Wonder 4 [Nikila] 2478

ഇതു പറയുമ്പോൾ മിഖിയുടെ കണ്ണ് കലങ്ങുന്നത് ഫിലിപ്പ് ശ്രദ്ധിച്ചിരുന്നു. ഇത്തവണ അവന് കണ്ണീരിനെ ഒളിപ്പിക്കാൻ കഴിഞ്ഞില്ല. ഫിലിപ്പിന് ഒരു കാര്യം അറിയാം, മിഖി എപ്പോഴും ഇമോഷണലാവുന്നുണ്ടെങ്കിൽ അത് ജോസഫിന്റെ കാര്യം വരുമ്പോഴാണ്. ഇതുവരെ അവര് തമ്മിലുള്ള ബന്ധം എങ്ങനെയുള്ളതാണെന്ന് ആർക്കും കൃത്യമായി മനസിലാക്കാൻ പോലും കഴിഞ്ഞിട്ടില്ല.

“മോനപ്പോൾ പറയുന്നത് ജോസഫ് മോൻ ഒരിക്കലും പെണ്ണ് കെട്ടില്ലെന്നാണോ” ഫിലിപ്പ്.

“പെണ്ണ് കെട്ടില്ലെന്ന് പറഞ്ഞില്ല. പക്ഷെ അത് ബുദ്ധിമുട്ടാണ്. മൂന്നു പ്രശ്നങ്ങളുണ്ട് ഇവിടെ”

“എന്ത് പ്രശ്നങ്ങൾ ?”

“ഒന്ന് ജോയുടെ കോംപ്ലിക്കേറ്റഡ് മൈൻഡ്. ജോക്ക് മറ്റുള്ളവര് പുറത്തു കാണിക്കാതെ ഉള്ളിലൊതുക്കി വച്ചിരിക്കുന്ന ഫീലിംഗ്സ് ഈസിയായി സെൻസ് ചെയ്തെടുക്കാൻ പറ്റും. മറ്റൊരു രീതിയിൽ പറഞ്ഞാൽ മൈൻഡ് റീഡിങ് പോലെ തന്നെ. അതുക്കൊണ്ട് തന്നെ ജോ ഏതു പെണ്ണിനെ പരിചയപ്പെട്ടാലും അവരുടെ പോസിറ്റീവ് സൈഡും നെഗറ്റീവ് സൈഡും ജോക്ക് പെട്ടന്ന് മനസിലാവും. സാധാരണ ആളുകള് പ്രേമിക്കുന്ന സമയത്തു അവരുടെ പാർട്ടണറുടെ നെഗറ്റീവ് സൈഡ് പലപ്പോഴും മനസിലാക്കാൻ പറ്റില്ല. പക്ഷെ കല്യാണം കഴിയുമ്പോൾ ഈ നെഗറ്റീവ് സൈഡ് തിരിച്ചറിയാൻ തുടങ്ങും. എന്നാൽ ജോക്ക് ഇതെല്ലാം നേരത്തെ തന്നെ കണ്ടു പിടിക്കാൻ പറ്റും. കുറഞ്ഞ പക്ഷം ആ പെണ്ണിന്റെ പ്രേമം ഒറിജിനലാണോ കുന്നംകുളമാണോ എന്നെങ്കിലും തിരിച്ചറിയാൻ ജോക്ക് പറ്റും. അതുക്കൊണ്ടാണ് ജൂവൽ ചേച്ചി പുറകേ നടന്നിട്ടും ജോ മൈൻഡ് പോലും ചെയ്യാത്തത്”

“അതൊരു പ്രശ്നം തന്നെയാണ്. രണ്ടാമത്തേത് ഏതാ ?”

“അത് ഞാൻ തന്നെയാ”

“എന്ത് ?” ഫിലിപ്പൊന്ന് ഞെട്ടി.

ഫിലിപ്പ് അമ്പരപ്പോടെ മിഖിയെ നോക്കി.

“അങ്കിളിനറിയാവുന്നതല്ലേ ഞാനും ജോയും തമ്മിലുള്ള ബന്ധം. പക്ഷെ ഈ ബന്ധം വേറെ ചിലവളുമാർക്ക് ഇഷ്ടമല്ല. ജോയുടെ പുറകെ നടന്നിട്ടുള്ള ചില പെണ്ണുങ്ങൾക്ക് ഞാൻ ജോയുമായി വല്ലാണ്ട് കമ്പനിയാവുന്നത് ഇഷ്ടമാവാറില്ല. അങ്ങനെ വച്ച് നോക്കുമ്പോൾ ജോ ഇനി പ്രേമത്തിലായാലും ആ പ്രേമിക്കുന്ന പെണ്ണിന് എന്റെ കാര്യത്തിൽ അയിത്തമുണ്ടാവും. എനിക്കു മാറി കൊടുക്കാൻ ഒരു പ്രശ്നവുമില്ല. എന്നാലും ജോ അതിനു സമ്മതിക്കില്ല. പിന്നതു മാത്രമല്ല, വല്ല അവളുമാരെങ്ങാനും ജോയുടെ അടുത്തേക്ക് തരികിട പരിപാടിയുമായിട്ട് വന്നാൽ അവളുമാരെ ഞാൻ ശരിക്കും വെള്ളം കുടിപ്പിക്കും”