🌞 ഋതുഭേദങ്ങൾ 🌧️ 14 [ഖല്‍ബിന്‍റെ പോരാളി 💞] 1096

ദിവസങ്ങള്‍ പിന്നെയും കടന്നു പോയി. ഓണം വൈദരത്ത് ഒരു ഉത്സവം തന്നെയായിരുന്നു. പ്രത്യേകിച്ച് മാളുട്ടിയ്ക്ക്. ഓണസദ്യയും കളികളും എല്ലാം അവള്‍ നല്ല പോലെ ആസ്വദിച്ചു. മൂന്നാം ഓണത്തിന് ദേവും അനഘയും മാളുട്ടിയും കുടെ അനഘയുടെ ഇല്ലത്തേക്ക് പോയി. ഒരു ദിവസത്തെ ഓണം അവിടെയായിരുന്നു. ഇതിനിടയിലായിരുന്നു ദേവിന്‍റെയും അനഘയുടെയും നോട്ടം കൊണ്ടുള്ള പ്രണയം. രാത്രി അല്‍പനേരം രണ്ടുപേരും സംസാരിച്ചിരിക്കും. അതിനിടെ ഒളിഞ്ഞും തെളിഞ്ഞും ദേവിന്‍റെ ഓരോ സ്പര്‍ശങ്ങള്‍ അവളെ തേടി വന്നിരുന്നു. ആദ്യമെല്ലാം അവള്‍ക്ക് ഒരു അസ്വസ്ത തോന്നിയിരുന്നെങ്കിലും ആ സ്പര്‍ശനങ്ങള്‍ പിന്നെ അവള്‍ക്ക് സന്തോഷം നല്‍കാന്‍ തുടങ്ങി.

ഇടയ്ക്ക് നോട്ടവും സ്പര്‍ശനവും കുടുതലായപ്പോ ദേവ് കുറച്ചു  കുരുത്തക്കേട് കാണിക്കാന്‍ നോക്കി. എന്നാല്‍ അനഘ അതിന് എതിരൊന്നും പറഞ്ഞില്ലെങ്കിലും കണ്ണുകളടച്ചു ചുണ്ടുവിറച്ചു നിന്നിരുന്ന അനഘയെ കണ്ടപ്പോ ദേവ് ചിരിയോടെ പിന്‍മാറി. അപ്പോള്‍ അനഘയ്ക്ക് ഒരു ആശ്വാസം തോന്നിയെങ്കിലും രണ്ടു മൂന്ന് തവണ ഇതാവര്‍ത്തിച്ചപ്പോ എന്തോ അനഘയ്ക്ക് തന്നെ താനീ ചെയ്യുന്നത് ശരിയല്ലെന്ന കുറ്റബോധം കിഴടക്കി തുടങ്ങി. ദേവേട്ടന്‍ പതിയെ തന്നോട് അടുക്കാന്‍ നോക്കുമ്പോള്‍ എന്തോ തന്‍റെ ശരീരം അതിനെ സമ്മതിക്കുന്നില്ലെന്ന് അവള്‍ക്ക് തോന്നി. അവസാനവട്ടം കണ്ണടച്ചു പിടിയ്ക്കരുതെന്ന് മനസ് പറഞ്ഞെങ്കിലും കണ്ണും ചുണ്ടും തന്നെ വീണ്ടും തോല്‍പിച്ചു.