? അരികത്തായാരോ – 9 ? വിച്ചു [ ചെകുത്താനെ സ്നേഹിച്ച മാലാഖ ] 1042

അവൾ അവസാനമായി പറഞ്ഞവാക്കുകൾ , മറുപടിയായി ഞാൻ ഒന്നും പറഞ്ഞില്ല എങ്കിലും ഞാൻ മനസ്സിൽ ഉറപ്പിച്ചിരുന്നു എന്റെ ദേവന്റെ മകനെ ഞാൻ വളർത്തുമെന്ന് ഒരു കുറവും വരാതെ , പക്ഷെ നിന്റെ സുരക്ഷയ്ക്ക് ആ ഓർഫനേജിന്റെ മറ എനിക്കാവശ്യമായിരുന്നു …

ശ്രീദേവിയുടെ കുഞ്ഞിനെപ്പറ്റി അന്വേഷിച്ച് മറുപടിയൊന്നും കിട്ടാതെ വന്നപ്പൊ ആ കുഞ്ഞും മരിച്ച് പോയെന്ന് അനിരുദ്ധൻ വടക്കേടത്ത് മനയിലുള്ളവരോട് പറഞ്ഞതായി ഞാനറിഞ്ഞു . അനിരുദ്ധൻ ഉറപ്പ് കൊടുത്തതിനാൽ അവർ വിശ്വസിക്കുകയും ചെയ്തു . മുന്നിലെ എല്ലാ തടസ്സങ്ങളും മാറി എന്ന് വിശ്വസിച്ചിരിക്കുന്ന അവരുടെ മുന്നിൽ നീ ഇപ്പോഴും ജീവിച്ചിരുപ്പുണ്ടെന്ന വാർത്ത അറിഞ്ഞാൽ മനയിലുള്ളവർ ആദ്യം എടുക്കുക അനിരുദ്ധന്റെ തലയാകും , കാരണം അവനന്ന് കള്ളം പറഞ്ഞ് തങ്ങളെപ്പറ്റിച്ചു എന്ന് അവർക്ക് മനസ്സിലാകും , മനയിലുള്ളവർ അന്ന് കൊടുത്ത പണം കൊണ്ടാ അവൻ ഇന്ന് ഈ നിലയിൽ ആയത് പോലും …. ആ പേടി മനസ്സിലുള്ളത് കൊണ്ടാ നീ ജീവനോടെ ഉണ്ടെന്നറിഞ്ഞതും നിന്നെ കൊല്ലാൻ അവൻ ആളെ അയച്ചത് ….. ”

മഹേന്ദ്രനാഥ് അങ്ങനെ എല്ലാ സത്യങ്ങളും അജുവിനോട് പറഞ്ഞു ….. നിറഞ്ഞ് തുളുമ്പിയ കണ്ണുകളുമായി അവൻ എല്ലാം കേട്ടിരുന്നു … അഹാനയുടെ അവസ്ഥയും മറിച്ചായിരുന്നില്ല . ദേവുവും യദുവും എല്ലാം കേട്ട് കഴിഞ്ഞതും സങ്കടത്തിലായി .

” അപ്പൊ ….. എന്റെ …. എന്റെ അച്ഛൻ ….? ”

സങ്കടം നിറഞ്ഞ സ്വരത്തോടെ അജു ചോദിച്ചു …

” അറിയില്ല …… എന്നെക്കൊണ്ട് കഴിയുന്ന വിധത്തിലൊക്കെ ഞാൻ ഒരുപാട് അന്വേഷിച്ചു , പക്ഷെ ഒരു വിവരവും കിട്ടിയില്ല …. പലതും ഇന്നും എനിക്ക് അവ്യക്തമാണ് …. ”

അജുവിന്റെ മുഖത്തേയ്ക്ക് നോക്കാനാകാതെ തലതാഴ്ത്തി ഇരുന്നു കൊണ്ട് മഹേന്ദ്രനാഥ് മറുപടി പറഞ്ഞു .