ആ രാത്രിയിൽ 5[പ്രൊഫസർ ബ്രോ] 176

നിമിഷങ്ങൾക്കകം വാതിൽക്കൽ ഒരു പുരുഷരൂപം പ്രത്യക്ഷപ്പെട്ടു ,നീട്ടിവളർത്തിയ താടിയും ചുവന്ന കണ്ണുകളും, തേറ്റയിൽ നിന്നും രക്തം ഇറ്റുവീഴുന്ന ചെന്നായയുടെ ടാറ്റു ചങ്കിലും.,കണ്ടാൽ തന്നെ ആർക്കും ഭയം തോന്നും”എന്താ…”

പുറത്ത് യൂണിഫോം ഇട്ട പോലീസിനെ കണ്ടിട്ടും അയാൾക്ക് യാതൊരു കൂസലും ഉണ്ടായില്ല

“നീയാണോ വിനായകൻ”

“ആണെങ്കിൽ…”

അഹങ്കാരത്തോടെയുള്ള അവന്റെ മറുപടി രാജനിൽ കോപം നിറച്ചു, അവന്റെ നേരെ ആഞ്ഞ രാജനെ ദേവൻ കയ്യിൽ പിടിച്ചു നിർത്തി

“എനിക്ക് നിന്നോട് ഒന്ന് സംസാരിക്കണം…”

ദേവൻ ദേഷ്യപ്പെടാതെയും എന്നാൽ അല്പം പൗരുഷത്തോടെയും തന്നെയാണ് അവനോട് സംസാരിച്ചത്

“എന്ത് സംസാരിക്കാൻ…”

“നീ വാ പറയാം…”

ആ സമയമത്രയും ദേവൻ രാജന്റെ കയ്യിൽ ഉള്ള പിടുത്തം വിട്ടിരുന്നില്ല, ആ കൈ വിട്ടാൽ അത് പതിക്കുക വിനായകന്റെ മുഖത്തായിരിക്കും എന്ന് ദേവന് നല്ലത് പോലെ അറിയാമായിരുന്നു

“എനിക്കൊന്നും പറയാനില്ല, താൻ പോകാൻ നോക്ക്…”

വിനായകൻ അത് പറഞ്ഞു നിർത്തിയതും ദേവൻ രാജന്റെ കയ്യിൽ ഉള്ള തന്റെ പിടിത്തം വിട്ടു.

തന്റെ കയ്യിൽ ഉള്ള ദേവന്റെ ശക്തി കുറഞ്ഞു വന്നതും രാജൻ ദേവന്റെ മുഖത്തേക്ക് നോക്കി, അവന്റെ മുഖത്തെ പുഞ്ചിരി കണ്ടതും രാജന്റെ കൈ ഒരു വട്ടം ഉയർന്നു താണു

രാജന്റെ ചെവി പൊത്തിയുള്ള അടിയിൽ വിനായകൻ നിലത്തു ഇരുന്ന് പോയി, അവൻ തൻറെ കവിൾ പൊത്തിപ്പിടിച്ചുകൊണ്ട് ചുറ്റിനും നോക്കി , തനിക്ക് ചുറ്റിനും ഒരു മൂടുപടലം വന്ന്‌ നിറഞ്ഞത് പോലെ തോന്നി അവന്