താമര മോതിരം ഭാഗം-14 [Dragon] 279

മനസിന് സന്തോഷം ഉണ്ടാക്കുന്ന ആ ഗന്ധം മൂക്കിലേക്ക് അടിച്ചു കയറിയപ്പോൾ എല്ലാപേരുടെയും മുഖത്ത് ഒരു ചിരി വിടർന്നു.

വൈദ്യർ ആ കുടത്തിന്റെ ഉള്ളിലേക്ക് കൈ കടത്തി അതിൽ നിന്നും എണ്ണയിൽ കുതിർത്ത ഒരു പരുത്തിത്തുണി എടുത്തു.

വളരെ നീളം ഉള്ള ആ തുണി പുറത്തെ വെളിച്ചത്തിൽ  സ്വർണ വർണ്ണത്തിൽ  തിളങ്ങി

ആ തുണിയിൽ വർഷങ്ങളായി കുതിർന്നു ഇരുന്ന ആയുർവേദത്തിന്റെ ശക്തിയായ ഔഷധക്കൂട്ടുകളുടെ പ്രതിഫലനമാണ് ആ തുണിയെ സ്വർണ വർണമായി മാറ്റിയത്.

തുണിയുടെ ഒരു അറ്റം പുറത്തേക്കു എടുത്ത വൈദ്യർ അത് ഉപയോഗിച്ച്  ഉണ്ണിയുടെ കാലിൽ  ചുറ്റി കെട്ടാൻ  തുടങ്ങി – ശിഷ്യർ സഹായിച്ചു ഉണ്ണിയെ പൊക്കി കിടത്താനും ചരിച്ചു കിടത്താനും മറ്റും

ഇപ്പോൾ ഉണ്ണിയുടെ ശരീരത്തിൽ ഉണ്ടായിരുന്ന ചെറിയ വസ്ത്രം ശിഷ്യർ എടുത്തു മാറ്റിയിരുന്നു.

വയറുവരെ ഒരു തവണ ചുറ്റി കഴിഞ്ഞിരുന്നു ഉണ്ണിയെ ആ തുണി ഉപയോഗിച്ച്

– കുറച്ചു സമയം കൊണ്ട് തന്നെ കഴുത്തു കഴിഞ്ഞു  തലയിലേക്ക് കടന്നു – ശ്വസിക്കുവാൻ മൂക്കിന്റെ ഭാഗത്തു ചെറിയൊരു വിടവ് ഒഴിച്ച് രണ്ടു തവണ ആ തുണി  ഉപയോഗിച്ച് ശരീരം മുഴുവൻ ചുറ്റി എടുത്തു വൈദ്യർ.

ഇപ്പോൾ കണ്ടാൽ ഒരു മൃതദേഹം വെള്ള തുണി ഉപയോഗിച്ച് കെട്ടിയിരിക്കുന്നത് പോലെ തന്നെ തോന്നിച്ചു.

ശേഷം വൈദ്യരുടെ നിർദ്ദേശ പ്രകാരം ഉണ്ണിയെ എടുത്തു  എണ്ണ പാത്തിയിൽ കിടത്തി ശിഷ്യർ

ശേഷം ആ  കുടത്തിൽ അവശേഷിച്ചിരുന്ന എണ്ണ ഉണ്ണിയുടെ ശരീരത്തിലേക്ക് പുറത്തുകൂടെ ധാര കോരാൻ ശിഷ്യരെ ഏർപ്പാടാക്കി ആ മുറിയിൽ നിന്ന് പുറത്തേക്കു പോയി വൈദ്യർ.

ഇനി രണ്ടു പകലും രണ്ടു രാത്രിയും കഴിഞ്ഞു മാത്രമേ ആ തുണിയിൽ നിന്നും ഉണ്ണിയെ പുറത്തേക്കു എടുക്കുകയുള്ളു –

അത് വരെ ഒരു ഇളക്കവും തട്ടാതെ ഉണ്ടാകും ആ ശരീരം –