മാന്ത്രികലോകം 10 [Cyril] 2195

ദനീർ പറഞ്ഞു. “പക്ഷേ നീ ഞങ്ങളോട് എന്തു പറയാനാണ് ഉദ്ദേശിക്കുന്നത് ഫ്രെൻ…?”

കുറച്ചു നേരം എന്തോ ആലോചിച്ചു കൊണ്ടിരുന്നിട്ട് ഫ്രെൻ പറഞ്ഞു, “നമ്മൾ എല്ലാവർക്കും കുറഞ്ഞ അളവിലുള്ള നിഗൂഢ ശക്തിയെ പ്രകൃതി പ്രദാനം ചെയ്തിട്ടുണ്ട് എന്നും… നിഗൂഢ ശക്തിയെ കൂടുതലായി മനസ്സിലാക്കാൻ കഴിയുമ്പോൾ ആണ് നമ്മുടെ ശക്തി വര്‍ദ്ധിക്കുന്നത് എന്നും നോഷേയ പറഞ്ഞതായി ഞാൻ നിങ്ങളോട് പറഞ്ഞിരുന്നു…”

“അതേ ഫ്രെൻ.. നീ അങ്ങനെ പറഞ്ഞിരുന്നു… ഇപ്പോൾ നീ എന്താണ് പറയാൻ ഉദ്ദേശിക്കുന്നതെന്നു തെളിച്ച് പറയ് ഫ്രെൻ…” അക്ഷമയായി അവനോട് ഞാൻ അങ്ങനെ പറഞ്ഞതും അവന്‍ എന്നെ നോക്കി പുഞ്ചിരിച്ചു.

“പ്രകൃതി നമുക്ക് നല്‍കിയ ഈ നിഗൂഢ ശക്തിയെയാണ് നമ്മൾ മാന്ത്രിക ബോധം എന്ന് പറയുന്നത്…”

ഫ്രെൻ പറഞ്ഞത് കേട്ട് ഞാൻ ഉള്‍പ്പെടെ എല്ലാവരും ഞെട്ടി. പക്ഷേ അതൊന്നും കാര്യമാക്കാതെ അവന്‍ തുടർന്നു —,

“മാന്ത്രിക ബോധം എന്നത് പ്രകൃതിയുടെ സ്വന്തം ‘തിരിച്ചറിവ്‌’ എന്ന ശക്തിയാണ്…. നമ്മുടെ ചിന്താശേഷിക്ക് അനുസരിച്ചാണ് നമ്മുടെ സ്വന്തം തിരിച്ചറിവ് വര്‍ദ്ധിക്കുന്നത്… നമ്മുടെ സ്വന്തം തിരിച്ചറിവ് വര്‍ദ്ധിക്കുന്നതിന് അനുസരിച്ചാണ് പ്രകൃതിയുടെ നിഗൂഢ നിയമങ്ങളുടെ ചുരുള്‍ അഴിച്ചു നാം ഉന്നത രഹസ്യങ്ങളെ ശെരിക്കും മനസിലാക്കാന്‍ തുടങ്ങുന്നത്…. ഉന്നത രഹസ്യങ്ങളെ നാം മനസ്സിലാക്കുന്നത് അനുസരിച്ച് നമ്മുടെ മാന്ത്രിക ശക്തിയും വര്‍ദ്ധിക്കും.

അങ്ങനെ കുറച്ചെങ്കിലും പ്രകൃതിയുടെ അഗാധമായ നിഗൂഢ നിയമത്തെ നാം സ്വയം മനസ്സിലാക്കാൻ തുടങ്ങിയാല്‍ മാത്രമേ ആ കാര്യവുമായി ബന്ധപ്പെട്ട കൂടുതൽ കാര്യങ്ങളെ മാത്രം നമ്മുടെ മാന്ത്രിക ബോധം നമുക്ക് മനസിലാക്കിത്തരാൻ ശ്രമിക്കാറുള്ളു… അല്ലാതെ നമുക്ക് അറിയാത്ത കാര്യങ്ങളെ മാന്ത്രിക ബോധം ഒരിക്കലും വെളിപ്പെടുത്തില്ല… അതിന്‌ കഴിയില്ല…”

അവന്‍ പറഞ്ഞത് കേട്ട് എന്റെ തലക്കകത്ത് എന്തെല്ലാമോ സംഭവിക്കും പോലെ തോന്നി…

അപ്പോ ഫ്രെന്നിനെ പോലെ ഞങ്ങളും ഒരുപാട്‌ പരീക്ഷണങ്ങൾ നടത്തണം എന്ന് സാരം… അതുപോലെ ഒരുപാട്‌ ചിന്തിക്കുകയും വേണം എന്നും മനസ്സിലായി. അപ്പോൾ മാത്രമേ ഞങ്ങളുടെ തിരിച്ചറിവ് വര്‍ധിച്ച് നിഗൂഢ നിയമങ്ങളെ മനസ്സിലാക്കി ഞങ്ങളുടെ ശക്തിയെ വർദ്ധിപ്പിക്കാൻ കഴിയുകയുള്ളു… പക്ഷേ ഫ്രെന്നിനെ പോലെ ചിന്തിച്ച് പ്രവർത്തിക്കാൻ ആര്‍ക്കും അത്ര എളുപ്പത്തില്‍ കഴിയില്ല എന്നാണ്  എനിക്ക് മനസിലാക്കാന്‍ കഴിഞ്ഞിട്ടുള്ളത്.

“പ്രകൃതിയുടെ നിഗൂഢ നിയമങ്ങളിൽ അടങ്ങിയിരിക്കുന്ന കാര്യങ്ങൾ എന്തെല്ലാമാണ് ഫ്രെൻ…?” അഖില്‍ ചോദിച്ചു.

“എങ്ങനെ സൃഷ്ടിക്കണം, എങ്ങനെ നിലനിര്‍ത്തണം, എങ്ങനെ നശിപ്പിക്കണം… ഇതൊക്കെയാണ്…” ഫ്രെൻ പറഞ്ഞു.

അവന്‍ പറഞ്ഞതു കേട്ട് ഞാൻ പൊട്ടിച്ചിരിച്ചു…. എല്ലാവരും സംശയത്തോടെ എന്റെ മുഖത്ത് നോക്കി.

“സൃഷ്ടി, നിലനിർത്തൽ പിന്നേ നശിപ്പിക്കൽ എന്ന ഈ മൂന്ന് നിയമങ്ങളെ അടിസ്ഥാനമാക്കി തന്നെയല്ലേ ഈ പ്രപഞ്ചം തന്നെ ചലിക്കുന്നത്… അപ്പോള്‍പിന്നെ ഈ പ്രപഞ്ചത്തിലെ സകല രഹസ്യങ്ങളും മനസ്സിലാക്കിയാല്‍ മാത്രമേ നിഗൂഢ നിയമങ്ങളെ നമുക്ക് മനസ്സിലാക്കാൻ കഴിയുകയുള്ളു എന്നാണോ നാം മനസിലാക്കേണ്ടത്…?” ഞാൻ നിരസത്തോടെ ചോദിച്ചു.