? അരികത്തായാരോ – 9 ? വിച്ചു [ ചെകുത്താനെ സ്നേഹിച്ച മാലാഖ ] 1042

ദിവസങ്ങൾ കഴിയുന്തോറും അവൾ ദേവനെ പ്രത്യേകമായി ശ്രദ്ധിക്കുന്നുണ്ടെന്ന് എനിക്ക് തോന്നി തുടങ്ങി , പക്ഷെ അത് വെറും തോന്നലായിരുന്നില്ല അതായിരുന്നു സത്യം . ആ കോളേജിൽ വിദ്യാർത്ഥികളുടെ എന്താവശ്യത്തിനും ഏത് കാര്യത്തിനും ഓടി നടക്കുന്ന അവനോട് ഏതൊരു പെൺകുട്ടിക്കും ഇഷ്ടം തോന്നിയില്ലെങ്കിലേ അൽഭുതമുള്ളൂ …

കോളേജ് സമയത്തിന് ശേഷം ദേവനോടൊപ്പം ഞാനും ചെറിയ ജോലിക്കൊക്കെ പോയി തുടങ്ങി …. ഒരു ദിവസം മാർക്കറ്റിൽ ലോറിയിൽ വന്ന സാധനങ്ങൾ ഇറക്കിക്കോണ്ട് നിന്ന ഞങ്ങളെ കാറിൽ പോയ അവൾ കണ്ടു , ഒരു പുഞ്ചിരിയും സങ്കടവും നിറഞ്ഞ ഭാവമായിരുന്നു അവളുടെ മുഖത്ത് , കണ്ണിൽ നിന്ന് മായുന്നത് വരെ അവൾ കാറിന്റെ ഡോറിലൂടെ തല പുറത്തിട്ട് ഞങ്ങളെ നോക്കുന്നുണ്ടായിരുന്നു …

അന്ന് ദേവനോട് ഞാൻ എന്റെ മനസ്സിൽ തോന്നിയ സംശയം തുറന്ന് പറഞ്ഞു , ശ്രീദേവി അവനെ പ്രത്യേകമായി ശ്രദ്ധിക്കുന്നുണ്ടെന്നുള്ള കാര്യം …. അത് കേട്ട അവൻ നിസ്സാരമട്ടിൽ ഒന്ന് ചിരിച്ചു , എന്നോടന്ന് അവൻ ഒരു കാര്യം പറഞ്ഞു അവന് പഠിത്തം മാത്രമേ ഇപ്പൊ പ്രധാനമായിട്ടുള്ളൂ മറ്റൊന്നും അവന്റെ മനസ്സിലേയ്ക്ക് കയറില്ല എന്ന് ….

പിന്നീടുള്ള ദിവസങ്ങളിൽ ദേവനെ കാണുമ്പോഴൊക്കെ അവളുടെ മുഖത്ത് ഒരു നാണം കലർന്ന പുഞ്ചിരി ഉണ്ടായിരുന്നു , പക്ഷെ അവനതൊന്നും ശ്രദ്ധിക്കാൻ കൂട്ടാക്കിയിരുന്നില്ല …..