🌞 ഋതുഭേദങ്ങൾ 🌧️ 14 [ഖല്‍ബിന്‍റെ പോരാളി 💞] 1096

““അമ്മ പരിച്ചക്ക് പോവാണോ….?”” മാളുട്ടി ചോദിച്ചു.

““അതേടോ കണ്ണാ….””

““മാളുട്ടീം വരട്ടെ….””

““മാളുട്ടിയ്ക്ക് ആ മുറിയുടെ പുറത്തേക്ക് വരെ വരാം…. അമ്മ അകത്തേക്ക് പോയി പെട്ടെന്ന് വരുലെ കണ്ണാ….”” അനഘ പറഞ്ഞു. മാളുട്ടി എന്തോ മനസിലായ പോലെ തലയാട്ടി.

ദേവ് പിന്നെ മാളുട്ടിയെ കുളിച്ചു ഒരുക്കി. മൂന്ന് പേരും റെഡിയായി ഭക്ഷണം കഴിക്കാന്‍ പോയി. ഉച്ചയ്ക്ക് ശേഷമായിരുന്നു എക്സാം. ഹോട്ടലിന്‍റെ റിസപ്ഷനില്‍ ചോദിച്ച് എക്സാം ഹാളിനെ കുറിച്ചു ഒന്നുടെ ഉറപ്പ് വരുത്തിയിരുന്നു. കോയമ്പത്തൂര്‍ നഗരത്തില്‍ നിന്ന് അല്‍പം ദൂരമുണ്ട് അങ്ങോട്ട്. അതുകൊണ്ട് നേരത്തെ ഉച്ചഭക്ഷണം കഴിച്ചു അവര്‍ ഇറങ്ങി. ഒരു മണിയ്ക്ക് റിപ്പോര്‍ട്ട് ചെയ്യണം. രണ്ടുമണി തൊട്ട് നാലു മണി വരെയാണ് എക്സാം. അതുകഴിഞ്ഞ് തിരിച്ചു ഹോട്ടലിലെത്തുമ്പോ അഞ്ച് അഞ്ചരയാവും.

റിപ്പോര്‍ട്ടിംഗ് ടൈമിംങിന് അര മണിക്കുര്‍ മുന്നേ തന്നെ എക്സാം ഹാളിലേക്ക് അവരെത്തി. നോക്കത്താ ദൂരത്തോളം നിരന്ന് കിടക്കുന്ന ഏതോ പ്രൈവറ്റ് കോളേജാണ് എക്സാം സെന്‍റര്‍. നോട്ടത്തിലും ഗമയിലും മുഴുവന്‍ പരിക്ഷ്കൃതമായ കോളേജ്. ജീപ്പ് പാര്‍ക്ക് ചെയ്ത് മൂന്നുപേരും കെട്ടിടത്തിന്‍റെ പ്രധാന കെട്ടിടത്തിന്റെ മുന്നിലേക്ക് നിങ്ങി. ദേവ് അവിടെ പാര്‍ക്ക് ചെയ്ത വാഹനങ്ങളെല്ലാം ഒന്ന് നിരിക്ഷിച്ചു. കേരള, തമിഴ്നാട് രജിസ്ട്രേഷനിലെ കുറെ വാഹനങ്ങള്‍ അവിടെയുണ്ടായിരുന്നു. പ്രധാന കെട്ടിടത്തിന്റെ മുന്നില്‍ എത്തിയപ്പോള്‍ അവിടെ മുറ്റത്ത് ഒരു സമ്മേളനത്തിനുള്ള ആളുകള്‍ ഉണ്ടായിരുന്നു. എക്സാം എഴുതാന്‍ വന്നവരും അവരുടെ കുടെ വന്നവരുമായി ആകെ ജനപ്രളയം. ദേവ് മാളുട്ടിയെ പൊക്കി എടുത്ത് ചേര്‍ത്തു പിടിച്ചു. അനഘ എങ്ങോട്ട് പോകണമെന്നറിയാതെ ചുറ്റും നോക്കികൊണ്ടിരിക്കുകയായിരുന്നു.

““അനഘേ… വാ….”” ദേവ് അനഘയെ വിളിച്ചു ആളുകള്‍ക്കിടയിലുടെ മുന്നിലേക്ക് നടന്നു. അതോടെ അനഘ ദേവ് ആളുകള്‍ക്കിയിലുടെ ഉണ്ടാക്കുന്ന വഴിയിലുടെ ദേവിന് പിറകെയായി നടന്നു.

കോളേജിന്‍റെ വരാന്തയില്‍ കയറിയപ്പോള്‍ കുറച്ചപ്പുറത്ത് രണ്ടുമൂന്ന് ബോര്‍ഡിലായി എക്സാം രജിസ്ട്രര്‍ നമ്പര്‍ പ്രിന്‍റ് ചെയ്ത് ഒട്ടിച്ചുവെച്ചിട്ടുണ്ടായിരുന്നു. അതിന് ചുറ്റും ഒരു പടയ്ക്ക് ആളുകളും ഉണ്ടായിരുന്നു. അനഘ തന്‍റെ ഹാന്‍റ് ബാഗ് തുറന്ന് ഹാള്‍ ടിക്കറ്റ് പുറത്തെടുത്തു. അതോടെ ദേവ് അവളുടെ ഹാന്‍റ് ബാഗ് വാങ്ങി അവളോട് പോയി എക്സാം ഹാള്‍ കണ്ടെത്താന്‍ പറഞ്ഞു.