Wonder 4 [Nikila] 2478

“നിങ്ങളൊന്ന് മിണ്ടാണ്ടിരിക്കുന്നുണ്ടോ മനുഷ്യാ, ആൾക്കാരെല്ലാം ഇങ്ങനെ തുടങ്ങിയാ പിന്നെ ബാക്കിയുള്ളവർക്ക് നാവനക്കാൻ പോലും പറ്റില്ല” ശാരദ.

“അല്ല അങ്കിളേ, ഇവിടുത്തെ പ്രശ്നമെന്താ ?”

“പ്രശ്നം ഗുരുതരമാണ് മിഖേലേ, ഇന്ന് രാവിലെ ഇഡലിയാണ് ബ്രേക്ക് ഫാസ്റ്റിന്” ഫിലിപ്പ്.

“ഇഡലിയെന്താ അത്രയ്ക്ക് പ്രശ്നാണോ, ഇഡലിയുണ്ടാക്കിയത് നല്ലതല്ലേ”

“നല്ലതാ, പക്ഷെ ഉണ്ടാക്കിയത് ഇവളാണെന്ന് മാത്രം”

“അയ്യോ….”

“അതെ, അയ്യോ തന്നെ. ആ ഇഡലിയൊന്ന് നീ കയ്യീ പിടിച്ചു നോക്കിയേ”

എന്നും പറഞ്ഞ് ഫിലിപ്പ് ഒരു ഇഡലിയെടുത്ത് മിഖിയുടെ കയ്യില് കൊടുത്തു. മിഖി അതു ബലം പിടിച്ചു അമർത്തി നോക്കി.

“എന്താ ആന്റി ഇത്, സ്റ്റിച്ച് ബോളാണോ ഉണ്ടാക്കിയേണെ”

“അതു പിന്നെ മോനെ, ഒരു പരീക്ഷണം നടത്തിയിട്ട്….?”

“ആന്റി…. ഇതടുക്കളയാ, ലാബല്ല. ജോ വരുമ്പോ ഇതെങ്ങനെ കഴിക്കുമോ ആവോ ?”

“ചോദിക്കാൻ മറന്നു. ഇന്നലെ രാത്രി ഒൻപതു മണി വരെ വീട്ടിലുണ്ടായ നിങ്ങള് പിന്നെ എങ്ങോട്ടാ മുങ്ങിയേ” ഫിലിപ്പ്.

“ശരി, എന്നാ പിന്നെ എല്ലാമങ്ങ് പറഞ്ഞേക്കാം”

മിഖി അവരോട് എല്ലാം തുറന്നു പറഞ്ഞു. പോലീസ് സ്റ്റേഷനിൽ സംഭവിച്ച കാര്യങ്ങള് മാത്രം പറഞ്ഞില്ല?. എല്ലാം കേട്ടു കഴിഞ്ഞതും ഫിലിപ്പും ശാരദയും അന്തം വിട്ട് മിഖിയെ നോക്കി.

“എന്നാലും നിങ്ങള് കൊള്ളാലോ. എന്താ മക്കളുടെ ഉദ്ദേശം ? ഇനി ആ സ്ത്രീയേയും ഞങ്ങളെപ്പോലെ തന്നെ ദത്തെടുക്കാൻ പ്ലാനുണ്ടോ ?” ഫിലിപ്പ്.