അപരാജിതൻ -38 5341

“പപ്പാ ,,എനിക്കൊരു കാര്യം പറയാനുണ്ടായിരുന്നു”

“ഹമ് ,,എന്താ ?”

“എനിക്ക് ദണ്ഡുപാളയത്തൊന്നു പോകണമെന്നുണ്ട്  ”

അത് കേട്ടതോടെ ദേവദാസ് കോപത്തോടെ ചാടി എഴുന്നേറ്റു

“ആ നശിച്ച സ്ഥലത്തിന്റെ പേര് ഈ വീട്ടിൽ മിണ്ടിപ്പോകരുത് “

അവൻ അമ്പരപ്പോടെ പപ്പയെ നോക്കി

“പപ്പാ ,,അവിടെയെന്താ കുഴപ്പം?”

“നിനക്ക് കുഴപ്പമൊന്നും ഉണ്ടായിരിക്കില്ല , അവിടെ ജീവൻ അങ്ങോട്ടോ ഇങ്ങോട്ടോ എന്നറിയാതെ  നീ കിടന്നത് നിനക്കോ൪മ്മയുണ്ടാകില്ല പക്ഷെ ഞങ്ങൾ നാലുപേർക്കും നല്ലപോലെയോർമ്മയുണ്ട് ”

അവനെ നോക്കി ദേഷ്യത്തോടെ പറഞ്ഞു

മനു ആകെ ധർമ്മസങ്കടത്തിലായി

അവൻ വസുന്ധരയെ നോക്കി

“എന്നെ നീ നോക്കണ്ട മനു, ഇനി ഒരിടത്തും പോകണ്ട , ഞാനെന്തായാലൂം സമ്മതിക്കില്ല, എന്തൊക്കെയോ ഭാഗ്യം കൊണ്ട്  മാത്രമാണ് നിന്റെ പ്രാണൻ ഞങ്ങൾക്ക് കിട്ടിയത് ”

“മമ്മാ ,,,അത് …”അവൻ വാക്കുകൾ കിട്ടാതെ തപ്പി തടഞ്ഞു

“വേണ്ടാ മനുക്കുട്ടാ ,,,അമ്മമ്മയ്ക്കും പേടിയാ ,,മഹാദേവന്റെ അനുഗ്രഹം കൊണ്ട് നിന്നെ ഞങ്ങൾക്ക് തിരിച്ചു  കിട്ടിയതാ ,,,ഇനി പോണ്ടാ വാവേ ” അമ്മമ്മയും ആധിയോടെ പറഞ്ഞു

“അല്ല ,,’അമ്മ അവനെന്തിനാ പോകുന്നത് എന്ന് കൂടെ ചോദിക്ക് , ഏതോ ഒരുത്തൻ എന്തോ കഥ പറഞ്ഞു കൊടുക്കുന്നത് കേൾക്കാൻ വേണ്ടി, വല്ല കാര്യമുള്ള കാര്യവുമാണോ”

ദേവദാസ് കോപത്തോടെ മനുവിനെ നോക്കിപറഞ്ഞു

അവൻ മറുപടി പറയാനാകാതെ വിയർത്തു.

“‘അമ്മ പറ , എന്തേലും കാര്യമുണ്ടോ , ഇവനിവിടെ ഓഫീസിലെ കാര്യങ്ങൾ നോക്കിയിരുന്നാൽ പോരെ . അല്ല ,,മതി,,,എന്തായാലും നിശ്‌ചയവും വിവാഹവും ഒക്കെ വരുകയല്ലേ ,,ഇനി കൃത്യമായി ഓഫീസിൽ വന്നു ഓഫീസിലെ കാര്യങ്ങൾ നോക്കി മുന്നോട്ടു പോയാൽ , അല്ലാതെ ഒരിടത്തേക്കും പോകണ്ട ”

“പപ്പാ …അങ്ങനെ പറയല്ലേ ,,,അല്പം കൂടെ ”

“ഒരല്പവുമില്ല ,,,,നീയെന്റെ മകനാ, ഞാൻ പറയുന്നത് അങ്ങോട്ട് കേട്ടാൽ മതി ,ഇത് എന്റെ മാത്രം അഭിപ്രായമല്ല ,ഈ കുടുംബത്തിന്റെ അഭിപ്രായമാണ് , അത് പൊന്നുമോൻ അനുസരിച്ചാൽ മാത്രം മതി , ഇത്രകാലം കുറച്ചധികം സ്വാതന്ത്ര്യം തന്നു , കേട്ടല്ലോ ”

അവനു അവരെ ഒരുതരത്തിലും അവന്റെ ആവശ്യം ബോധ്യപെടുത്താൻ സാധിക്കാതെ അവൻ വിഷമത്തോടെ  പിന്തിരിഞ്ഞു നടന്നു.

“ഇനിയെന്ത് ചെയ്യും  എന്ന ചോദ്യം മനുവിന്റെ മനസ്സിനെ ഏറേയലട്ടികൊണ്ടേയിരുന്നു.

@@@@@@