  ദേഷ്യത്തോടെ പറഞ്ഞു ..

അതോടെ ക്ലാസ്സ്‌ നിശ്ശബ്ദം ആയി ..

“ഗീതു വെള്ളം ഇങ്ങെടുക്ക്” ..

ഗീതു ബാഗിൽ നിന്നും ബോട്ടിൽ എടുത്ത് മിസ്സിന്റെ കൈയിൽ കൊടുത്തു .അവർ അത് വാസുകിയുടെ മുഖത്ത് തളിച്ചു .

അവൾ ഒട്ടും വയ്യാത്തത് പോലെ പ്രയാസപ്പെട്ട് കണ്ണുകൾ തുറന്നു ..

“ഇപ്പോൾ എങ്ങനെയുണ്ട് വാസുകി ?

ഇപ്പോൾ കുറച്ചു കുറവുണ്ട് മിസ്സ് എങ്കിലും നല്ല തലവേദന .

“ഓക്കേ ,ഗീതു ,അഞ്ജന ..നിങ്ങൾ വാസുകിയെയും കൂട്ടി സ്റ്റാഫ്‌ റൂമിലേക്ക് ചെല്ല്. വീട്ടിൽ വിളിച്ചു അറിയിക്കാം ….വയ്യെങ്കിൽ ഇന്നിനി ക്ലാസ്സിൽ ഇരിക്കേണ്ട “…

കേൾക്കേണ്ട താമസം രണ്ടും കൂടി അവളെ താങ്ങി പിടിച്ചു കൊണ്ടു പുറത്തേക്ക് പോയി …