✮കൽക്കി࿐ (ഭാഗം – 20 ) വിച്ചു [ചെകുത്താനെ സ്നേഹിച്ച മാലാഖ ] 894

അയാൾ ഉള്ളിലേയ്ക്ക് കയറിയതും പുറത്ത് നിന്ന കാവൽക്കാരൻ ഉടനെ മുൻവാതിൽ അടച്ചു .
ഉള്ളിലേയ്ക്ക് കയറിയ അയാൾ നേരെ പ്രധാന മുറി ലക്ഷ്യമാക്കി നടന്നു

” ചക്രപാണി …… എത്തിയോ …. എന്തേ എന്റെ സമയത്തിന് വിലയുണ്ടെന്നറിയില്ലേ നിനക്ക് ….. ? ”

ചാരു കസേരയിൽ ചാരിക്കിടക്കുകയായിരുന്ന ഒരാൾ സ്വരം കടുപ്പിച്ച് ചോദിച്ചതും ചക്രപാണി തല താഴ്ത്തി ഭയ ഭക്തിയോടെ നിന്നു ….

” അ …..അത് ….. ആരുടേയും കണ്ണിൽപ്പെടാതെ എത്തണ്ടേ ഇവിടം വരെ . അതും ഈ പകൽ സമയത്ത് … ”

സ്വരം താഴ്ത്തി ഭയത്തോടെയാണയാൾ അത്രയും പറഞ്ഞത് .

” ഉം …… ഞാൻ പറഞ്ഞ കാര്യം എന്തായി ? ”

അയാളത് ചോദിച്ചതും ചക്രപാണിയുടെ മുഖത്ത് ഒരു ഞെട്ടലാണ് ആദ്യമുണ്ടായത് ….

” അ ….. അ …. അത് …. പിന്നെ …. ആ ഭൂപട ചിത്രമെവിടെയാണെന്ന് രാജന് മാത്രമേ അറിയാവൂ … അയാൾ അത് ആരോടും പറയില്ല … ഞാൻ കഴിയുന്നത്ര തിരഞ്ഞു പക്ഷെ കിട്ടിയില്ല . അത് അത്രയും സുരക്ഷിതമായി രാജ തമ്പുരാൻ എവിടെയോ സൂക്ഷിച്ചിരിക്കുവാ , ക്ഷമിക്കണം എന്നെക്കൊണ്ട് അത് കണ്ടെത്താൻ കഴിയില്ല …. ”

ചക്രപാണി തല താഴ്ത്തി നിന്ന് പതർച്ചയോടെ അത്രയും പറഞ്ഞതും ആ ചാരു കസേരയിൽ ഇരുന്നയാൾ വേഗം ചാടിയെണീറ്റ് ചക്രപാണക്ക് നേരെ തിരിഞ്ഞു , അയാൾ ചാടിയെണീറ്റ് തനിക്ക് നേരെ തിരിഞ്ഞത് കണ്ട ചക്രപാണി ഭയന്ന് വിറച്ച് പുറകോട്ട് നിലയായി മുതുകിടിച്ച് വീണു പോയി …

” ഫ്പ്പാ ….. ഇത് പറയാനാണോ നീ ഇങ്ങോട്ട് കെട്ടിയെടുത്തത് , പറഞ്ഞത് അനുസരിച്ചില്ലെങ്കിൽ പകരം വിലയായി തരേണ്ടി വരുന്നത് നിന്റെയും നിന്റെ കുടുംബത്തിന്റെയും ജീവനാകും ഓർത്തോ …. ”