? അരികത്തായാരോ – 9 ? വിച്ചു [ ചെകുത്താനെ സ്നേഹിച്ച മാലാഖ ] 1042

വീണ്ടും ദിവസങ്ങൾ കടന്ന് പോയി , കോളേജ് മുഴുവൻ കലോത്സവത്തിന്റെ തിരക്കിലും സന്തോഷത്തിലും നിറഞ്ഞ് നിൽക്കുന്ന സമയം .
ഒരു ദിവസം ഉച്ചയ്ക്ക് അവൾ ഞങ്ങളുടെ അടുത്തേക്ക് വന്നു .

” അന്ന് എന്നോട് നൃത്തം ചെയ്യാൻ നിർബന്ധിച്ച് പറഞ്ഞ ആളല്ലേ , ആർട്സ് ഫെസ്റ്റിവലായിട്ട് നാളെ എന്റെ ഒരു പ്രോഗ്രാം ഉണ്ട് , വരണം …. ”

ഒരു പുഞ്ചിരിയോടെ ദേവന്റെ മുഖത്ത് നോക്കി അത്രയും പറഞ്ഞ ശേഷം അവൾ അവിടുന്ന് പോയി , മറുപടിക്ക് പോലും കാത്ത് നിൽക്കാതെ .

പിറ്റേന്ന് ഞങ്ങൾ വിളിച്ചിട്ടും പ്രോഗ്രാം നടക്കുന്ന സ്റ്റേജിലേയ്ക്ക് വരാൻ കൂട്ടാക്കാത്ത അവനെ അവസാനം ഞങ്ങളെല്ലാം കൂടി ബലമായി പൊക്കിയെടുത്താ സ്റ്റേജിന് മുന്നിൽ എത്തിച്ചത് , അതൊക്കെ ഒരു രസമായിരുന്നു അന്ന് . ഞങ്ങളോടുള്ള ചെറിയ നീരസത്തിൽ തന്നെ അവൻ ഒരോരോ പ്രോഗ്രാമും കണ്ടിരുന്നു . അങ്ങനെ ഒടുവിൽ ശ്രീദേവിയുടെയും അവസരം എത്തി . മോഹിനിയാട്ടം അതാ അവളന്ന് സ്റ്റേജിൽ അവതരിപ്പിച്ചത് …..

നിർബന്ധിച്ച് വിളിച്ചിട്ടും വരാൻ കൂട്ടാക്കാത്ത ദേവൻ പോലും അവളുടെ നൃത്തം കണ്ട് ലയിച്ചിരുന്നു കാരണം അത്രയ്ക്ക് മനോഹരമായിരുന്നു അത് . ഒടുവിൽ കാണികളുടെയും വിധികർത്താക്കളുടെയും നീണ്ട കൈയ്യടിക്ക് ശേഷം സ്റ്റേജ് വിട്ട് പോകുന്നതിന് മുൻപ് ഒരു നോട്ടം അവൾ ദേവനെ നോക്കിയിരുന്നു , അത് അന്ന് അവന്റെ നെഞ്ചിലാ തറച്ചത് ഒരു അമ്പ് പോലെ .

ഒടുവിൽ അവൾ തന്നെ ആദ്യം അവനോട് തന്റെ ഇഷ്ടം തുറന്ന് പറഞ്ഞു . പക്ഷെ ദേവൻ അവളെ പിന്തിരിപ്പിക്കാനാ ശ്രമിച്ചത് , തന്റെ ഭാഗത്ത് നിന്ന് പല കാരണങ്ങളും ന്യായങ്ങളും അവൻ അന്ന് പറഞ്ഞു .