ആ രാത്രിയിൽ 2 [പ്രൊഫസർ ബ്രോ] 172

അവർ രണ്ട് പേരും ആ മൃതദേഹം പരിശോധിക്കാൻ തുടങ്ങി

“ഈ രാത്രിയിൽ ഇയാൾ ഇതാർക്ക് വേണ്ടിയാ സ്പ്രേ ഒക്കെ അടിച്ചേക്കുന്നത്”

മരക്കാർ ഒന്ന് ചുറ്റിനും മണം പിടിച്ചുകൊണ്ട് തന്നത്താൻ പറഞ്ഞു

“ദാ… നോക്ക് സർ…”

ദേവൻ മരക്കാരുടെ ശ്രദ്ധയെ തന്നിലേക്ക് ക്ഷണിച്ചു

“കോണ്ടം…???”

“അതേ സർ…ഇയാളുടെ മുണ്ടിൽ നിന്നും കിട്ടിയതാ… ഇപ്പൊ മനസ്സിലായില്ലേ സർന് രാത്രി ഇയാൾ ആർക്ക് വേണ്ടിയാ സ്പ്രേ അടിച്ചു കാത്തിരുന്നത് എന്ന്…”

മരക്കാർ അവനെ നോക്കി ഒന്ന് ചിരിച്ചു,

“വേറെ ഒന്നും ഇല്ല സർ… ഇയാളുടെ ശരീരത്തിൽ ബലപ്രയോഗം നടന്നതിന്റെ യാതൊരു പാടുകളും കാണാൻ ഇല്ല…”

“ഹ്മ്മ്… നമുക്ക് ഈ റൂമൊന്ന് പരിശോധിക്കാം…അതിന് മുൻപ് ബോഡി ഹോസ്പിറ്റലിലേക്ക് മാറ്റുന്നതിനുള്ള പരിപാടികൾ നോക്കാം…”

“ശരി സർ…”

ദേവൻ മുറിയിൽ നിന്നും പുറത്തിറങ്ങി കുറച്ചു മാറി നിന്നിരുന്ന ഒരു കോൺസ്റ്റബിളിനെ തന്റെ അരികിലേക്കു വിളിച്ചു , അയാൾക്കുള്ള നിർദ്ദേശങ്ങൾ നൽകിയതിന് ശേഷം അവൻ വീണ്ടും ആ മുറിയിലേക്ക് നടന്നു

അവൻ മുറിയിലേക്ക് എത്തുമ്പോഴേക്കും മരക്കാർ തന്റെ അന്വേഷണം തുടങ്ങിയിരുന്നു, മുറിയിലെ വാർഡോബ്‌ തുറന്ന് പരിശോധിക്കുന്ന മരക്കാരെ ആണ് അവൻ അവിടെ കണ്ടത്

“ടോ… ഇത് നോക്ക്…”

ദേവൻ തിരിച്ചെത്തിയത് കണ്ടതും മരക്കാർ അവനെ തന്റെ അരികിലേക്ക് വിളിച്ചു

“ദാ, പുതിയ ഒരു ചുരിദാർ, ഒരു ലേഡീസ് ബോഡി സ്പ്രേ  കണ്ടിട്ട് ഇന്നലത്തെ വിരുന്നുകാരിക്ക് വേണ്ടി വാങ്ങിവച്ചിരുന്നതാണെന്ന് തോന്നുന്നു…”

മരക്കാർ ആ തുണികൾ അവന്റെ മുന്നിലേക്ക് നീട്ടിയതും അതിൽ നിന്നും ഒരു പേപ്പർ പുറത്തേക്ക് ചാടി . ദേവൻ അത് കുനിഞ്ഞെടുത്തു. അതിൽ എഴുതിയിരിക്കുന്നത് അവൻ വായിച്ചു

“കാണാമറയത്ത് ഇരുന്നെന്നെ സ്നേഹിക്കുന്ന, ആദ്യമായി എന്നെ പ്രണയത്തിനു അടിമയാക്കിയ, എന്റെ മാത്രം ചന്ദ്രക്ക്…”

വായിച്ചു നിർത്തിയ ദേവൻ മരക്കാരുടെ മുഖത്തേക്ക് നോക്കി