“ഇവർക്കൊക്കെ എന്ത് സുഖമാ അല്ലെ രാജേട്ടാ… നാട് ഭരിച്ചു മുടിക്കുകയും ചെയ്യാം, നാട്ടുകാരുടെ പണം കൊണ്ട് ജീവിക്കുകയും ചെയ്യാം., ഉള്ള ലോകം മുഴുവൻ നിരങ്ങുന്നതിന് നമ്മളെ പോലുള്ളവരുടെ അകമ്പടിയും…”

റിയർ വ്യൂ മിററിൽ കൂടി തങ്ങളുടെ വണ്ടിയുടെ പിന്നാലെ വരുന്ന വെള്ള ഇന്നോവയുടെ പ്രതിബിംബം നോക്കിയാണ്  ദേവൻ രാജനോട് പറഞ്ഞത്

രാജൻ അതിന് മറുപടിയായി ഒന്ന് ചിരിച്ചു .

♦️♦️♦️♦️♦️

“ജീവാ… ഞാൻ പറയുന്നത് വല്ലതും നീ കേൾക്കുന്നുണ്ടോ…എപ്പോ തൊട്ട് തുടങ്ങിയതാ ഈ ഫോണിൽ തോണ്ടൽ…”

“എന്താടാ…”

ജീവൻ ഫോണിൽ നിന്നും തലയുയർത്തി സത്യനെ നോക്കി

“നീ എന്താ ഫോണിൽ ഈ പണിയുന്നത്…”

സത്യൻ ജീവന്റെ ഫോണിലേക്ക് എത്തി നോക്കിയതും അയാൾ ആ ഫോണിന്റെ ഡിസ്പ്ലേ ഓഫ്‌ ചെയ്ത് കള്ളത്തരം എന്തോ മറക്കാൻ എന്നത് പോലെ സത്യനെ ചിരിച്ചു കാണിച്ചു

“നിനക്കും തുടങ്ങിയോ ശേഖരന്റെ സൂക്കേട്…”

“പോടാ… ഇതങ്ങനൊന്നും അല്ല…,”

“ആ അതെന്തെങ്കിലും ആകട്ടെ, അന്ന് നമ്മുടെ വീട്ടിൽ കയറിയവനെ കുറിച്ച് അന്വേഷിക്കുന്നു എന്ന് പറഞ്ഞിട്ട് എന്തായി…”

ജീവൻ സത്യന് മറുപടി കൊടുക്കുന്നതിനു മുൻപ് തന്നെ ജീവന്റെ ഫോണിൽ വീണ്ടും ഒരു മെസ്സേജ് നോട്ടിഫിക്കേഷൻ ടോൺ കേട്ടു, ഫോൺ ഓൺ ആക്കാൻ പോയ ജീവന്റെ കയ്യിൽ നിന്നും സത്യൻ അത് തട്ടിപ്പറിച്ചു വാങ്ങി

“നീ ഇനി വീട്ടിൽ എത്തിയിട്ട് ഫോണിൽ പണിതാൽ മതി, ഇപ്പൊ ഞാൻ ചോദിച്ചതിന് ഉത്തരം പറ”