ആ രാത്രിയിൽ 2 [പ്രൊഫസർ ബ്രോ] 172

അങ്ങോട്ട് പോകണം എന്നും അതെന്താണെന്ന് നോക്കണം എന്നുമുള്ള ആകാംഷ ദേവന്റെ മുഖത്തു പ്രകടമായിരുന്നു

പെട്ടന്നാണ് അവന്റെ കണ്ണുകൾ ചുവരിൽ തൂക്കിയിരിക്കുന്ന ഒരു ഫോട്ടോയിലേക്ക് ആകര്ഷിക്കപ്പെടുന്നത് . ആ ഫോട്ടോകൾ കണ്ടതും ദേവന്റെ കാലുകൾ യാന്ത്രികമായി ചലിച്ചു

“ദാ ചായ…”

പിന്നിൽ നിന്നും ഗംഗയുടെ ശബ്ദം കേട്ട് ദേവൻ തിരിഞ്ഞു നോക്കി. അവന്റെ കണ്ണുകൾ നിറഞ്ഞിരുന്നു. അവൻ അവൾ നീട്ടിയ ട്രെയിൽ നിന്നും ഒരു കപ്പ്‌ എടുത്തു ചുണ്ടോട് ചേർത്തു

“ഇത്….”

“ഞാൻ വരച്ചതാണ്…”

“ആഹാ… മോള് വരക്കുമോ…”

ദേവന്റെയും ഗംഗയുടെയും സംസാരം ശ്രദ്ധിച്ചുകൊണ്ടിരുന്ന രാജൻ അവർക്കരികിലേക്ക് വന്നു

“മനസ്സിന് എന്തെങ്കിലും വിഷമം വന്നാലും, സന്തോഷം വന്നാലും വരക്കും സർ…”

“എന്തായാലും കൊള്ളാം… പക്ഷെ എനിക്കൊന്നും മനസ്സിലായില്ല”

“അത്… ഒരു കുട്ടിയുടെ കൈകളിൽ നിന്നും അകന്ന് പോകുന്ന അവന്റെ അച്ഛന്റെയും അമ്മയുടെയും കൈകൾ ആണ് സർ…”

അവൾ പറഞ്ഞ് നിർത്തിയതും തന്റെ കയ്യിൽ ഇരുന്ന കപ്പ്‌ അവളുടെ ട്രെയിൽ തന്നെ വച്ചതിനു ശേഷം ദേവൻ പുറത്തേക്ക് നടന്നു. അവന്റെ കണ്ണുകളിൽ നിന്നും അടർന്ന ഒരു തുള്ളി അവൾ നീട്ടിപ്പിടിച്ച ട്രെയിലും വീണിരുന്നു

ദേവന്റെ അപ്രതീക്ഷിതമായ ആ പെരുമാറ്റത്തിൽ രാജനും ഗംഗയും മുഖത്തോട് മുഖം നോക്കി

“എന്താ സർ… എന്തിനാ ആ സർ ഇപ്പൊ സോറി പറഞ്ഞിട്ട് പോയത്…”

“എനിക്കും അറിയില്ല മോളെ… എന്തായാലും ഞാൻ അങ്ങോട്ട് ചെല്ലട്ടെ”

ഗംഗ കൊണ്ടുവന്ന ചായ ഒരുകവിൾ മാത്രം കുടിച്ച് അയാൾ കപ്പ്‌ അവളുടെ കയ്യിൽ തിരിച്ചു നൽകിക്കൊണ്ട് പുറത്തേക്ക് നടന്നു

രാജന്റെ പിന്നാലെ പുറത്തേക്ക് വന്ന ഗംഗ റോഡിലേക്ക് നോക്കി , ദേവൻ സീറ്റിൽ ചാരിയിരുന്നു എന്തോ ആലോചിക്കുന്നത് കണ്ടതും ഗംഗയുടെ മുഖം സംശയങ്ങളാൽ നിറഞ്ഞു