മാന്ത്രികലോകം 10 [Cyril] 2195

“ഒളിച്ച് കളിച്ചത് മതി അഗ്നി… ഉജ്ജ്വല. നിങ്ങളുടെ ചിരിക്ക് തുല്യമായ ആ മുഖഭാവവും ഞാൻ കാണുന്നു….” ഫ്രെൻ ഒരു നിശ്വാസത്തോടെ പറഞ്ഞു.

പെട്ടന്ന് അഗ്നിയും ഉജ്ജ്വലയും അഗ്നിഗുണ്ടത്തിൽ പ്രത്യക്ഷപ്പെട്ടു… എന്നിട്ട് എന്റെയും അമ്മുവിന്റെയും ഇടക്കുള്ള സ്ഥലത്ത്‌ തറയില്‍ കിടന്നു.

ആ രണ്ട് ചെന്നായ്ക്കളുടെ മുഖഭാവങ്ങള്‍ എല്ലാം ഞങ്ങൾ എല്ലാവർക്കും കുറച്ച് ദിവസത്തിന് മുമ്പ് തൊട്ട് നല്ലതുപോലെ മനസ്സിലാവാൻ തുടങ്ങിയിരുന്നു.

രണ്ട് ചെന്നായ്ക്കളും ഫ്രെന്നിനെ നോക്കി ചിരിക്കുന്നത് അവരുടെ ഭാവത്തില്‍ നിന്നും മനസ്സിലായി.

സത്യത്തിൽ എനിക്ക് ഉറക്കെ ചിരിക്കാനാണ് തോന്നിയത്….. ഇതുപോലെ എന്തെല്ലാം കാര്യങ്ങള്‍ ഞങ്ങൾക്ക് അറിയാമെന്ന് അവന്‍ തെറ്റിദ്ധരിച്ചിരിക്കുന്നു വെന്ന് ദൈവങ്ങള്‍ക്ക് മാത്രമറിയാം… ഇല്ല, ദൈവങ്ങള്‍ക്ക് പോലും അറിയാൻ സാധ്യതയില്ല…!!

അവസാനം ഒന്നും സംഭവിക്കാത്തത് പോലെ ഫ്രെൻ ഞങ്ങളെ നോക്കി തുടർന്നു —,

“ഓരോ വ്യക്തിക്കും മറ്റുള്ളവരുടെ ശക്തിയുടെ സ്വഭാവത്തില്‍ നിന്നും വ്യത്യസ്തത ഉള്ളതു കൊണ്ടാണ് ഒരു മാന്ത്രികന് തന്റെ അല്ലാത്ത മറ്റുള്ള ശക്തികളെ തിരിച്ചറിയാൻ കഴിയുന്നത്. പിന്നെ ഈ താപ വ്യത്യാസത്തിന്‍റെ അടിസ്ഥാനത്തിലാണ് എന്നെക്കാളും ശക്തി കുറഞ്ഞവരേയും കൂടിയവരേയും എനിക്ക് തിരിച്ചറിയാൻ കഴിയുന്നത്…”

അത്രയും പറഞ്ഞിട്ട് ഫ്രെൻ തല കുമ്പിട്ട് മിണ്ടാതിരുന്നു.

“പക്ഷേ നിന്റെ ശക്തിയെ എന്തുകൊണ്ട് മറ്റുള്ളവർക്ക് അനുഭവപ്പെടാന്‍ കഴിയുന്നില്ല എന്നത് ഇപ്പോഴും ഞങ്ങൾക്ക് മനസിലായില്ല ഫ്രെൻ…” സുല്‍ത്താന്‍ നെറ്റി ഉഴിഞ്ഞു കൊണ്ട്‌ പറഞ്ഞു.

ഉടനെ ഫ്രെൻ തല പൊക്കി അവനെ നോക്കി.

“നിന്റെ ശക്തിയെ നി എങ്ങനെയാണ് മറച്ചു പിടിക്കുന്നത് ഫ്രെൻ…?” ഞങ്ങൾ എല്ലാവരുടെയും മനസില്‍ ഉണ്ടായിരുന്ന സംശയത്തെ ഹെമീറ ചോദിച്ചു.

അല്‍പ്പനേരം ഫ്രെൻ എന്തോ ആലോചിച്ചിരുന്നു… ആ ചോദ്യത്തിന് ഫ്രെൻ ഉത്തരം തരില്ല എന്നാണ് ഞാൻ കരുതിയത്….

പക്ഷേ ഒരു പുഞ്ചിരിയോടെ അവന്‍ തുടങ്ങി —,,

“നിങ്ങൾ വിചാരിക്കും പോലെ എന്റെ ശക്തിയെ ഞാൻ ആരിൽ നിന്നും മറച്ചു പിടിക്കുകയല്ല ചെയ്യുന്നത്…..”

“പിന്നേ എന്താണ് നി ചെയ്യുന്നത് ഫ്രെൻ…!?” സിദ്ധാര്‍ത്ഥ് തിടുക്കം കൂട്ടി.

“എന്റെ ശക്തിയെ സ്പര്‍ശിക്കുന്ന ഏതൊരു അന്യ ശക്തിയുടെ അതേ സ്വഭാവത്തെയും താപത്തെയും എന്റെ ശക്തി ആ അന്യ ശക്തിയില്‍ നിന്നും സ്വീകരിക്കുകയാണ് ചെയ്യുന്നത്….. അങ്ങനെ ചെയ്യുന്നത് മൂലം എന്റെ ശക്തിയെ സ്പര്‍ശിക്കുന്ന അന്യ ശക്തിക്ക്, ആ ശക്തിയുടെ അതേ സ്വഭാവം സ്വീകരിച്ച എന്റെ ശക്തിയെ വേര്‍തിരിച്ചറിയാൻ കഴിയാതെ പോകുന്നു. ആ സാഹചര്യത്തിൽ എന്റെ ശക്തിയേയും ആ അന്യ ശക്തി അതിന്റെ സ്വന്തം ഭാഗമെന്ന് വിശ്വസിച്ച് പോകുന്നു…. അതുകൊണ്ട് എന്റെ മാന്ത്രിക ശക്തിയെ മറ്റുള്ള ശക്തികള്‍ അന്യ ശക്തിയായി കാണാതെ സ്വന്തം ശക്തിയുടെ ഭാഗമായി കാണുന്നതു കൊണ്ട് എന്റെ ശക്തിയെ ആര്‍ക്കും തിരിച്ചറിയാൻ കഴിയാതെ പോകുന്നു… ആ കാരണം കൊണ്ട് ഞാൻ വെറും സാധാരണ മനുഷ്യനെന്ന് ഭൂരിഭാഗം മാന്ത്രികരും വിധിയെഴുതുന്നു….”