ആ രാത്രിയിൽ 5[പ്രൊഫസർ ബ്രോ] 176

അവൻ ഹോസ്പിറ്റലിൽ എത്തുമ്പോൾ  മരക്കാരും പോലീസ് സർജനും അവനെ കാത്ത് അക്ഷമരായി നിൽക്കുകയായിരുന്നുമരക്കാർ അവനെയും കൂട്ടി പോസ്റ്റ്മോർട്ടം ടേബിളിൽ നഗ്നമായി കിടക്കുന്ന ശേഖരന്റെ മൃതശരീരത്തിന് അടുത്തേക്ക് നടന്നു അവരുടെ ഒപ്പം പോലീസ് സർജനും

“ദേവാ… ഡോക്ടർ എന്നോട് ഒരു സംശയം പറഞ്ഞു,ഇത് ഇയാൾ നടത്തുന്ന രണ്ടാമത്തെ കൊല അല്ല എന്ന് ജീവന്റെ കൊല നടക്കുന്നതിനും രണ്ട് മാസം മുൻപ് ഇതേ രീതിയിൽ ഒരാൾ മരിച്ചിരുന്നു എന്ന്… മുറിവിന്റെ വലിപ്പവും ആഴവും, മുറിച്ചിരിക്കുന്ന രീതിയും എല്ലാം സാമ്യം ഉണ്ടെന്ന്

അന്ന് ജീവന്റെ ബോഡി കണ്ടപ്പോൾ അതൊരു കോയ്നസിഡൻസ് ആയാണ് ഡോക്ടറിന് തോന്നിയത് പക്ഷെ ഇതും കൂടി ആയപ്പോൾ…

ആ കൊലപാതകം നടന്നത് നമ്മുടെ സ്റ്റേഷൻ പരിധിയിൽ അല്ലാതിരുന്നത് കൊണ്ട് മാത്രം നമ്മൾ അറിയാതെ പോയി, ഞാൻ ആ കേസ് അന്വേഷിച്ച സി.ഐ യെയും വിളിച്ച് അന്വേഷിച്ചു അവർക്കും അത് ചെയ്തത് ഒരു പെണ്ണാണ് എന്നതല്ലാതെ യാതൊരു തുമ്പും കിട്ടിയില്ല എന്ന്..

പക്ഷെ അന്ന് കൊല്ലപ്പെട്ട ആൾ ആരാണെന്ന് അറിഞ്ഞപ്പോൾ എനിക്ക് ചെറിയൊരു പ്രതീക്ഷയൊക്കെ തോന്നുന്നുണ്ട്”

അത് പറയുമ്പോൾ മരക്കാരുടെ വാക്കുകളിൽ ഉണ്ടായിരുന്ന ആത്മവിശ്വാസം കണ്ട ദേവന് അതാരാണെന്ന് അറിയാനുള്ള ത്വര കൂടി

“ആരാണ് സർ അന്ന് കൊല്ലപ്പെട്ടത്…”

…..

“ഡോക്ടർ ഗോപകുമാർ, പോലീസ് സർജൻ ആയിരുന്നു… അത് മാത്രമല്ല, അയാൾ മരിച്ചുപോയ..,അല്ല ആത്മഹത്യ ചെയ്ത ഡോക്ടർ ചന്ദ്രനാഥിന്റെ സീനിയർ കൂടി ആയിരുന്നു”

“What….!!!”

ദേവന്റെ കണ്ണുകൾ അത്ഭുതത്താൽ വിടർന്നു