ആ രാത്രിയിൽ 2 [പ്രൊഫസർ ബ്രോ] 172

“സോറി സർ…”

“ആ ശരി ശരി താൻ വാ…”

മരക്കാർ അവനെയും കൂട്ടിക്കൊണ്ട് ബെഡ്റൂമിലേക്ക് നടന്നു. റൂമിന്റെ വാതിൽക്കൽ എത്തിയ അവനെ മരക്കാർ ഉള്ളിൽ കയറുന്നതിൽ നിന്നും വിലക്കി

“അകത്തു ഫോറൻസിക് പരിശോധന നടക്കുകയാണ്, അവർ എന്താ പറയുന്നത് എന്ന് നോക്കാം…”

മരക്കാർ പറഞ്ഞ് നിർത്തിയതും അവൻ അവിടെ തന്നെ നിന്ന് കൊണ്ട് ഉള്ളിലേക്ക് നോക്കി

മുപ്പതിനും നാല്പതിനും ഇടയിൽ പ്രായമുള്ള, അഞ്ചടിക്ക് മുകളിൽ ഉയരവും അതിനൊത്ത വണ്ണവും ഉള്ള, കാഴ്ചയിൽ സുമുഖനായ ഒരു മധ്യ വയസ്കൻ വെള്ള മുണ്ടും വെള്ള ഇന്നർ ബനിയനും ആണ് അയാളുടെ വേഷം

കട്ടിലിൽ നീണ്ടു നിവർന്നു കിടക്കുന്ന അയാളുടെ തലയും രണ്ട് കൈകളും കട്ടിലിൽ നിന്നും പുറത്തേക്ക് ആണ് കിടക്കുന്നത് കഴുത്തിലെ മുറിവിൽ നിന്നും ഒഴുകിയ രക്തം താടി വഴി ഒഴുകി ചെവിയേയും കടന്ന് നിലത്തു വീണു തളം കെട്ടിയിരിക്കുന്നു

മുറിയിൽ ഒരു ബലപ്രയോഗം നടന്നതിന്റെ യാതൊരു അടയാളങ്ങളും പ്രഥമ ദൃഷ്ടിയാൽ കാണാനില്ല , കട്ടിലിനടുത്തിരിക്കുന്ന ബെഡ്‌സൈഡ് ടേബിളിൽ ഒരു പകുതി ഒഴിഞ്ഞ റെഡ് ലേബൽ കുപ്പിയും രണ്ട് ഗ്ലാസുകളും ഇരിക്കുന്നു , അതിൽ ഒരു ഗ്ലാസിലെ മദ്യം പൂർണമായും കുടിച്ച് തീർത്തിരിക്കുന്നു . അതിനടുത്തായുള്ള പ്ലേറ്റിൽ ഫ്രൂട്സ് നിരത്തി വച്ചിരിക്കുന്നു

“എന്താടോ നോക്കുന്നത്… എന്തെങ്കിലും കണ്ട് പിടിച്ചോ…”

മരക്കാർ ദേവന്റെ പുറത്ത് തട്ടി അത് ചോദിച്ചപ്പോൾ ആണ് അവൻ അകത്തെ കാഴ്ചകളിൽ നിന്നും കണ്ണെടുക്കുന്നത്

“സർ… ഇവിടെ സി.സി.ടി.വി ഒന്നും ഇല്ലേ…”

“അതുണ്ടെന്ന് തനിക്കും അറിയാവുന്നതല്ലേ… തനിക്കന്ന് തലക്കടി കിട്ടിയപ്പോൾ നമ്മൾ കണ്ടതല്ലേ…പക്ഷെ അത് പുറത്ത് മാത്രമേ ഉള്ളു… ഞാൻ ഹാർഡ് ഡിസ്ക് കൊണ്ടുവരാൻ പറഞ്ഞിട്ടുണ്ട് നമുക്ക് നോക്കാം…”

“ശരി സർ…”

സംസാരിച്ചുകൊണ്ട് നിന്ന അവരുടെ അരികിലേക്കു ഒരു കോൺസ്റ്റബിൾ നടന്നു വന്നു. അവർക്ക് രണ്ട് പേർക്കുമായി സല്യൂട്ട് ചെയ്തുകൊണ്ട് അയാൾ സംസാരിക്കാൻ ആരംഭിച്ചു

“സർ… ഒരു അറിയിപ്പ് കിട്ടിയിട്ടുണ്ട്… നമ്മുടെ പൊതുമരാമത്തു വകുപ്പ് മന്ത്രി ഇങ്ങോട്ട് എത്തുന്നുണ്ട്…”