🌞 ഋതുഭേദങ്ങൾ 🌧️ 14 [ഖല്‍ബിന്‍റെ പോരാളി 💞] 1096

““അമ്മ വേഗം വരാട്ടോ…. കണ്ണന്‍ കുറുമ്പൊന്നും കുടാതെ അച്ഛന്‍റെ കുടെ നിക്കണാട്ടോ….”” അനഘ പറഞ്ഞു. എന്നാല്‍ അപ്രതീക്ഷിതമായി അനഘ തന്‍റെ അടുത്തേക്ക് വന്നു നിന്നപ്പോ അവളെ ചേര്‍ത്തുപിടിക്കാന്‍ ദേവിന് തോന്നിയതാണ്. എന്നാല്‍ എന്തോ ഒരു ഉള്‍ഭയം അവനെ തളര്‍ത്തി.

പിന്നെ അധികം കാത്ത് നില്‍ക്കാതെ അനഘ കെട്ടിടത്തിന്റെ അകത്തേക്ക് കയറാനുള്ള പ്രധാന കാവടത്തിലേക്ക് ചെന്നു. അവിടെ മത്സാരാര്‍ത്ഥികള്‍ അകത്തേക്ക് കയറാന്‍ ക്യൂ നില്‍ക്കാന്‍ തുടങ്ങിയിരുന്നു. അനഘയും അതിലൊരുവളായി നിന്നു. എന്നാല്‍ മെറ്റല്‍ ചെക്കിംഗ് കഴിഞ്ഞു കെട്ടിട്ടത്തിനുള്ളിലേക്ക് കയറുന്നത് വരെ ഇടയ്ക്കിടെ അവള്‍ പുറത്ത് പുന്തോട്ടത്തിനടുത്തായി നിന്നു കൊഞ്ചികുഴയുന്ന ദേവിനെയും മാളുട്ടിയെയും നോക്കിയിരുന്നു. ഇടയ്ക്ക് ദേവ് നോക്കിയപ്പോ രണ്ടുപേരുടെയും കണ്ണ് ഒന്ന് ഇടഞ്ഞതാണ്. എന്നാല്‍ അപ്പോഴേക്കും അനഘ കണ്ണ് പിന്‍വലിച്ചു.

അധികം വൈകാതെ ചെക്കിംഗും ഐഡി വെരിഫിക്കേഷനുമെല്ലാം കഴിഞ്ഞു അനഘ ദേവിന്‍റെയും മാളുട്ടിയുടെയും കണ്‍വെട്ടത്ത് നിന്ന് മറഞ്ഞു. കോളേജ് മുറ്റത്ത് നല്ല വെയിലായത് കൊണ്ട് മാളുട്ടിയുമായി അധിക നേരം അവിടെ നില്‍ക്കാതെ മത്സരാർത്ഥികളുടെ കൂടെ വന്ന ബാക്കിയുള്ളവര്‍ക്കായി തുറന്നിട്ടിരുന്ന കോളേജ് ഓഡിറ്റോറിയത്തിലേക്ക് ദേവ് മാളുട്ടിയുമായി കയറി. അവിടെ ഒരു ഫാനിന്‍റെ ചുവട്ടില്‍ മാളുട്ടിയുമായി ചെന്നിരുന്നു.

ഓടി നടക്കാന്‍ വലിയ ഹാള്‍ കിട്ടിയപ്പോ മാളുട്ടി ദേവിനടുത്ത് നിന്ന് മാറി അവിടെയെല്ലാം ഓടി നടന്നു കളിയ്ക്കാന്‍ തുടങ്ങി. അവിടെ നിന്നിരുന്ന ബാക്കിയാളുകളെല്ലാം അവളുടെ കളിയും ചിരിയുമെല്ലാം നോക്കികൊണ്ടിരുന്നു. കുറച്ചു കഴിഞ്ഞപ്പോ പതിയെ മാളുട്ടിയുടെ ഉന്മേഷം കുറയാന്‍ തുടങ്ങി. ഉറക്കം അവളെ തേടി വരുന്നുണ്ടായിരുന്നു. അതോടെ കളിയെല്ലാം അവസാനിപ്പിച്ച് അവള്‍ അച്ഛന്‍ മടിയിലേക്ക് പൊത്തി പിടിച്ചു കയറി. പിന്നെ അവിടെ കിടന്നു മയങ്ങി.

പെട്ടെന്ന് രണ്ടാളെയും ഞെട്ടിച്ചുകൊണ്ട് അനഘയുടെ ഫോണ്‍ ബാഗില്‍ കിടന്നു അടിക്കാന്‍ തുടങ്ങി. മാളുട്ടി ഉറക്കം പോയതിന്‍റെ ആലസ്യത്തില്‍ ഒന്നു ചിളുങ്ങി. ദേവ് പതിയെ മാളുട്ടിയെ പയ്യെ തട്ടി കൊടുത്ത് അവളെ വീണ്ടും ഉറക്കത്തിലേക്ക് തന്നെ വിട്ട ശേഷം അനഘയുടെ ബാഗ് തുറന്നു അത് നോക്കി. ഏതോ ആഡ് കോളായിരുന്നു. നമ്പര്‍ കണ്ടപ്പോഴേ അത് ഓഫാക്കി അവന്‍ ഫോണിലേക്ക് നോക്കി. അതില്‍ അവൾ കുറച്ച് ദിവസം മുമ്പ് മാളുട്ടി നിര്‍ബന്ധിച്ചു എടുപ്പിച്ച തങ്ങളുടെ ഫാമിലി സെല്‍ഫിയായിരുന്നു വാള്‍പേപ്പറായി ഉണ്ടായിരുന്നത്. അതു കണ്ട് ദേവ് ഒന്നു ചിരിച്ചു. പാസ് വേര്‍ഡ് അറിയാത്തത് കൊണ്ട് അത് തുറക്കാന്‍ അവന്‍ ശ്രമിച്ചില്ല. ഫോണ്‍ സൈലന്‍റാക്കി തിരിച്ചു അവളുടെ ഹാന്‍റ് ബാഗില്‍ വെയ്ക്കുമ്പോഴാണ് എന്തോ ഒന്ന് തിളങ്ങുന്നത് അവനറിഞ്ഞത്. ബാഗില്‍ കയ്യിട്ട് നോക്കിയപ്പോ അത് താന്‍ വാങ്ങി കൊടുത്ത അരഞ്ഞാണമായിരുന്നു. നേരത്തെ മുഖത്ത് വന്ന സന്തോഷം ആയിരം മടങ്ങാവും പോലെ ഉന്മേഷകമായി.