ആമുഖം,ഈ കഥ ഈ പാർട്ടോടു കൂടി പര്യവസാനിക്കുന്നു. പ്രിയപ്പെട്ട വായനക്കാരുടെ പിന്തുണക്കു ഒരുപാട് നന്ദി.  അധികം ദീർഘിപ്പിക്കുന്നില്ല, നമുക്ക് തുടങ്ങാം .

**************

അവൾ അവളുടെ മൊബൈൽ എന്റെ കയ്യിൽ തന്നു. അതിൽ കണ്ട കാഴ്ചകൾ കണ്ടു ഞാൻ നടുങ്ങി, എന്റെ തൊണ്ടയും വായും വരണ്ടു. എന്തു മറുപടി പറയണം എന്ന് അറിയാതെ ഞാൻ കുരുങ്ങി.

ഞാൻ കോഫി ഷോപ്പിലെ എസിയുടെ തണുപ്പിൽ പോലും വിയർക്കാൻ തുടങ്ങി. ആമി എന്നെ തെറ്റി ധരിച്ചിരിക്കുന്നു, പക്ഷേ എങ്ങനെ ഇവളെ പറഞ്ഞു മനസ്സിലാക്കും. ഒരുപക്ഷേ ഇവളുടെ സ്ഥാനത്തു ഞാൻ ആയിരുന്നു എങ്കിലും ഇങ്ങനെ അല്ലേ പെരുമാറുകയുള്ളു.

ഞാനും ശ്രീയും ഒരുമിച്ചുള്ള കുറച്ചു ഫോട്ടോസ് ആയിരുന്നു ആമി കാണിച്ചത്.

പണ്ട് എൻട്രൻസ് ക്ലാസ്സ്‌ അവസാനിക്കുന്ന ദിവസം, എന്റെ ഹോസ്റ്റലിലേയ്ക്ക് തിരിയുന്ന വഴി അരികിൽ നിന്ന്, എന്നെ കെട്ടിപിടിച്ചു കവിളിൽ ചുംബിച്ച ഒരു ഫോട്ടോ, ഞങ്ങൾ ഒന്നിച്ചു ടൂറിനു പോയിരുന്നപ്പോൾ റിസോർട്ടിൽ ഒരു ബെഡിൽ അവളെ കെട്ടിപിടിച്ചു കിടക്കുന്ന ഫോട്ടോ, അതിൽ അവളും ഞാനും മാത്രം, അവളെ എടുത്തു നദി കടക്കുമ്പോൾ അവൾ എന്നെ കെട്ടിപ്പിടിച്ചു ഇരിക്കുന്ന ഫോട്ടോ.

ഞാൻ എന്തു മറുപടി പറയണം എന്ന് അറിയാതെ കുരുങ്ങി, തലയിൽ രണ്ടു കൈയ്യും വച്ചു ഇരുന്നുപോയി.

“ഈ ഫോട്ടോ എങ്ങനെ ഇവളുടെ കൈയിൽ എത്തി, ഇവളെ ആരാണ് തെറ്റിധരിപ്പിച്ചത്, ഇനി ഞാൻ എങ്ങനെ ആമിയെ പറഞ്ഞു മനസ്സിലാക്കും…”

എനിക്ക് ആകെ ഒരു എത്തും പിടിയും കിട്ടുന്നില്ലാരുന്നു.

എനിക്ക് അവളുടെ മുഖത്തേക്ക് നോക്കാൻ ആകുന്നില്ല. ദേഷ്യമോ വിഷമമോ ഒക്കെ വന്നു ആകെ ഒരു വല്ലാത്ത അവസ്ഥ.

“ശ്രീ… അവൾക്ക് എന്നെ ഇഷ്ടം ആണെന്ന് എനിക്ക് അറിയാം. എങ്കിലും… അവൾ ഇങ്ങനെ ഒരു ചതി ചെയ്യും എന്ന് പ്രതീക്ഷിച്ചില്ല…