? അരികത്തായാരോ – 9 ? വിച്ചു [ ചെകുത്താനെ സ്നേഹിച്ച മാലാഖ ] 1042

അപ്പോഴാ കോളേജിന്റെ മുന്നിലായി ഒരു അംബാസിഡർ കാർ വന്ന് നിന്നത് , അതിൽ നിന്ന് ഒരു പെൺകുട്ടി പുറത്തേക്കിറങ്ങി , അവളുടെ പേര് ദേവി , ശ്രീദേവി . പണ്ട് നാടുവാഴികളായിരുന്ന വടക്കേടത്ത് മനയിലെ രാഘവൻ തമ്പിയുടെ മകൾ ശ്രീദേവി തമ്പുരാട്ടി . പിന്നീട് ദേവന്റെ തമ്പുരാട്ടി കുട്ടിയായി മാറിയ ശ്രീദേവി , നിന്റെ അമ്മ . ”

മഹേന്ദ്രനാഥ് അത്രയും പറഞ്ഞ ശേഷം ഒരു പുഞ്ചിരിയോടെ അജുവിന്റെ മുഖത്തേയ്ക്ക് നോക്കി . അവന്റെ കണ്ണുകൾ സന്തോഷം കൊണ്ട് നിറഞ്ഞിരുന്നു , തന്റെ അച്ഛനമ്മമാരെ കുറിച്ച് പുതിയ കാര്യങ്ങൾ അറിയാൻ കഴിഞ്ഞല്ലോ എന്ന സന്തോഷത്തോടെ …

മഹേന്ദ്രനാഥ് ബാക്കി പറയാൻ തുടങ്ങി ….

” ഞങ്ങൾ കോളേജിൽ പഠിക്കുന്ന കാലത്ത് പഠിക്കാൻ വരുന്ന ഒരു കുട്ടി കാറിലൊക്കെ വരുക എന്നത് തന്നെ ഒരു അൽഭുതം പോലെയാ കണ്ടിരുന്നത് . അന്ന് ആദ്യമായി അവൾ കാറിൽ വന്ന് കോളേജിന് മുന്നിൽ ഇറങ്ങിയപ്പൊ എല്ലാവരുടെയും നോട്ടം അവളിലേക്കായി … പക്ഷെ ആർക്കും അറിയില്ലായിരുന്നു അവൾ
വടക്കേടത്ത് മനയിലെ കുട്ടിയാണെന്ന് , ആ മനയെ കുറിച്ച് കേട്ടറിവുള്ള ആരും അവിടുത്തെ കുട്ടിയെ മുഖമുയർത്തി നോക്കില്ല , ദേഷ്യപ്പെടില്ല , എന്തിന് ശബ്ദമുയർത്തി സംസാരിക്കുക കൂടിയില്ല . അങ്ങനെ വല്ലം നടന്നതായി മനയിലറിഞ്ഞാൽ അവിടുത്തെ കുട്ടിയുടെ മനസ്സ് നോവിച്ചു എന്ന് മനയിലെ കാരണവന്മാർ അറിഞ്ഞാൽ അതിന് കാരണക്കാരായവരുടെ തലയെടുക്കാനും അവർ മടിക്കില്ല . ആ മനയെ കുറച്ചുള്ള പഴങ്കഥകളിൽ അങ്ങനത്തെ പലതും ഉണ്ടായിരുന്നു , ആരെയും പേടിപ്പിക്കുന്ന ചില കാര്യങ്ങൾ …..