ആ രാത്രിയിൽ 5[പ്രൊഫസർ ബ്രോ] 176

“സർ…”ദേവൻ മരക്കാർക്ക് സല്യൂട്ട് നൽകി

“ആ താൻ വാ,
കുറെ സമയമായി ഈ വണ്ടി ഹെഡ് ലൈറ്റ് ഓൺ ആക്കി വഴി സൈഡിൽ കിടക്കുന്നത് കണ്ട പരിസരവാസികൾ സംശയം തോന്നി വന്ന്‌ നോക്കിയപ്പോൾ ആണ് ഇതിനുള്ളിൽ കഴുത്തിൽ നിന്നും രക്തം ഇറ്റുവീഴുന്ന നിലയിൽ ശേഖരന്റെ ശരീരം കണ്ടത്, അവർ അപ്പൊ തന്നെ കണ്ട്രോൾ റൂമിലേക്ക് വിളിച്ചു അറിയിച്ചു… നമ്മുടെ പരിധിയിൽ ആയത് കൊണ്ട് നമുക്ക് തന്നെ ഈ കേസ് വരികയും ചെയ്തു. അധികം ആൾ താമസം ഇല്ലാത്ത സ്ഥലം ആയത് കൊണ്ടാകും അതികം ആരും ഇതറിഞ്ഞിട്ടില്ല”

മരക്കാർ ദേവനെയും കൂട്ടി ആ വെള്ള കളർ ഫോർച്ചുണറിന്റെ അരികിലേക്ക് നടന്നു, അതിനു ചുറ്റുമായി പോലീസ് തീർത്ത കോഷൻ ടേപ്പിനെ തലക്ക് മുകളിൽ കൂടി ഉയർത്തി അവർ അതിനുള്ളിലേക്ക് കടന്നു

വണ്ടിയുടെ ഉള്ളിൽ ഇരുട്ടായിരുന്നതിനാൽ ഉള്ളിൽ ഉള്ളതൊന്നും കാണാൻ സാധിക്കുന്നുണ്ടായിരുന്നില്ല, ദേവൻ തന്റെ മൊബൈൽ ഫ്ലാഷ് ഓൺ ആക്കി അതിനുള്ളിലേക്ക് നോക്കി

ശേഖരന്റെ കഴുത്തിൽ നീളത്തിൽ ഉള്ള മുറിവ്, അതിൽ നിന്നും ഒഴുകിയ രക്തം അവന്റെ വസ്ത്രത്തെ കുതിർത്തിരിക്കുന്നു മുറിവ് പൊത്തിപ്പിടിച്ചതിനാലാവാം അവന്റെ കൈകളും രക്തനിറം പൂണ്ടിരിക്കുന്നു

“സർ,ഫോറൻസിക് ടീം..??”

“അറിയിച്ചിട്ടുണ്ട് ഇപ്പൊ എത്തും…”

“സാധാരണ ഇങ്ങനെ ഒരു കാര്യം നടന്നാൽ ഇവിടെ മീഡിയക്കാർ വന്ന്‌ നിറയേണ്ടതല്ലേ… ഇന്നെന്ത്‌ പറ്റി”

“കാര്യം ഇത്രയേ ഉള്ളു, നമ്മുടെ പോലീസിൽ തന്നെ ഒരുപാട് പേർക്ക് ഇങ്ങനെ ഒരു കാര്യം നടന്നത് അറിയില്ല… നമ്മുടെ വിവരങ്ങൾ ചോരുന്നത് നമ്മുടെ ഡിപ്പാർട്മെന്റിൽ നിന്ന് തന്നെയാണ്…”

ദേവനും മരക്കാരും കൂടി വണ്ടിയുടെ ചുറ്റിനും തിരച്ചിൽ ആരംഭിച്ചു..

“സർ…”

ദേവന്റെ വിളി കേട്ട മരക്കാർ അവനരികിലേക്ക് നടന്നു