മാന്ത്രികലോകം 10 [Cyril] 2190

“അപ്പോ നിഗൂഢ ശക്തിയെ പൂര്‍ണമായി മനസിലാക്കാൻ കഴിഞ്ഞത് കൊണ്ടാണോ ഒഷേദ്രസ് ഇത്രത്തോളം ശക്തനായത്…?” ദനീർ ചോദിച്ചു.

കസേരയില്‍ നിന്നും മെല്ലെ എഴുനേറ്റ് നിന്നുകൊണ്ട് ഫ്രെൻ പിന്നെയും ചിരിച്ചു…. പക്ഷേ ഇപ്പോൾ ആ ചിരിയില്‍ ക്രോധം ഉണ്ടായിരുന്നു — “ഒഷേദ്രസ്” എന്ന പേര് കേട്ടതും ഒഷേദ്രസിനോടുള്ള വെറുപ്പ് അവന്റെ കണ്ണില്‍ കത്തിയെരിഞ്ഞു…

ഒരു സെക്കന്റ് നേരത്തേക്ക് അവന്റെ രണ്ട് കൃഷ്ണമണികളും സ്വര്‍ണ്ണ നിറമായി മാറി. ഒരു കണ്ണിന് കടല്‍ പച്ച നിറവും മറ്റെ കണ്ണിന് നീല നിറവും പടർന്നു പിടിച്ചു… അതോടെ അവന്റെ ശരീരത്തിൽ നിന്നും അതികഠിനമായ താപവും ഉയരാൻ തുടങ്ങി.

പെട്ടന്ന് ഞങ്ങളും എഴുനേറ്റ് നിന്നു…

ആ ചൂടിന്‍റെ കാഠിന്യം ഞങ്ങൾക്ക് അസഹനീയമായി മാറാൻ തുടങ്ങി.. ഞങ്ങളുടെ വസ്ത്രങ്ങളും ശരീരവും കത്തിയെരിയുമെന്നു തോന്നിയ ആ നിമിഷത്തില്‍ ഞങ്ങൾ എല്ലാവരും അവന്റെ അടുത്തുനിന്ന് ധൃതിയില്‍ അകന്നുമാറി.

അഗ്നിയും ഉജ്ജ്വലയും പോലും എഴുന്നേറ്റ് മുറിയുടെ ഒരു അറ്റത്ത് പോയി നിന്നു.

“നിഗൂഢ ശക്തിയെ പൂര്‍ണമായി മനസ്സിലാക്കിയിരുന്നു വെങ്കിൽ ഒഷേദ്രസ് പണ്ടേ ഈ പ്രപഞ്ചത്തെ തന്റെ കാല്‍ കീഴില്‍ കൊണ്ടു വരുമായിരുന്നു. നിഗൂഢ ശക്തിയെ പൂര്‍ണമായി മനസിലാക്കിയാൽ പ്രകൃതിയെ പോലും നിയന്ത്രിക്കാൻ കഴിയും എന്നറിയുക…, ദൈവങ്ങളെ പോലും ഒഷേദ്രസിന് കൊല്ലാനും കഴിയുമായിരുന്നു..

നമ്മുടെ നിഗൂഢ ശക്തിയുടെ അഗാധമായ രഹസ്യ നിയമത്തില്‍ ഒഷേദ്രസിനെ പോലും വധിക്കാനുള്ള മാര്‍ഗ്ഗം അടങ്ങിയിരിക്കുന്നു എന്നാണ് എന്റെ വിശ്വസം…. പക്ഷേ ആ അറിവ് അത്ര നിസ്സാരമായി നമുക്ക് ലഭിക്കില്ല എന്നാണ്‌ എന്റെ മറ്റൊരു വിശ്വസം… കാരണം ആ രഹസ്യം മനസിലാക്കണം എങ്കിൽ ആദ്യം നമുക്ക് ഒഷേദ്രസിന്റെ പൂര്‍ണ്ണമായ ശക്തിയുടെ മുഴുവന്‍ വിവരങ്ങളും മനസ്സിലാക്കേണ്ടി വരും…. അത് സാധ്യമായാൽ നമുക്ക് വേണ്ടുന്ന രഹസ്യത്തിന്‍റെ ചുരുള്‍ നമ്മുടെ നിഗൂഢ ശക്തിയില്‍ നിന്നും നമുക്ക് മനസിലാക്കാന്‍ കഴിയും…. അങ്ങനെ ഒഷേദ്രസിനെ വധിക്കാനുള്ള മാര്‍ഗ്ഗം മനസ്സിലാക്കാൻ കഴിഞ്ഞാല്‍ അതിനെ എങ്ങനെ പ്രാവര്‍ത്തികമാക്കാന്‍ കഴിയുമെന്ന അറിവും നമ്മുടെ നിഗൂഢ ശക്തിയില്‍ നിന്നും ലഭിക്കും…” അത്രയും പറഞ്ഞിട്ട് ഫ്രെൻ സ്വയം മറന്നത് പോലെ അവന്റെ മുറിയുടെ ചുവരില്‍ തറപ്പിച്ചു നോക്കി നിന്നു.

അവന്റെ രണ്ട് കണ്ണുകളും ഇപ്പോൾ പച്ച നിറത്തില്‍ കത്തി ജ്വലിക്കുന്നത് പോലെ ഞങ്ങൾക്ക് തോന്നി…

ഒരു പരിധി വരെ ഉയർന്ന താപത്തെ പോലും തഴയാൻ കെൽപ്പുള്ള ഞങ്ങളുടെ മാന്ത്രിക വസ്ത്രങ്ങൾ പോലും ചെറുതായി പുകയാൻ തുടങ്ങിയിരുന്നു…

അവന്‍ ഞങ്ങളെ ആക്രമിക്കാൻ ഒരുങ്ങുകയാണോ എന്നു പോലും ഞങ്ങൾ ഭയന്നു.

ഞങ്ങൾ ഒരു അടി പിന്നോട്ട് വെച്ചു…. എല്ലാ മുഖങ്ങളിലും ആശങ്ക പടർന്നിരുന്നു.

അവനില്‍ നിന്നും താപത്തിന്‍റെ അളവ് പിന്നെയും വര്‍ദ്ധിച്ചു കൊണ്ടിരുന്നു…. ഇനി ഒഷേദ്രസിന്റെ ശക്തി അവന്റെ മനസ്സിനെ കീഴ്പ്പെടുത്താൻ ശ്രമിക്കുന്നത് കൊണ്ടാണോ അവനില്‍ ഈ മാറ്റങ്ങൾ സംഭവിക്കുന്നത്…? ഞാൻ ഭയന്നു.

“ഫ്രെൻ…..”