അപരാജിതൻ -38 5288

“അനു ,,ഇതിപ്പോ ജാതക പ്രകാരം നല്ല സമയമാണ് , കല്യാണം എന്തായാലും നടത്തണം ” ശോഭ ഒരല്പം അധികാരത്തോടെ തന്നെ പറഞ്ഞു.

മനു മീനാക്ഷിയുടെ മുഖത്തേക്ക് നോക്കി

അനുപമയ്‌ക്ക്  ഇപ്പോൾ കല്യാണം വേണ്ടെന്നു പറയുന്നു

ഇതിനിടയിൽ എങ്ങനെ മനുവിന് അനുപമയെ ഇഷ്ടമെന്ന് പറയും

അനുപമയെ  അവനു ഇഷ്ടമാണ് എന്നതല്ലാതെ അനുവിന് തിരിച്ചെങ്ങനെയാണെന്ന് അറിയുകയുമില്ല , ഈ ഒരവസ്ഥയിൽ ,അവർക്കുമാകെ കൺഫ്യുഷനായി .

 

“എനിക്ക് ഈ കല്യാണവും വേണ്ട ഓസ്‌ട്രേലിയയിലേക്കും പോണ്ടാ അങ്കിളേ ” അവൾ വീണ്ടും വിതുമ്പലോടെ പറഞ്ഞു

ദേവദാസ് എല്ലാരേയും ഒന്ന് നോക്കി

“ഈ കല്യാണത്തിന് എന്താ കുഴപ്പം , അനു നീ വെറുതെ വാശി പിടിക്കണ്ട ” ശോഭ കോപം കാണിച്ചു

“കൊച്ചിനോട് ദേഷ്യപ്പെടല്ലേ ശോഭേ , ഞങ്ങള് പറഞ്ഞു മനസ്സിലാക്കിക്കാം ” വസുന്ധര ശോഭയെ വിലക്കി.

“മോളെ അവർ നല്ല കുടുംബമല്ലേ ,,പയ്യനും മിടുക്കനാ”

“എനിക്കൊരു ഇഷ്ടമുണ്ടാന്റി ,,” വിതുമ്പി കൊണ്ട് അനുപമ പറഞ്ഞു

“അനു ,,,” കോപത്തോടെ ശോഭ വിളിച്ചു

“നിന്റെ ഇഷ്ടത്തിന് നിന്നെ എന്തായാലും വിടില്ല , സ്നേഹിച്ചു വിവാഹം ചെയ്തതിന് ഒരുപാട് അനുഭവിച്ചതാ , അതെന്തായാലും ഉണ്ടാകില്ല ”

മനു മീനാക്ഷിയെ ഒന്ന് കൂടെ നോക്കി

മീനാക്ഷി രക്ഷയില്ല എന്നർത്ഥത്തിൽ മുഖമാട്ടി കാണിച്ചു.

അനുപമയ്ക്ക് വേറെ ഒരു ഇഷ്ടമുണ്ട് എന്ന് മനുവിനും മനസ്സിലായി.

അനുപമ മുഖം താഴ്ത്തി കരഞ്ഞു കൊണ്ടിരുന്നു.

“മോളെ ,,കരയല്ലേ … ” വസുന്ധര അവളെ ആശ്വസിപ്പിച്ചു

ശോഭ ദേഷ്യത്തോടെ ഡൈനിങ് ടേബിളിലെ കസേരയിൽ ഇരുന്നു സങ്കടം പറഞ്ഞു

“ഈ കുടുംബം എങ്ങനെയാ കൊണ്ട് പോകണെന്നു എനിക്കും മാത്രമറിയാം , ഇതിപ്പോ മക്കളെ കൊണ്ടും മനസ്സമാധനമില്ലാതെയായല്ലോ,, ഞാൻ ജീവനോടെയിരിന്നിട്ട് നിന്റെ ഇഷ്ടം നടക്കില്ല,,നോക്കിക്കോ”

ഇനിയുള്ള ഇരിപ്പ് പന്തിയല്ലെന്ന് മനസ്സിലാക്കിയ മനു എഴുന്നേറ്റു , കൂടെ മീനാക്ഷിയും

“എനിക്ക് മനുവേട്ടനെ ഒത്തിരി ഇഷ്ടാ ,, എനിക്ക് മനുവേട്ടനെ മതി ”

അനുപമ ഉറക്കെ പറഞ്ഞു കൊണ്ട് ഷാളിൽ മുഖമർത്തി കരയാൻ തുടങ്ങി.

കേട്ടവർ ഞെട്ടി

മനു കണ്ണ് മിഴിച്ചു കൊണ്ട് മീനാക്ഷിയെ നോക്കി.

മീനാക്ഷി അനുപമയെ നോക്കി.

സകലരും മനുവിനെ നോക്കി.