Wonder 4 [Nikila] 2478

“അലീന”

ആ പേര് എന്റെ മനസ്സിൽ കേറി വന്നു. അവളെ ഇപ്പോഴും ഫോട്ടോയിൽ കാണാൻ സുന്ദരിയായിട്ടുണ്ട്. ദേഷ്യം വരുമ്പോഴും സന്തോഷം വരുമ്പോഴും അവളെ കാണാൻ വല്ലാത്തൊരു ഭംഗിയാണ്. അവളുടെ ആ ചിരിയിൽ ആരും മയങ്ങി പോവും. നക്ഷത്രത്തിളക്കമുള്ള കണ്ണുകളുമായി ചിരിച്ചുക്കൊണ്ട് നിൽക്കുന്ന അവളുടെ മുഖം ഇപ്പോൾ ഒരു ചെറു വിങ്ങലോടെയാണ് ഞാൻ ഓർക്കുന്നത്.

“ഇനിയെപ്പോഴാടോ നമുക്ക് കാണാൻ പറ്റാ ?”

അവളുടെ ഫോട്ടോയിൽ നോക്കി ഞാനൊന്ന് ചോദിച്ചു. ഒരിക്കലും നടക്കില്ലെന്നറിയാം. എന്നാലും വെറുതെയോരോന്ന് ആശിച്ചു പോവുന്നു. ഞാൻ ദീർഘശ്വാസം വലിച്ചു വിട്ട് നേരെ ബാത്‌റൂമിൽ ഫ്രഷാവാനൊന്ന് കേറി.

………………………………………………………

ഈ സമയം താഴെ മിഖി അടുക്കളയിലേക്ക് ചെന്നപ്പോൾ അവിടെ കണ്ടത് ഫിലിപ്പ് ശാരദയെ വഴക്ക് പറയുന്നതാണ്. ശാരദയാണെങ്കിൽ ഒരു കൂസലുമില്ലാതെ വഴക്കും കേട്ട് നിൽക്കുന്നു. എന്തോ പന്തിക്കേട് തോന്നിയ മിഖി അവരുടെ അടുത്തേക്ക് ചെന്നു.

“എടീ, നിന്നോട് രാവിലെക്കൂടി പറഞ്ഞതെല്ലേ അടുക്കളേല് കേറരുതെന്ന്”

“ദേ മനുഷ്യാ, നിങ്ങളല്ലേ പറഞ്ഞേ പിള്ളേരെ കൂട്ടിക്കൊണ്ട് വരുന്നത് വരെ ഇവിടുത്തെ കാര്യങ്ങള് നോക്കണമെന്ന്”

“എന്നാ നിനക്ക് വല്ല മുറ്റമടിക്കണ പണി വല്ലതും ചെയ്താൽ പോരേ, എന്തിനാടീ അടുക്കളേല് കേറിയേ”

“എന്റെ ദേവീ…. അല്ലേൽ വേണ്ട. ദേവാ, നിങ്ങളിത് കേൾക്കണുണ്ടാ”

“ഞാനല്ലാം കേൾക്കുന്നുണ്ട് ഭവതി”