? അരികത്തായാരോ – 9 ? വിച്ചു [ ചെകുത്താനെ സ്നേഹിച്ച മാലാഖ ] 1042

അവന്റെ മനസ്സിൽ പല കാരണങ്ങളും
ഉണ്ടായിരുന്നു അതിൽ പ്രധാനം വടക്കേടത്ത്
മനയിലെ ഒരു കുട്ടിയെ ആഗ്രഹിക്കാൻ തനിക്ക്
അർഹതയില്ല എന്നത് തന്നെയായിരുന്നു .

പക്ഷെ ശ്രീദേവി അവളുടെ നിലപാടിൽ തന്നെ ഉറച്ചു നിന്നു , ഒരു പുഞ്ചിരിയോടെ അവന്റെ പിന്നാലെ തന്നെ കൂടി …. ഞങ്ങളതൊക്കെ സന്തോഷത്തോടെ കണ്ട് നിന്നു … മാറാതെ പുറകേ നടന്ന് ഒരു ശല്യമായോ തടസ്സമായോ തോന്നിയത് കൊണ്ടാവും ഒരു ദിവസം അവൻ അവളെ ഒരുപാട് വഴക്ക് പറഞ്ഞു , അന്നവൾ കരഞ്ഞ് കൊണ്ടാ അവന്റെ മുന്നിൽ നിന്ന് പോയത് . അന്ന് അവളുടെ കണ്ണുനീർ കണ്ട ആ ദിവസം , അന്നത്തെ ദേവനെ എനിക്ക് ഒരിക്കലും മറക്കാൻ കഴിയില്ല . ഒരു തരം ഭ്രാന്ത് പിടിപ്പിച്ച അവസ്ഥയിലായിരുന്നു അവൻ …..

” ഒന്നുമില്ലാത്ത ഒരു തെണ്ടിയായ എന്റെ പിറകെ നടന്ന് തന്റെ ജീവിതം കൂടി നശിക്കരുതല്ലോ എന്നോർത്താ തന്നോടന്ന് ഇഷ്ടമില്ല എന്ന് പറഞ്ഞത് , അന്ന് പിന്തിരിപ്പിക്കാൻ ശ്രമിച്ചത് . പിന്നെയും പുറകേ നടന്നപ്പൊ ഞാൻ കാരണം തന്റെ ജീവിതം കൂടി നശിക്കുമല്ലോ എന്നോർത്താ ഇന്ന് അത്രയ്ക്ക് വഴക്ക് പറഞ്ഞത് അല്ലാതെ തന്നോട് ഇഷ്ടമില്ലാഞ്ഞിട്ടല്ല …… ”

ഈ വാക്കുകളായിരുന്നു അന്ന് ദേവൻ സ്വയം പറഞ്ഞ് നടന്നത് അതും ഒരു മാനസിക നില തെറ്റിയ ആളിനെപ്പോലെ . അന്നെനിക്ക് മനസ്സിലായി അവന് ശ്രീദേവിയെ ഒരുപാട് ഇഷ്ടമാണെന്ന് …..

പിറ്റേന്ന് അവൻ കോളേജിൽ വന്നില്ല …. ഞാൻ ശ്രീദേവിയെ കണ്ട് കാര്യങ്ങളൊക്കെ പറഞ്ഞു , അവളുടെ ഭാഗത്ത് നിന്നുണ്ടായതും ഒരു പൊട്ടിക്കരച്ചിലായിരുന്നു …..